ដំណើរការណ៍សារជាតិកាហ្វេអ៊ីននៅក្នុងខួរក្បាលរបស់អ្នក ក្រោយពីការទទួលទាន
ហេតុអ្វីថ្នាំញៀនមួយប្រភេទ ដែលជាកាហ្វេនេះ ទាក់ទាញចំណាប់អារម្មណ៍មនុស្សជុំវិញពិភពលោកមកប្រើប្រាស់ម្ល៉េះ ? តើប្រយោជន៍អ្វីខ្លះដែលកាហ្វេបានផ្ដល់ឲ្យអ្នកទទួលទាន ? ហើយនៅពីក្រោយប្រយោជន៍ទាំងនោះ តើវាមានដំណើរការណ៍ដូចម្ដេចនៅក្នុងខួរក្បាលរបស់អ្នក ?
សារជាតិកាហ្វេអ៊ីនមិនមែនមានត្រឹមតែនៅក្នុងកាហ្វេនោះទេ វាក៏ត្រូវបានគេរកឃើញនៅក្នុងភេសជ្ជៈដ៏ពេញនិយមប្រភេទដទៃទៀតដូចជាតែនិងសូកូឡាផងដែរ។ សារជាតិកាហ្វេអ៊ីនជួយដាស់ស្មារតីអ្នកឲ្យមានថាមពល និងតម្រង់ការផ្ចង់អារម្មណ៍អ្នកឲ្យបានមូលល្អ បំបាត់ភាពអស់កម្លាំងនិងងងុយគេង ដែលជាមូលហេតុដែលអ្នកធ្វើការភាគច្រើនតែងរកឃើញថាពួកគេអាចធ្វើការបានយ៉ាងមានប្រសិទ្ធភាពក្រោយពេលទទួលទានជាតិកាហ្វេអ៊ីន។ នេះក៏ព្រោះតែវាដំណើរការណ៍បែបនេះ នៅពេលអ្នកទទួលទានវា វានឹងចូលទៅមជ្ឈមណ្ឌលប្រសាទរបស់អ្នក បន្ទាប់មកចូលទៅក្នុងចរន្តឈាម ហើយឆ្លងកាត់ប្លាស្មា និងចុងក្រោយចូលទៅក្នុងខួរក្បាលរបស់អ្នក។ នៅពេលទៅដល់ខួរក្បាល ម៉ូលេគុលរបស់កាហ្វេអ៊ីនបានដើរតួជាអ្នករារាំងកោសិកាឆ្លើយតបព័ត៌មានមិនឲ្យទទួលយកអាដេណូស៊ីន ដែលមានតួនាទីបង្កើនគុណភាពគេងរបស់អ្នក។ ហេតុនេះហើយទើបអ្នកតែងមានអារម្មណ៍ស្វាហាប់និងផ្ចង់អារម្មណ៍បានល្អជាងមុនក្រោយពីទទួលយកជាតិកាហ្វេអ៊ីន។ ប៉ុន្តែ នៅពេលដែលអ្នកទទួលទានជាតិកាហ្វេអ៊ីនកាន់តែច្រើន នោះមានន័យថាម៉ូលេគុលកាហ្វេអ៊ីនកាន់តែច្រើនបានទៅរារាំងកោសិកាឆ្លើយតបព័ត៌មានមិនឲ្យទទួលយកអាដេណូស៊ីន។ នៅពេលអ្នកកាន់តែរារាំងប៉ុណ្ណា អាដេណូស៊ីននឹងបញ្ចេញកាន់តែច្រើនប៉ុននោះ ហើយអ្នកនឹងត្រូវការកាហ្វេអ៊ីនបន្ថែមទៀតដើម្បីរារាំងវាផងដែរ។ ក្នុងរយៈពេលវែង វានឹងបណ្ដាលឲ្យអ្នកស្ថិតក្នុងស្ថានភាពមួយដែលមានបញ្ហាជាមួយការគេង ដែលជារោគគេងមិនលក់ ហើយឈឺក្បាលធេងធោងនេះឯង។ ដូច្នេះហើយនៅរាល់ការទទួលទានជាតិកាហ្វេអ៊ីន អ្នកគួរគិតគូរទទួលទានវានៅក្នុងកម្រិតកំណត់សមល្មមមួយទើបជាការប្រសើរ៕
ដោយ៖ ស្រីពៅ
