តើពិតទេ ដោយសារហេតុផលទាំងនេះទើបមនុស្សម្នាក់ៗសុខចិត្តទ្រាំនឹងស្នេហាបោកប្រាស់?
អ្នកប្រហែលជាធ្លាប់ដឹងថា ស្នេហាមួយគឺពោរពេញដោយការបោកប្រាស់ តែហេតុអ្វីពួកគេនៅតែទ្រាំរស់នៅជាមួយគ្នាបានយូរម្ល៉េះ? នេះគឺមកពីហេតុផលសំខាន់ខ្លះៗ ដែលអ្នកមិនបានដឹង។ ក្នុងនោះមាន៖
១) ស្រឡាញ់ខ្លួនឯងតិចពេក៖ ពេលណាដែលបុគ្គលម្នាក់មិនសូវស្រឡាញ់ខ្លួនឯង ពួកគេនឹងមិនអាចចាកចេញពីស្នេហាណាដែលធ្វើឲ្យគេឈឺចាប់បានទេ។ តែបើបុគ្គលនោះស្រឡាញ់ ហើយផ្ដល់តម្លៃឲ្យខ្លួនឯងខ្លាំងវិញ គ្រាន់តែកំហុសតិចតួច ពួកគេសុំបែកបាត់ទៅហើយដោយមិនចាំយូរឡើយ។
២) ខ្លាចការនៅម្នាក់ឯង៖ បុគ្គលណាដែលខ្លាច និងមិនចង់នៅម្នាក់ឯង ភាគច្រើនពួកគេស៊ូទ្រាំនៅក្នុងស្នេហាដែលឈឺផ្សា។ សម្រាប់ពួកគេ គឺឲ្យតែបាននៅជាមួយដៃគូស្នេហា ក៏ពួកគេសុខចិត្ត ទោះបីកាលៈទេសៈគឺលំបាកយ៉ាងណាក្ដី។
៣) ពួកគេជឿថាដៃគូស្នេហានឹងផ្លាស់ប្ដូរសម្រាប់គេ៖ មនុស្សជាច្រើនសុខចិត្តទ្រាំនៅក្នុងស្នេហាក្បត់ គឺដោយសារពួកគេជឿជាក់ថា ដៃគូស្នេហានោះនឹងកែ។ តែតាមពិតទៅ គឺគ្មានហេតុផលណា ដែលអ្នកគួរចំណាយជីវិតយ៉ាងច្រើន ដើម្បីរង់ចាំការផ្លាស់ប្ដូររបស់នរណាម្នាក់នោះទេ។
៤) ពួកគេមានកូនជាចំណង៖ ដៃគូស្នេហាខ្លះចាប់ផ្ដើមប្រែប្រួល ពេលដែលពួកគេមានកូន។ ហើយវាពិបាកណាស់ សម្រាប់ការចែកផ្លូវគ្នា ពេលដែលកូនៗ នៅទល់នឹងមុខអ្នក។ ហេតុដូចនេះ វាគ្មានជម្រើសអ្វីផ្សេង ក្រៅពីនៅទ្រាំគ្រាំគ្រាជាមួយស្នេហា ឈឺចាប់នោះទេ៕
ប្រែសម្រួល៖ ព្រំ សុវណ្ណកណ្ណិកា ប្រភព៖ powerofpositivity
