ជា​មជ្ឈមណ្ឌល​ដ៏​តូច​មួយ​សម្រាប់​ឧស្សាហកម្ម​បច្ចេកវិទ្យា​ទំនើប ដែល​បាន​ផ្លាស់ប្ដូរ​ប្រវត្តិសាស្ត្រ​មនុស្សជាតិ​ចាប់​តាំង​ពី​ពាក់​កណ្ដាល​សតវត្ស​ទី​២០ បាន​ប្រែក្លាយ​ពី​តំបន់​ដែល​ធ្លាប់​តែ​ល្បី​ឈ្មោះ​ចំពោះ​ការ​នាំ​ចេញ​ផ្លែ​មាក់ប្រាង​ដ៏​ច្រើន​ជាង​គេ​បំផុត​មួយ រហូត​បាន​ក្លាយ​ជា​ផ្ទះ​កំណើត​របស់​ក្រុមហ៊ុន​បច្ចេកវិទ្យា​ពិភពលោក​ដូចជា Apple, Google, Tesla, Microsoft និង Facebook ជាដើម ជា​តំបន់​មួយ​ដែល​ត្រូវ​បាន​គេ​ស្គាល់​ថា Silicon Valley ដែល​ស្ថិត​នៅ​ក្នុង​រដ្ឋ​កាលីហ្វ័រញ៉ា សហរដ្ឋអាមេរិក ហើយ​ក៏​ជា​ទីតាំង​មួយ​ដែល​មហាវិទ្យាល័យ​ដ៏​មាន​កិត្យានុភាព​បំផុត​មួយ​របស់​អាមេរិក​ដែល​ជា Stanford University ស្ថិតនៅ​ផង​ដែរ។ ឥឡូវ​នេះ មជ្ឈមណ្ឌល​ឧស្សាហកម្ម​បច្ចេកវិទ្យា​ដែល​អ្នក​ស្គាល់​នេះ​បង្កើត​ចំណូល​របស់​ខ្លួន​ក្បែរ​នឹង​៣​ពាន់​ពាន់​លាន​ដុល្លារ​ទៅ​ហើយ។ តើ​ប្រវត្តិសាស្ត្រ​របស់​តំបន់​មួយ​ដែល​ធ្លាប់តែ​មាន​ឈ្មោះ​ជា​ចម្ការ​ដាំដុះ​និង​នាំ​ចេញ​ផ្លែ​មាក់ប្រាង អាច​ប្រែ​ក្លាយ​ជា​កន្លែង​ដែល​ប្រមូល​ផ្ដុំ​ទៅ​ដោយ​អ្នក​មាន​ទេពកោសល្យ​និង​ពោរពេញ​ដោយ​គំនិត​ច្នៃប្រឌិត​ផ្លាស់ប្ដូរ​មុខមាត់​ថ្មី​របស់​ពិភពលោក​នេះ​យ៉ាង​ដូចម្ដេច​បាន ? ដំណើរ​រឿង​ចាប់ផ្ដើម​ក្នុង​អំឡុង​ពាក់​កណ្ដាល​ទសវត្ស​ឆ្នាំ​១៨០០ ដែល​កំពង់ផែ​យោធា​របស់​ទីក្រុង​សាន់ហ្វ្រាន់ស៊ីស្កូ​បាន​ជំរុញ​ឲ្យ​មាន​ការ​កកើត​ឡើង​នូវ​ឧស្សាហកម្ម​ទូរលេខ​និង​វិទ្យុ​សម្រាប់​ការ​ប្រាស្រ័យ​ទាក់ទង​គ្នា​របស់​យោធា។ នៅ​ក្នុង​ឆ្នាំ​១៩០៩ លោក Charles Doc Herrold បាន​បង្កើត​ស្ថានីយ​វិទ្យុ​ដ៏​ដំបូង​បំផុត​របស់​អាមេរិក នៅ​ឯ​ទីក្រុង San Jose នៃ​រដ្ឋ​កាលីហ្វ័រញ៉ា។ នៅ​ពេល​កងទ័ព​ទាហាន​ជើង​ទឹក​របស់​អាមេរិក​បាន​ទិញ​យក​តំបន់ Moffett Field នៅ​ឆ្នាំ​១៩៣៣ សម្រាប់​ជា​ចំណត​ឧទ្ធម្ភាគចក្រ The USS Macon តំបន់​មួយ​នេះ​ក៏​បាន​ជំរុញ​ឲ្យ​មាន​ការ​ចាប់​កំណើត​ឡើង​នូវ​ឧស្សាហកម្ម​ផលិត​ឧទ្ធម្ភាគចក្រ និង​ទាក់ទាញ​អ្នក​វិទ្យាសាស្ត្រ​និង​អ្នក​ស្រាវជ្រាវ​ឲ្យ​មក​បំពេញ​កិច្ចការ​ស្រាវជ្រាវ​របស់​ពួកគេ​ផង​ដែរ។ ឆ្នាំ​១៩៣៩ មជ្ឈមណ្ឌល​ស្រាវជ្រាវ​របស់Ames (Ames Research Center) ត្រូវ​បាន​បង្កើត​ឡើង​ក្នុង​គោលដៅ​បម្រើ​ការ​ជា​ទីពិសោធន៍​សម្រាប់​គណៈកម្មាធិការ​ជាតិ​ប្រឹក្សា​យោបល់​របស់​អវកាស (National Advisory Committee for Aeronautics) ហើយ​មក​ទល់​បច្ចុប្បន្ន​នេះ​វា​បាន​ក្លាយ​ជា​កន្លែង​មួយ​ដែល​ទទួល​ខុសត្រូវ​ទៅលើ​កិច្ចការ​វិទ្យាសាស្ត្រ​កុំព្យូទ័រ​ជាច្រើន​របស់​អង្គការ​អវកាសNASA។ ក្នុង​ឆ្នាំ​ដដែល​នេះ ក្រុមហ៊ុន​កុំព្យូទ័រ​ដ៏​ល្បីឈ្មោះ​HP ដែល​អាច​ជា​ផលិតផល​កុំព្យូទ័រ​ដែល​អ្នក​កំពុង​តែ​ប្រើប្រាស់​នេះ ត្រូវ​បាន​បង្កើត​ឡើង ជាមួយ​នឹង​ឈ្មោះHPនេះ​មក​ពី​ស្ថាបនិក​ពីរ​រូប គឺ​លោក William Hewlett និង​លោក Dave Packard។ បើ​ទោះ​ជា​ឥឡូវ​នេះ​HP​ជា​ក្រុមហ៊ុន​កុំព្យូទ័រ​ក៏​ពិត​មែន ប៉ុន្តែ​គោលដៅ​របស់​ពួកគេ​ដំបូង​ឡើយ​គឺជា​ការ​បង្កើត​អេក្រង់ ហើយ​ប្ដូរ​ទៅ​រក​ការ​ផលិត​បច្ចេកវិទ្យា​រ៉ាដា​និង​កាំភ្លើង​ធំ នៅ​អំឡុង​សង្គ្រាម​លោក​លើក​ទី២ ដែល​នៅ​រាល់​ពេល​គេ​និយាយ​ពី​កុំព្យូទ័រ គេ​តែង​សំដៅ​លើ​ម៉ាស៊ីន​ដែល​មាន​ទំហំ​ប៉ុន​បន្ទប់​នេះ​ឯង។ ប្រវត្តិសាស្ត្រ​របស់​ចម្ការ​មាក់ប្រាង​ផ្លាស់ប្ដូរ​ជា​មជ្ឈមណ្ឌល​បច្ចេកវិទ្យា​ល្បីល្បាញ​ចំពោះ​ការ​ផលិត​ស៊ីលីស្យូម (silicon) ដែល​ឈ្មោះ Silicon Valley នេះ​បង្ហាញ​មុខ​ដំបូង​នៅ​លើ​ទំព័រ​សារព័ត៌មាន​ប្រចាំ​តំបន់​មួយ​របស់​អាមេរិក​នៅ​ឆ្នាំ​១៩៧១ ដែល​ស៊ីលីស្យូម​គឺ​ជា​វត្ថុ​ធាតុ​ដើម​ដែល​ជា​មូលដ្ឋាន​គ្រឹះ​សម្រាប់​ផលិតsemiconductor ដែល​ជា​ឧបករណ៍​ដ៏​តូច​មួយ​ប្រើប្រាស់​ក្នុង​ឧបករណ៍​អេឡិចត្រូនិក សម្រាប់​ឲ្យ​ចរន្ត​អគ្គិសនី​និង​កម្ដៅ​ឆ្លងកាត់​វា​បាន បាន​ចាប់ផ្ដើម​ជាមួយ​នឹង​អ្នក​វិទ្យាសាស្ត្រ​សញ្ជាតិ​អង់គ្លេស​និង​ជា​ម្ចាស់​ពានរង្វាន់​ណូបែល លោក William Shockley ជាមួយ​នឹង​ការ​បង្កើត​ត្រង់ស៊ីស្ទ័រ (transistor) អំឡុង​ទសវត្ស​ឆ្នាំ​១៩៤០ ក្នុង​បន្ទប់​ពិសោធន៍ Bell Laboratories។ ប៉ុន្តែ​ក្នុង​ឆ្នាំ​១៩៥៥ លោក​ក៏​បាន​បំបែក​ខ្លួន​ចេញ​ហើយ​ងាក​មក​បង្កើត​ក្រុមហ៊ុន​ផលិតsemiconductorរបស់​ខ្លួន ដែល​មាន​ឈ្មោះ​ថា Shockley Semiconductor Laboratories និង​បាន​ជួល​សិស្ស​ទើប​បញ្ចប់​ការ​សិក្សា​ពី Stanford University ជាច្រើន​មក​រួម​ការងារ​ជាមួយ។ [caption id="attachment_42662" align="aligncenter" width="600"] www.investopedia.com[/caption] ឆ្នាំ​១៩៥៧ ក្នុង​ចំណោម​បុគ្គលិក​ទាំងអស់ បុគ្គលិក​៨​នាក់​បាន​ចាកចេញ​ពី​ក្រុមហ៊ុន​របស់​លោក និង​ទៅ​ចាប់ដៃ​សហការ​ជាមួយ​សហគ្រិន Sherman Fairchild ដើម្បី​បង្កើត​ក្រុមហ៊ុន Fairchild Semiconductor ហើយ​ពួកគេ​ត្រូវ​បាន​លើក​សរសើរ​ជាមួយ​នឹង​ស្នាដៃ​កុំព្យូទ័រ​ដែល​មាន​ទំហំ​តូច​ជាង​មុន ដំណើរការណ៍​លឿន​ជាង​មុន និង​មាន​តម្លៃ​ថោក​ជាង​មុន។ ក៏​ជា​សមត្ថភាព​ដ៏​មាន​ទេពកោសល្យ​របស់​ពួកគេ​នេះ​ដែរ ដែល​បាន​ជួយ​អង្គការ​អវកាសNASAក្នុង​ឧបករណ៍​កុំព្យូទ័រ​សម្រាប់​គម្រោង​ដ៏​ជោគជ័យ​របស់​ពួកគេ​ក្នុង​ការ​បញ្ជូន​មនុស្ស​ទៅ​កាន់​ឋាន​ព្រះចន្ទ​ដំបូង​បង្អស់។ បុគ្គលិក​ទាំង​៨​នាក់​នេះ​បាន​ចូលរួម​បង្កើត​ការងារ​ជាច្រើន​ក្នុង Silicon Valley ដែល​ក្នុង​នោះ​មាន​លោក Robert Noyce លោក Gordon Moore និង​លោក Andrew Grove បាន​ចាកចេញ​ពី​ក្រុមហ៊ុន Fairchild Semiconductor និង​បង្កើត​ក្រុមហ៊ុន Intel ក្នុង​ឆ្នាំ​១៩៦៨។ មិន​យូរ​ប៉ុន្មាន​ក្រុមហ៊ុន​បច្ចេកវិទ្យា​កំពូលៗ​បាន​រីក​ដុះដាល​ជា​បន្តបន្ទាប់​ក្នុង​អំឡុង​ទសវត្ស​ឆ្នាំ​១៩៨០ ដូចជា National Semiconductor, Apple Computer, Atari, LSI Logic និង Cypress Semiconductor សុទ្ធតែ​មាន​កំណើត​នៅ​តំបន់ Silicon Valley ទាំងអស់ ហើយ​ចាប់​ពី​ពេល​នោះ​មក​វា​ក៏​ត្រូវ​បាន​គេ​ទទួល​ស្គាល់​ទូលំទូលាយ​ជា​ឈ្មោះ​នៃ​មជ្ឈមណ្ឌល​មួយ​សម្រាប់​ឧស្សាហកម្ម​កុំព្យូទ័រ។ ក្នុង​ទសវត្ស​ឆ្នាំ​១៩៩០ យើង​ក៏​ឃើញ​មាន eBay, Yahoo, PayPal និង​Google ហើយ​ទសវត្ស​បន្ទាប់​ក៏​មាន​ការ​ចូលរួម​ពី​បណ្ដាញ​សង្គម​យក្ស Facebook, Twitter, Uber និង Tesla៕ ដោយ៖ ស្រីពៅ