គន្លឹះទាំងនេះនឹងជួយអ្នកធ្វើការពីរកន្លែងដោយឥតបញ្ហា
ជាការពិតណាស់ ការធ្វើការងារពីរកន្លែងពិតជាអាចជួយអ្នករកប្រាក់កម្រៃបន្ថែមឬជួយទ្រទ្រង់គ្រួសារអ្នកឲ្យល្អថែមមួយកម្រិតទៀត។ ហើយក៏មានមនុស្សមិនតិចនាក់នោះទេដែលចង់ធ្វើការពីរកន្លែង ប៉ុន្តែដោយសារតែមនុស្សភាគច្រើនមិនទាន់ចេះគ្រប់គ្រងពេលវេលាបានល្អ ទើបបណ្ដាលឲ្យពួកគាត់មិនអាចធ្វើការពីរកន្លែងបាន។ ខាងក្រោមនេះគឺជាគន្លឹះដែលជួយអ្នកបានប្រសិនជាអ្នកចង់រកការងារបន្ថែមមួយទៀត៖
១) ថៅកែទី១ដឹងឭពីការងារទី២របស់អ្នក៖ ក្រុមហ៊ុនខ្លះមិនអនុញ្ញាតឲ្យបុគ្គលិកធ្វើការពីរកន្លែងឡើយ ជាពិសេសនៅក្រុមហ៊ុនដែលមានការប្រកួតប្រជែងជាមួយនឹងក្រុមហ៊ុនដែលអ្នកធ្វើនាពេលបច្ចុប្បន្ន។ ម៉្យាងវិញទៀត ថៅកែក៏ខ្លាចប៉ះពាល់គុណភាពការងាររបស់អ្នកផងដែរ ព្រោះថាការធ្វើការងារពីរកន្លែង អ្នកអាចនឹងពិបាកក្នុងការផ្ដោតអារម្មណ៍ទៅលើការងារ។ ដូច្នេះហើយ ត្រូវសុំអនុញ្ញាតឲ្យបានច្បាស់លាស់ជៀសវាងអ្នកបោះបង់ការងារទាំងពីរកន្លែងដោយមិនដឹងខ្លួន។
២) បំបែកការងារនោះជាពីរ៖ ប្រសិនជាអ្នកទទួលបានការអនុញ្ញាតហើយនោះ អ្នកត្រូវបែកចែកការងារទាំងពីរនេះឲ្យបានច្បាស់លាស់និងដាច់ស្រេច កុំឲ្យមានការជាប់ទាក់ទងនឹងគ្នា។ ឧទាហរណថា៖ ពេលអ្នកកំពុងតែធ្វើការនៅក្រុមហ៊ុនទីមួយ អ្នកមិនគួរឆ្លៀតពេលឬយកពេលសម្រាកទៅធ្វើការងារទីពីរឡើយ។ ដូច្នេះហើយ អ្នកត្រូវចេះរៀបចំពេលវេលារវាងការងារទាំងពីរនេះឲ្យបានច្បាស់លាស់។
៣) ត្រួតពិនិត្យពេលវេលា៖ ប្រសិនអ្នកជាបុគ្គលិកពេញម៉ោងដែលធ្វើការពី៨ព្រឹកដល់៥ល្ងាចហើយ ការបន្ថែមការងារមួយទៀតពិតជាការលំបាកមួយព្រោះថាអ្នកមិនត្រឹមតែហត់នោះទេ ថែមទាំងត្រូវពូកែក្នុងការលៃលកពេលវេលាសម្រាប់ការងារទីពីរទៀតផង។ អ៊ីចឹងហើយ អ្នកត្រូវតែមានវិន័យលើខ្លួនឯងយ៉ាងតឹងរឹុងទើបវាមិនមានផលប៉ះពាល់រវាងការងារទាំងពីរ។
៤) ស្វែងរកការងារដែលអ្នកអាចធ្វើពីផ្ទះ៖ ការងារក្រៅម៉ោងខ្លះអាចធ្វើពីផ្ទះបាន នេះមានន័យថាអ្នកអាចសន្សំពេលវេលាជាច្រើនដោយមិនចាំបាច់ធ្វើដំណើរពីកន្លែងមួយទៅកន្លែងមួយទៀត។ បន្ថែមពីលើនេះទៅទៀត អ្នកអាចធ្វើការពេលណាក៏បានតាមដែលអ្នកចង់ ដែលមានភាពងាយស្រួលក្នុងការរៀបចំពេលវេលាឬកាលវិភាគសម្រាប់ការងារទីពីរនេះដោយខ្លួនអ្នក៕
ប្រែសម្រួល៖ អុឹង មុយយូ ប្រភព៖ monster.com
