ចំណុច៣យ៉ាងដែលអ្នកជំនួញជោគជ័យត្រូវតែមាន
តើអ្នកធ្លាប់មានក្តីសុបិនចង់ក្លាយជាអ្នកជំនួញដែរឬទេ? ការធ្វើជាថៅកែគេមិនមែនជារឿងងាយស្រួលនោះទេព្រោះអ្នកត្រូវគិតច្រើន ធ្វើការងារច្រើនជាងគេនិងគ្រប់គ្រងជំនួញទាំងមូល។ បើទោះបីជាអ្នកជំនួញមានតិចនិចខុសគ្នាក្នុងការគ្រប់គ្រងជំនួញយ៉ាងណាក្តី អ្នកជំនួញជោគជ័យជាច្រើនមានចំណុចរួមទាំងនេះ។ អ៊ីចឹងហើយ ប្រសិនជាអ្នកចង់ក្លាយជាអ្នកជំនួញជោគជ័យម្នាក់ អ្នកគួរតែអភិវឌ្ឍន៍ខ្លួនឯងឲ្យមាននូវចំណុចខាងក្រោមនេះ៖
១) ភាពអត់ធ្មត់៖ អ្នកជំនួញខ្លះចង់បានលទ្ធផលភ្លាមៗនៅចំពោះមុខតែម្តងដោយខ្វះភាពអត់ធ្មត់ ពួកគាត់ប្រញាប់ធ្វើការសម្រេចចិត្តដោយពុំបានគិតបានវែងឆ្ងាយ ដែលធ្វើឲ្យជំនួញរបស់គាត់មានហានិភ័យទៅវិញ។ បើទោះបីជាអ្នកចង់ជោគជ័យក្នុងរយៈពេលខ្លីក៏ពិតមែន តែភាពជោគជ័យមិនអាចកើតឡើងមួយយប់ឬមួយខែនោះទេ។ ដូច្នេះហើយអ្នកគួរតែផ្តោតអារម្មណ៍ទៅលើការងារនិងគោលដៅ មិនយូរមិនឆាប់នោះទេ អ្នកនឹងជោគជ័យ។
២) ខិតខំជានិច្ច៖ អ្នកជំនួញខ្លះគិតថាឲ្យតែជំនួញរបស់ពួកគេឈរនៅលើទីផ្សារហើយប្រាកដជាមិនរលំនោះទេ។ ដោយសារតែហេតុផលនេះហើយទើបបានជាអ្នកជំនួញជាច្រើនបន្ធូរដៃមិនសូវខំប្រឹងដូចកាលដែលគាត់កកើតជំនួញរបស់គាត់ដំបូង។ ចូរអ្នកចងចាំថាក្រុមហ៊ុនរបស់អ្នកអាចរលំគ្រប់ពេលប្រសិនជាអ្នកលែងខំប្រឹង។ ដូច្នេះហើយ អ្នកត្រូវតែបន្តការខំប្រឹង ពង្រីកជំនួញរបស់អ្នកឲ្យកាន់តែធំទៅៗនិងបន្តដំណើរទៅមុខជានិច្ច។
៣) យកចិត្តទុកដាក់គ្រប់ចំណុច៖ អ្នកជំនួញជាច្រើនយល់ខុសថាប្រសិនជាអ្នកផ្តោតទៅលើបញ្ហាដែលក្រុមហ៊ុនមានហើយដោះស្រាយវាឲ្យបានល្អ នោះក្រុមហ៊ុនពិតជាជោគជ័យ។ ធាតុពិតមិនមែនបែបនេះនោះទេ។ អ្នកជំនួញដែលពូកែត្រូវចេះដោះស្រាយបញ្ហា ពង្រឹងសមត្ថភាពបុគ្គលិក ចេះគ្រប់គ្រងថវិកាចំណូលចំណាយក្នុងក្រុមហ៊ុននិងសិក្សាជំនាញបន្ថែម ដើម្បីពង្រឹងជំនួញរបស់ពួកគេ៕
ប្រែសម្រួល៖ អុឹង មុយយូ ប្រភព៖ entrepreneur.com
