អ្វីជាមូលហេតុដែលនៅពីក្រោយគម្រោងចំណាយ៩០០ពាន់លានដុល្លាររបស់ចិនទៅលើគម្រោងខ្សែក្រវាត់មួយនិងផ្លូវមួយ ?
អស់រយៈពេលជាង២សហស្សវត្សមកហើយ ផ្លូវដឹកជញ្ជូនទំនិញដ៏ធំមួយដែលបានភ្ជាប់ភាគខាងកើតនិងខាងលិច ជាអ្វីដែលមនុស្សសម័យបច្ចុប្បន្នស្គាល់ថា ផ្លូវក្រណាត់សូត្រ ឬ The Silk Road ដែលត្រូវបានហៅតាមអ្នកភូគព្ភវិទូអាល្លឺម៉ង់នៅសតវត្សទី១៩ Baron Ferdinand von Richthofen ផ្អែកទៅតាមប្រវត្តិសាស្ត្រនៃក្រណាត់សូត្ររបស់ចិន ដែលជាទំនិញដ៏សំខាន់និងល្បីល្បាញបំផុតនៅក្នុងសម័យរាជវង្សចិនបុរាណនេះ បានផ្សារភ្ជាប់ភាពខុសគ្នារបស់មនុស្សរស់នៅតាមទីតំបន់ផ្សេងៗពីគ្នាទូទាំងពិភពលោកឲ្យរួបរួមមកជាមនុស្សរបស់សហគមន៍តែមួយ តាមរយៈការផ្លាស់ប្ដូរចែករំលែកគ្នានូវទំនិញ ជំនាញ និងវប្បធម៌។
កាលពីខែកញ្ញា២០១៦ ប្រធានាធិបតីមហាអំណាចចិន លោក ស៊ី ជីនពីង បានកែប្រែទស្សនពិភពលោកជាមួយនឹងការមើលឃើញដ៏មានសក្ដានុពលខ្ពស់មួយចំពោះផ្លូវក្រណាត់សូត្រ ដោយបានលើកឡើងគំនិតផ្ដួចផ្ដើមរបស់ខ្លួន ដែលត្រូវបានគេឲ្យឈ្មោះថា "ខ្សែក្រវាត់មួយ ផ្លូវមួយ" ឬ "One Belt, One road"។ ខ្សែក្រវាត់មួយគឺសំដៅទៅលើផ្លូវដឹកជញ្ជូនទំនិញតាមផ្លូវគោក ដែលផ្សារភ្ជាប់ចិនទៅអឺរ៉ុប ដោយឆ្លងកាត់តាមអាស៊ីកណ្ដាល និងមជ្ឈិមបូព៌ា។ រីឯផ្លូវមួយគឺសំដៅទៅលើផ្លូវដឹកជញ្ជូនទំនិញតាមផ្លូវទឹក ដែលផ្សារភ្ជាប់ឆ្នេរសមុទ្រចិនខាងកើតទៅអាហ្វ្រិកខាងកើតនិងសមុទ្រមេឌីទែរ៉ាណេ។ គោលបំណងដ៏សំខាន់របស់លោក ស៊ី ជីនពីងចំពោះគម្រោងខ្សែក្រវាត់មួយនិងផ្លូវមួយនេះ គឺនៅក្នុងគោលដៅបង្កើនទំនាក់ទំនងដោះដូរពាណិជ្ជកម្មនៅទូទាំងពិភពលោកឲ្យកាន់តែល្អប្រសើរ។
ប៉ុន្តែកាលពីពេលថ្មីៗនេះ មហាអំណាចចិនបានលើកឡើងជាមួយនឹងផែនការចំណាយទៅលើដំណើរការណ៍គម្រោងដ៏មានមហិច្ឆតាមួយនេះ ដែលមានចំនួនរហូតដល់ទៅ៩០០ពាន់លានដុល្លារ ហើយចិនគ្រោងនឹងចំណាយ១៥០ពាន់លានដុល្លារជារៀងរាល់ឆ្នាំដើម្បីជំរុញឲ្យគម្រោងនេះដំណើរការណ៍ទៅមុខបានរលូនតាមការរំពឹងទុក។ ប៉ុន្តែ ហេតុអ្វីបានជាមហាអំណាចចិនជះលុយច្រើនយ៉ាងនេះ ដើម្បីដំណើរការណ៍គម្រោងនេះ ? តើអ្វីខ្លះជាគោលបំណងរបស់ចិនក្នុងគម្រោងដែលនឹងអាចផ្លាស់ប្ដូរប្រវត្តិសាស្ត្រសេដ្ឋកិច្ចនាសតវត្សទី២១នេះ ? ចិនមានគោលបំណងបើកចំហនិងបង្កើតទីផ្សារថ្មីសម្រាប់ទំនិញនិងបច្ចេកវិទ្យារបស់ពួកគេក្នុងពេលតែមួយ ស្របពេលដែលកំណើនសេដ្ឋកិច្ចពិភពលោកកំពុងតែស្ថិតក្នុងភាពយឺតយ៉ាវ និងអាចជួយជំរុញសេដ្ឋកិច្ចនៅតំបន់មិនសូវអភិវឌ្ឍរបស់ចិន ដូចជាខេត្ត Xinjiang ដោយផ្សារភ្ជាប់ទៅនឹងបណ្ដាប្រទេសជិតខាង។ ម្យ៉ាងទៀត ឧស្សាហកម្មរបស់ពួកគេមានដូចជាឧស្សាហកម្មផលិតដែកនិងស៊ីម៉ង់ នឹងទទួលបានប្រយោជន៍យ៉ាងច្រើនពីគម្រោងដ៏ធំមួយនេះ រួមទាំងទីផ្សារក្នុងស្រុកដូចជាការដឹកជញ្ជូននិងប្រព័ន្ធទូរគមនាគមន៍។ ទោះជាយ៉ាងណាក៏ដោយ មានការយល់ឃើញជាច្រើនយល់ថា គោលបំណងរបស់ចិនក្នុងគម្រោងខ្សែក្រវាត់មួយនិងផ្លូវមួយ មានជាប់ពាក់ព័ន្ធនឹងភូមិសាស្ត្រនយោបាយ ស្របពេលដែលមហាអំណាចអាមេរិកបច្ចុប្បន្នដឹកនាំដោយ លោក ដូណាល់ ត្រាំ បានចាប់ផ្ដើមដកជើងឈានចេញពីចំណងសហការពាណិជ្ជកម្មជាមួយអាស៊ីបន្តិចម្ដងៗ។ ដូច្នេះ ការសាងសង់ផ្លូវដឹកជញ្ជូនទំនិញដ៏ធំមួយនេះ អាចរុញសេដ្ឋកិច្ចចិនឲ្យក្លាយជាមហាអំណាចសេដ្ឋកិច្ចដ៏មានឥទ្ធិពលបំផុតមួយប្រចាំតំបន់៕
ប្រែសម្រួល៖ស្រីពៅ ប្រភព៖ weforum & theguardian
