ហេតុផលទាំង៣យ៉ាងដែលអ្នកគួរធ្វើការឲ្យក្រុមហ៊ុនតូចៗ
បើទោះបីជាធ្វើការឲ្យក្រុមហ៊ុនធំៗ អ្នកអាចនឹងទទួលបានប្រាក់ខែខ្ពស់ឬមើលទៅអស្ចារ្យក៏ដោយ ប៉ុន្តែ ប្រសិនជាអ្នកធ្វើការដើម្បីការអភិវឌ្ឍន៍ខ្លួនឯងនោះ អ្នកនឹងរៀនចេះដឹងបានច្រើននៅក្រុមហ៊ុនតូចៗពីព្រោះថាអ្នកអាចធ្វើការជិតស្និទ្ធជាមួយនឹងថៅកែ។ ប្រសិនជាអ្នកនៅមិនច្បាស់ថាអ្នកនឹងទទួលបានអ្វី ខាងក្រោមនេះជាអត្ថប្រយោជន៍ដែលអ្នកនឹងទទួលបានពីការធ្វើការនៅក្រុមហ៊ុនតូចៗ៖
១) ឡើងឋានៈ៖ ដោយសារតែក្រុមហ៊ុននៅតូច នោះក៏មានន័យថាសមាជិកក្នុងក្រុមក៏តិចដែរ។ រាល់កិច្ចខំប្រឹងនឹងត្រូវបានមេមើលឃើញ។ ដូច្នេះហើយ ប្រសិនជាអ្នកខិតខំធ្វើការនិងបង្ហាញពីសមត្ថភាពរបស់អ្នកនោះ អ្នកនឹងមានឱកាសឡើងឋានៈបានឆាប់និងមានទំនួលខុសត្រូវខ្ពស់ជាងមុន។ ម៉្យាងវិញទៀត នេះក៏បង្ហាញថាអ្នកទទួលបានទំនុកចិត្តពីថៅកែរបស់អ្នកផងដែរ។
២) រៀនចេះបានច្រើនពីការងារ៖ ដូចដែលបានលើកឡើងពីខាងលើអញ្ចឹង ក្រុមហ៊ុនដែលទើបតែចាប់ផ្តើមដំណើរការថ្មីថ្មោងគឺមានកិច្ចការងារដែលត្រូវបំពេញជាច្រើន ហើយដោយសារតែកង្វះខាតធនធានមនុស្សនៅក្នុងក្រុមហ៊ុនទៀតនោះ បុគ្គលិកអាចនឹងទាមទារឲ្យធ្វើការងារច្រើនដែលលើសពីទំនួលខុសត្រូវក្នុងកិច្ចសន្យា។ តែ វាជាចំណុចល្អនោះទេព្រោះប្រសិនអ្នកជាធ្វើច្រើន អ្នកក៏ចេះច្រើនដូចគ្នា វានឹងផ្តល់ផលវិជ្ជមាននិងតបស្នងដល់អ្នកនាថ្ងៃក្រោយ។
៣) ជោគជ័យជាក្រុម៖ រាល់ការខិតខំប្រឹងប្រែងដែលអ្នកមានចំពោះក្រុមហ៊ុនសុទ្ធតែត្រូវបានមេឲ្យតម្លៃ។ លើសពីនេះទៅទៀត រាល់ភាពជោគជ័យក្នុងក្រុមហ៊ុនសុទ្ធតែជប់លៀងឬចែករំលែកភាពរីករាយជាមួយនឹងសមាជិកក្នុងក្រុម។ អ្នកក៏មានអារម្មណ៍ថាអ្នកជាចំណែកមួយនៃភាពជោគជ័យរបស់ក្រុមហ៊ុនផងដែរ៕
ប្រែសម្រួល៖ អុឹង មុយយូ ប្រភព៖ monster.com
