មេដឹកនាំដែលអស្ចារ្យតែងតែមានទម្លាប់ដឹកនាំទាំង៣យ៉ាងនេះ
មេដឹកនាំដែលអស្ចារ្យតែងតែមានយុទ្ធសាស្ត្រល្អៗក្នុងការជួយបុគ្គលិកឲ្យរីកចម្រើនទៅមុខ មិនត្រឹមតែប៉ុណ្ណោះនោះទេ មេដឹកនាំល្អក៏កសាងទំនាក់ទំនងល្អជាមួយបុគ្គលិកផងដែរ។ ការធ្វើជាមេគេមិនមែនជារឿងងាយស្រួលនោះទេពីព្រោះថាអ្នកមិនមែនធ្វើការងារឲ្យតែហើយនោះទេ ប៉ុន្តែអ្នកត្រូវធ្វើការជាមួយមនុស្សទៀតផង។ យ៉ាងណាក្តី មេដឹកនាំដែលមានបទពិសោធន៍ភាគច្រើនតែងតែមានទម្លាប់ដឹកនាំទាំង៣ខាងក្រោមនេះ៖
១) ផ្តោតទៅលើការស្តាប់៖ អ្នកដឹកនាំភាគច្រើនច្រើនតែមានអំនួតលើខ្លួនឯងដោយគិតថាខ្លួនឯងដឹងច្បាស់ណាស់អំពីកូនក្រុមរបស់ខ្លួនឬដឹងពីរបៀបក្នុងការឲ្យមតិយោបល់ឬការសន្ទនាជាមួយបុគ្គលិក។ល។ ប៉ុន្តែ មេដឹកនាំដែលអស្ចារ្យនឹងព្យាយាមសួរឬស្តាប់មតិយោបល់ពីបុគ្គលិករបស់គាត់ពីព្រោះថាការធ្វើបែបនេះបង្ហាញថាគំនិតរបស់ពួកគាត់ដែលមានចំពោះក្រុមហ៊ុនត្រូវបានមេឲ្យតម្លៃហើយក៏បង្ហាញថាពួកគេក៏អាចជាផ្នែកមួយនៃភាពជោគជ័យរបស់ក្រុមហ៊ុនផងដែរ។
២) ជំរុញសក្ដានុពលរបស់បុគ្គលិក៖ ពិតប្រាកដណាស់ មេដឹកនាំតែងតែមានឥទ្ធិពលចំពោះការគិតឬទង្វើរបស់បុគ្គលិក។ ក្នុងសៀវភៅSuperbosses លោកសាស្ត្រាចារ្យ Sydney Finkelsteinបានបង្ហាញថា ការមេដឹកនាំដែលអស្ចារ្យតែងតែជំរុញបុគ្គលិកឲ្យធ្វើការលើសពីសក្ដានុពលដែលពួកគាត់គិតថាខ្លួនឯងអាចធ្វើបាន។ ម៉្យាងវិញទៀត មេដឹកនាំដែលល្អតែងតែផ្តល់មតិដើម្បីស្ថាបនាម្តងមួយៗដល់បុគ្គលិក មិនមែនរិះគន់ម្តងទាំងអស់នោះទេ ។
៣) បង្ហាញពីភាពវិជ្ជមាន៖ តាមការស្រាវជ្រាវបានបង្ហាញឲ្យឃើញថាអារម្មណ៍របស់មនុស្សគឺឆ្លងពីមួយទៅមួយ មានន័យថាប្រសិនអ្នកជាមេដឹកនាំដែលមានថាមពល ស្វាហាប់ មានការតាំងចិត្តខ្ពស់ចំពោះការងារ នោះបុគ្គលិកក៏មានភាពស្វាហាប់ ថាមពលនិងមានកម្លាំងចិត្តក្នុងការធ្វើការដូចគ្នា។ ទន្ទឹងនឹងនេះមេដឹកនាំដែលល្អចេះជំរុញនិងលើកទឹកចិត្តតាមអារម្មណ៍និងធ្វើជាគំរូល្អសម្រាប់បុគ្គលិក៕
ប្រែសម្រួល៖ អុឹង មុយយូ ប្រភព៖ inc.com
