អេ អឹម ខេ មានចំណុចលេចធ្លោ ៣យ៉ាងដែលធ្វើខ្លួនខុសពីគូប្រកួតប្រជែង
ក្នុងឱកាសសន្និសីទសារព័ត៌មានស្ដីអំពី «ទទួលបានអត្ថប្រយោជន៍ទ្វេដងពីកម្ចីទិញម៉ូតូ» នៅទីស្នាក់ការកណ្ដាលអេអឹមខេ ព្រឹកថ្ងៃទី១ ខែកញ្ញា នេះ លោក សួន ពិសី ប្រធាននាយកប្រតិបត្តិអាជីវកម្មឥណទាន និងធានារ៉ាប់រងខ្នាតតូច បានមានប្រសាសន៍ប្រាប់ BizKhmer ពីលក្ខណៈពិសេស ៣យ៉ាងដែលធ្វើឱ្យ អេ អឹម ខេលេចធ្លោ និងខុសពីគូប្រកួតប្រជែងលើការផ្ដល់ឥណទានដល់អតិថិជន៖
១) លុបបំណុលចោល (Write-Off)៖ គ្រឹះស្ថានមានគោលការណ៍លុបចោលនៅពេលម្ចាស់បំណុលមានគ្រោះថ្នាក់ដល់ជីវិត។ ចំណុចនេះគឺជាចំណុចលេចធ្លោមួយ ហើយគ្រឹះស្ថានបានសម្រេចលុបបំណុលចោលព្រោះមួយគឺចង់ចូលរួមរំលែកទុក្ខដល់គ្រួសារផង ហើយមួយទៀតគឺមិនឱ្យគ្រួសាររែកនូវអម្រែកបំណុលបន្ត។ បើតាមរបាយការណ៍កាលពីចុងឆ្នាំ២០១៦ គ្រឹះស្ថានមីក្រូហិរញ្ញវត្ថុ អេ អឹម ខេលុបបំណុលចោលមានទំហំទឹកប្រាក់ប្រមាណជិត ២លានដុល្លារគិតចាប់តាំងពីឆ្នាំ២០១០ មក។
២) កម្ចីសម្រាប់គ្រាអាសន្ន៖ ដោយសារប្រជាជនក្រីក្រអាចនឹងជួបបញ្ហាអាសន្នណាមួយដែលតម្រូវទៅសម្រាក ព្យាបាល ឬសង្គ្រោះបន្ទាន់ នៅមន្ទីរពេទ្យដូច្នេះហើយ អេ អឹម ខេ អាចផ្ដល់កម្ចីបានជូនអតិថិជនដែលធ្លាប់ខ្ចីហើយ អាចខ្ចីបានថែមទៀតក្នុងទំហំទឹកប្រាក់ ១០០ដុល្លារ(គ្មានតម្រូវទ្រព្យធានា) ហើយកម្ចីនេះត្រូវការពេលតែ ៤ម៉ោងប៉ុណ្ណោះដើម្បីរៀបចំឯកសារ។
៣) ផ្ដល់នូវសេវាធានារាប់រងខ្នាតតូច៖ គ្រឹះស្ថាន អេ អឹម ខេ បាននិងកំពុងសហការជាមួយក្រុមហ៊ុនធានារ៉ាប់រងដើម្បីផ្ដល់ជូនសេវាកម្មធានារ៉ាប់រងផ្នែកសុខភាព និងគ្រោះថ្នាក់ (ខ្នាតតូច) ជូនអ្នកផ្ដល់កម្ចី។ អតិថិជន អេ អឹម ខេទាំងអស់សុទ្ធតែមានលទ្ធភាពអាចបង់លើការចំណាយសម្រាប់ធានារ៉ាប់រងបានដែលមានតម្លៃតែ ៣ម៉ឺនរៀលប៉ុណ្ណោះក្នុងមួយឆ្នាំ។ អត្ថប្រយោជន៍ទទួលបានដល់ទៅ ៣គឺ ១) បើគេងសម្រាកព្យាបាលនៅពេទ្យ ទទួលបានសំណង ២០ ០០០រៀលក្នុងមួយថ្ងៃ ហើយផ្ដល់ជូនដល់ ៦០ថ្ងៃនៃការសម្រាកព្យាបាល។ ២) បើមានការវះកាត់វិញ គឺគ្រឹះស្ថានអាចផ្ដល់ជូនចំនួនច្រើនបំផុតដល់ទៅ ៦០០ ០០០រៀលឯណោះ។ ដោយឡែក ប្រសិនណាបើមានករណីមរណភាព គ្រឹះស្ថាននឹងផ្ដល់សំណងជូន ៧ ០០០ ០០០រៀលសម្រាប់ធ្វើបុណ្យនិងទទួលបានពីសំណងផ្សេងៗទៀត៕
លោក សួន ពិសី ប្រធាននាយកប្រតិបត្តិអាជីវកម្មឥណទាន និងធានារ៉ាប់រងខ្នាតតូច បានបញ្ជាក់បន្ថែមថា ចំណុចពិសេសទាំងបីខាងលើ គឺមិនមែនសម្រាប់អតិថិជននៅទីជនបទនោះទេ តែសម្រាប់ទីក្រុង ទីទីប្រជុំជន អ្នកខ្ចីសម្រាប់ប្រើប្រាស់ផ្ទាល់ខ្លួន ឬខ្ចីធ្វើកសិកម្ម ឬ អាជីវកម្មសុទ្ធទទួលបានអត្ថប្រយោជន៍ទាំងបីខាងលើដូចគ្នា។
សូមបញ្ជាក់ថា គ្រឹះស្ថានមីក្រូហិរញ្ញវត្ថុ អេ អឹម ខេ បានប្រកាសពីអត្ថប្រយោជន៍ ទ្វេដងពីកម្ចីទិញម៉ូតូ ចាប់ពីថ្ងៃទី១ ខែកញ្ញា ឆ្នាំ២០១៧ ដល់ថ្ងៃទី៣០ ខែវិច្ឆិកា អតិថិជននឹងទទួលបានអត្ថប្រយោជន៍ពីរយ៉ាងគឺ ទទួលបានកម្ចីរហូតដល់ ១០០% នៃតម្លៃម៉ូតូ (ប៉ុន្តែមានលក្ខខណ្ឌសិក្សាពីអតិថិជនសិន) និងទទួលបានមួកសុវត្ថិភាពដោយឥតគិតថ្លៃ៕
សូមបញ្ជាក់ថា គ្រឹះស្ថានមីក្រូហិរញ្ញវត្ថុ អេ អឹម ខេ បានប្រកាសពីអត្ថប្រយោជន៍ ទ្វេដងពីកម្ចីទិញម៉ូតូ ចាប់ពីថ្ងៃទី១ ខែកញ្ញា ឆ្នាំ២០១៧ ដល់ថ្ងៃទី៣០ ខែវិច្ឆិកា អតិថិជននឹងទទួលបានអត្ថប្រយោជន៍ពីរយ៉ាងគឺ ទទួលបានកម្ចីរហូតដល់ ១០០% នៃតម្លៃម៉ូតូ (ប៉ុន្តែមានលក្ខខណ្ឌសិក្សាពីអតិថិជនសិន) និងទទួលបានមួកសុវត្ថិភាពដោយឥតគិតថ្លៃ៕
