តាមពិតទៅ«អ្នកចូលចិត្តមើលកុន» មិនខុសអីទេ ព្រោះថាគេនឹងទទួលបានអត្ថប្រយោជន៍ទាំងនេះ
អត្ថប្រយោជន៍បានមកពីការមើលកុនជាមួយមិត្តភ័ក្ដិ គូស្នេហ៍ ឬគ្រួសារមិនត្រឹមតែនាំឲ្យសប្បាយនិងបង្កើនមិត្តភាពរឹងមាំប៉ុណ្ណោះទេ តែនៅមានរឿងល្អៗច្រើនលើសហ្នឹងទៀត។ តើមានអ្វីខ្លះទៅ?
១) កម្សាន្ត៖ រឿងមានច្រើនប្រភេទណាស់ ហើយរឿងមួយមានសឹងតែគ្រប់ឈុតឆាកទៅហើយ។ ខណៈអ្នកកំពុងមើលរឿងខ្មោច តែអ្នកក៏អាចសើចសប្បាយនឹងឈុតឆាកកំប្លុកកំប្លែងដទៃទៀតបានច្រើនផងដែរ។
២) បំបាត់ការតានតឹង៖ វាជាហេតុផលគោល ដែលនាំឲ្យមនុស្សភាគច្រើនចូលចិត្តមើលកុន។ រៀងរាល់ថ្ងៃអ្នកអាចតានតឹងនឹងជីវិត ការសិក្សា ការងារ ស្នេហានិងអ្វីៗជាច្រើនទៀត។ ហេតុនេះបើអាចទៅមើលកុនបាន អ្នកអាចកាត់បន្ថយអត្រាតានតឹងអារម្មណ៍បានមួយផ្នែកដែរ។
៣) ជួយស៊ីពេលអ្នក៖ អាចថាអ្នកទំនេរថ្ងៃចុងសប្ដាហ៍ ហើយអ្នកនៅផ្ទះអផ្សុកមិនដឹងធ្វើអ្វី។ ដូចនេះអ្នកអាចជ្រើសរើសរឿងណាក៏បាន ឬក៏ទៅមើលកុនផ្ទាល់ដើម្បីកាត់បន្ថយពេលដែលមានទៅ។
៤) ទទួលបានគំនិតទូន្មាន៖ រឿងនីមួយៗ តែងតែបង្កប់អត្ថន័យផ្សេងៗគ្នា។ អ្នកនិពន្ធបានបង្ហាញពីជីវិតតស៊ូ ការខិតខំ ការជម្នះរាល់ឧបសគ្គរហូតទទួលបានជោគជ័យដល់ទីបញ្ចប់។ ហើយអ្នកទស្សនា ក៏អាចយកទស្សនៈទាំងនោះ មកអនុវត្តក្នុងជីវិតផ្ទាល់បានដែរ។
៥) ជាទីកន្លែងល្អសម្រាប់ការណាត់គ្នា៖ មិនថាណាត់ជាមួយមិត្ត ឬសង្សារ វាគឺជាកន្លែងដ៏រ៉ូមែនទិកមួយ ក្នុងចំណោមកន្លែងជាច្រើនទៀត។ អ្នកអាចកៀកកើយគ្នា សើចជាមួយគ្នា បានតាមតែចិត្តចង់៕
ប្រែសម្រួល៖ ព្រំ សុវណ្ណកណ្ណិកា ប្រភព៖ topyaps
