ហេតុផលសំខាន់ៗ ៤យ៉ាង ដែលអ្នកមិនគួរចាប់ផ្ដើមរកស៊ីជាមួយនឹងសាច់ញាតិរបស់ខ្លួនឯង
ក្នុងពិភពជំនួញ ការចាប់ផ្តើមជំនួញថ្មីថ្មោងមិនមែនជារឿងងាយស្រួលនោះទេ។ ជាការពិតមិនអាចប្រកែកបាននោះទេ ការមានដៃគូជំនួញវាល្អជាងចាប់ផ្តើមជំនួញដោយខ្លួនឯងដោយសារតែអ្នកនឹងទទួលបានគំនិតច្រើនជាងមុន ដើមទុនច្រើនជាងមុននិងមានឱកាសក្នុងការពិភាក្សាឬសិក្សាពីគ្នា។ តែទោះបីជាយ៉ាងណាក៏ដោយ អ្នកមិនគួរចាប់ផ្តើមជំនួញជាមួយសាច់ញាតិជាដាច់ខាត។ ខាងក្រោមនេះជាហេតុផល៖
១) មិនចុះសម្រុងគ្នា៖ បើទោះបីជាអ្នកធំដឹងក្តីជាមួយគ្នា ស្គាល់គ្នាយូរឆ្នាំឬស្និទ្ធស្នាលជាមួយសាច់ញាតិបងប្អូនរបស់អ្នកយ៉ាងណាក៏ដោយ នោះមិនមែនន័យថាពួកគេអាចក្លាយជាដៃគូជំនួញដ៏ល្អរបស់អ្នកនោះទេ។ អ្នកត្រូវបែកចែកឲ្យច្បាស់រវាងចុះសម្រុងបែបជីវិតប្រចាំថ្ងៃនិងចុះសម្រុងក្នុងការងារឬជំនួញជាដើម។
២) ហេតុផលខុសគ្នា គោលដៅខុសគ្នា៖ ជាដំបូង ហេតុអ្វីបានជាអ្នកចង់ចាប់ផ្តើមជំនួញមួយនេះដោយសារតែវាជាក្តីសុបិនរបស់អ្នកឬយ៉ាងណា? ហើយហេតុអ្វីបានជាសាច់ញាតិរបស់អ្នកចង់ចូលរួមភាគហ៊ុនជាមួយនឹងអ្នកដែរ? ដោយសារតែចម្លើយអាចមានភាពខុសគ្នា ដែលអាចធ្វើឲ្យគោលដៅ ការរំពឹងទុកឬមហិច្ឆតាខុសគ្នារវាងអ្នកនិងសាច់ញាតិរបស់អ្នកខុសគ្នាដែរ។ បើមិនបែងចែកច្បាស់លាស់ទេ ជម្លោះនឹងកើតមានឡើងជាពុំខាន។ អាក្រក់ជាងនេះទៅទៀតគឺអ្នកទាំងពីរពិបាកមើលមុខគ្នាទៅថ្ងៃក្រោយ។ ការចាប់ផ្តើមដំបូង ម្នាក់ៗមិនសូវគិតនោះទេ ព្រោះអាងថា សាច់ញាតិ ប៉ុន្តែនៅពេលជួបបញ្ហាកើតឡើង ម្នាក់ៗប្រាកដជា មិននៅស្ងៀមទៀតឡើយ ហើយអាចនឹងចាប់ចែកផ្លូវគ្នាក្នុងពេលរកស៊ី។ ម្យ៉ាងវិញទៀត បើទោះបីជាជោគជ័យក៏ដោយ ក៏ម្នាក់ៗអាចនឹងបង្ហាញ់ពីគំនិតរបស់ខ្លួនឯងយ៉ាងច្បាស់ៗ ព្រោះអាងតែថា ជាសាច់ញាតិ ដោយមិននិយាយលើតួនាទីរបស់ខ្លួនឡើយ។
៣) បញ្ហាក្នុងជំនួញក្លាយជាបញ្ហាផ្ទាល់ខ្លួន៖ បញ្ហាឬឧបសគ្គតែងតែកើតមានហើយ វាគឺជារឿងដែលជៀសមិនផុតឡើយក្នុងជំនួញ។ ឧបមាថា ថ្ងៃនេះក្នុងជំនួញមានបញ្ហាកើតឡើយ ដៃគូជំនួញសាច់ញាតិរបស់អ្នកធ្វើឲ្យបាត់បង់លុយអស់១០០០ដុល្លារជាដើម។ បញ្ហាដែលទាក់ទងនឹងលុយកាក់គឺពិបាកដោះស្រាយខ្លាំងណាស់ព្រោះថាអ្នកអាចមានអារម្មណ៍សាច់ញាតិរបស់អ្នកលួចលុយឬអ្នកពិបាកក្នុងការបើកមាត់ឲ្យចេញលុយសងវិញជាដើម។ល។ ដូច្នេះហើយ បញ្ហានៅក្នុងជំនួញនឹងក្លាយជាបញ្ហាផ្ទាល់ខ្លួនឬដល់គ្រួសារថែមទៀតផង។
៤) បញ្ហាផ្ទាល់ខ្លួន រាលដាលដល់កិច្ចការជំនួញ៖ ពេលខ្លះនៅក្នុងគ្រួសារ អាចថា មានបញ្ហាខ្លះៗ ជាធម្មតាតែងកើតឡើងមិនអាចជៀសបាន។ ប៉ុន្តែបញ្ហានេះ អាចនាំឲ្យមានផលប៉ះពាល់ក្នុងការធ្វើជំនួញ ព្រោះទំនាស់គ្នាក្នុងគ្រួសារ អាចនឹងត្រូវបានភាគីនីមួយៗយកភាពក្តៅក្រហាយទាំងនោះ ទៅបញ្ចេញនៅកន្លែងធ្វើការ៕
ប្រែសម្រួល៖ អុឹង មុយយូ ប្រភព៖ saveup.com
