អ្នកចិត្តវិទ្យា បង្ហាញពីវិធី«ធ្វើចិត្តឲ្យត្រជាក់ចិត្តបែបអ្នកឆ្លាត» ពេលមានជម្លោះកើតឡើង
ខឹងខុសខឹងខាត ហើយបើពេលខឹង អ្នកមិនចេះទប់អារម្មណ៍ហើយនោះ អ្នកនឹងខាតបង់កាន់តែធ្ងន់។ តាមធម៌ព្រះពុទ្ធ បង្រៀនថា «ពៀរ រំងាប់ដោយការមិនចងពារ»។ តែភាគច្រើនមនុស្សលោកគឺពិបាកណាស់ ក្នុងការធ្វើអារម្មណ៍មិនចងពៀរនេះ។ តែអត្ថបទខាងក្រោមនឹងបង្ហាញអ្នកពីវិធីខ្លះៗ នាំឲ្យចិត្តត្រជាក់ ដើម្បីរំលត់ភ្លើងកំហឹង៖
១) ដកដង្ហើមឲ្យមួយៗ ៖ ដកដង្ហើមមួយៗ គឺជាវិធីសាស្ត្រធ្វើឲ្យចិត្តបានស្ងប់ រីឯអ័រម៉ូនស្មុគស្មាញដែលនាំឲ្យអ្នកខឹង ក៏ឆាប់បាត់បង់ដែរ។ របៀបធ្វើ៖ ស្រូបខ្យល់តាមច្រមុះ រួចដកដង្ហើមចេញតាមមាត់សន្សឹមៗ ហើយធ្វើវាឲ្យបាន ១០ដងទៅ អ្នកនឹងមានអារម្មណ៍ធូរស្រាលខ្លះហើយ។
២) ខំស្ដាប់ឲ្យច្រើនជាងនិយាយ៖ ពេលខឹង មនុស្សម្នាក់ៗ តែងតែចង់និយាយដើម្បីឲ្យគេស្ងាត់មាត់ ។ តែនេះគឺជាយុទ្ធសាស្ត្រខាតច្បាស់ក្រឡែត ព្រោះអី គេក៏ចង់ឈ្នះហើយអ្នកក៏ចង់ឈ្នះ។ ដូចនេះគឺមានតែខាត ដោយសារភ្លើងប៉ះភ្លើងគឺឆេះទាំងអស់។ ដូចនេះហើយព្យាយាមស្ដាប់ឲ្យច្រើនជាងនិយាយ ពេលស្ដាប់គេចប់ហើយ សឹមអ្នក បញ្ចេញយោបល់តាមក្រោយក៏មិនហួសពេលដែរ។
៣) កុំស្រែកគំហកឬនិយាយឮៗ៖ កំហឹងក៏កើតឡើងទៅតាមសំឡេងធ្ងន់ឬស្រាលដែរ។ ទោះអ្នកប្រើពាក្យសម្ដីឈឺកម្រិតណា តែបើសំឡេងស្រាល វាក៏មិនសូវអី។ ចុះបើសម្ដីនោះមិនសូវឈឺវិញ តែសំឡេងគ្រាន់តែ ឮក៏ចង់លួស ព្រលឹងបាត់ហើយនោះ តើគួរធ្វើយ៉ាងណា? ហេតុនេះ បើនិយាយគ្នាបាន អ្នកគួរតែទម្លាក់សំឡេងចុះខ្លះទៅ ទើបកំហឹងថមថយទៅតាមហ្នឹង។
៤) ចេះតែយល់ព្រមសិនទៅ៖ អាចថាអ្នកមានជម្លោះដោយសាររឿងមិនត្រូវគ្នាខ្លះ។ តែបើអ្នកគ្រាន់តែនិយាយយល់ព្រមសិនទៅ មិនថារឿងនោះវាមានសមយ៉ាងណាក្ដី។ ការនិយាយយល់ព្រមនេះគឺអាចឲ្យម្នាក់ៗ ស្ងប់ចិត្ត ហើយទម្លាក់កំហឹងចុះ។ បន្ទាប់មកពេលចិត្តស្ងប់ហើយនោះ អ្នកអាចបើកតុមូលនិយាយគ្នាធម្មតាវិញហើយ៕
ប្រែសម្រួល៖ ព្រំ សុវណ្ណកណ្ណិកា ប្រភព៖ powerofpositivity.com
