មើលឲ្យហើយទៅ ចរិតអ្នកចង់ដោះដៃពីស្នេហា តែងបង្ហាញអាកប្បកិរិយាបែបនេះ
គ្មានស្នេហាឯណាដែលងាយនឹងអមតទេ ។ កាលពីស្រឡាញ់គ្នាដំបូង គឺផ្អែមរលួយគ្មានអ្នកណាគិតដល់ទេ តែបើចិត្តចង់ដោះដៃវិញ វាប្លែកសឹងនឹកស្មានមិនដល់។ ទាំងនេះគឺជាអាកប្បកិរិយាបង្ហាញថាមនុស្សនោះចង់ដោះដៃពីអ្នកបណ្ដើរៗហើយ៖
១) គេចចេញមិនសូវចង់ជួប៖ បើមនុស្សនៅមានចិត្តស្រឡាញ់ ពួកគេនឹងមានអារម្មណ៍ថា នឹក ហើយនឹងស្វែងរកពេលវេលាដើម្បីណាត់អ្នកដើរលេង។ តែបើសុខៗ ស្រាប់តែគេចវេះ មិនលើកទូរស័ព្ទ មិនបបួលដើរលេង ឬទៅក្រៅជាមួយគ្នា។ តើវាមិនមកពីការអស់ចិត្តស្នេហ៍ទេមែនទេ?
២) កាចខុសពីមុន៖ ពីមនុស្សដែលធ្លាប់តែចាំទ្រអ្នក តែបែរជាក្រអឺតក្រទម សម្ដីធ្ងន់ៗ ហើយប្លែកខុសធម្មតា។ នេះគឺជាសញ្ញាបង្ហាញថា គេលែងសូវស្រឡាញ់អ្នកហើយ។ មិនយូរទេបើអ្នកទ្រាំមិនបាន អ្នកទាំង២អាចឈ្លោះគ្នា ហើយពេលនេះហើយដែលអ្នកចាប់ផ្ដើមបែកបាក់នោះ។
៣) លែងចង់និយាយពីរឿងអនាគតជាមួយអ្នក៖ មនុស្សបើថានៅស្រឡាញ់អ្នក គេតែងសម្លឹងមើលរឿងអនាគតជាមួយគ្នា។ មិនត្រឹមតែប៉ុណ្ណោះ រាល់សកម្មភាពទាំងឡាយគឺគេធ្វើឡើងដោយគិតពីពេលអនាគត។ តែបើរាល់ថ្ងៃគេធ្វើអ្វីក៏ដោយគេគិតតែពីបច្ចុប្បន្ន នេះបញ្ជាក់ថាគេគ្មានគោលបំណងចង់នៅជាមួយអ្នកបានយូរទេ។
៤) កុហកច្រើនដើម្បីចេញពីអ្នក៖ ការកុហកនេះជាដើមចមនៃការបែកបាក់ដែរ។ ហេតុអ្វីចាំបាច់កុហក? តើមានរឿងច្រើនដែរត្រូវលាក់លៀមគ្នាមែនទេ? បើដឹងថាគេកុហកអ្នកគ្រប់ពេលនោះ អ្នកត្រូវចេះសួរនាំថាមកពីអ្វី? ឬមួយលែងចង់នៅជាមួយគ្នាហើយ?
ប្រែសម្រួល៖ ព្រំ សុវណ្ណកណ្ណិកា ប្រភព៖ powerofpositivity
