ប្រធាននាយកប្រតិបត្តិអាជីវកម្មឥណទាន និងធានារ៉ាប់រងខ្នាតតូច អេ អឹម ខេ បង្ហើបគន្លឹះសម្រាប់ SME ទទួលបានកម្ចីឥណទានសម្រាប់អាជីវកម្ម!
ប្រធាននាយកប្រតិបត្តិអាជីវកម្មឥណទាន និងធានារ៉ាប់រងខ្នាតតូច អេ អឹម ខេ លោក សួន ពិសី បានផ្ដល់បទសម្ភាសន៍ពិសេសមួយជាមួយ BizKhmer លើប្រធានបទ គន្លឹះសម្រាប់ SME ដើម្បីងាយទទួលបានកម្ចីឥណទានសម្រាប់អាជីវកម្ម។ លោកបានបង្ហាញពីគន្លឹះបីសំខាន់ៗដូចខាងក្រោម៖
១) ការកត់ត្រានូវសកម្មភាពអាជីវកម្ម៖ លោក ពិសី លើកឡើងថា នេះជាចំណុច និងសំខាន់ជាងគេមួយដែលម្ចាស់អាជីវកម្មខ្នាតតូច និងមធ្យម ភាគច្រើនមិនសូវខ្វល់ខ្វាយ ឬគិតគូរបានដិតដល់ចំពោះបញ្ហានេះទេ។ សកម្មភាពអាជីវកម្មដែលលោកចង់លើកឡើងនេះ គឺសំដៅទៅលើព័ត៌មានហិរញ្ញវត្ថុ ឬឯកសារហិរញ្ញវត្ថុ របស់អាជីវកម្មតែម្ដង។ លោកបានផ្ដល់ជាយោបល់ថា ម្ចាស់អាជីវកម្មគួរតែមានបញ្ជីស្នាម ឬឯកសារហិរញ្ញវត្ថុឱ្យបានត្រឹមត្រូវ ពោលគឺកត់ត្រាលើចរន្តចំណាយ និងចំណូលឱ្យបានច្បាស់លាស់ ហើយរឹតតែពិសេសគឺត្រូវតែរក្សាទុកនូវវិក្កយបត្រដែលជាឯកសារសំខាន់បំផុតសម្រាប់មន្ត្រីឥណទានវាយតម្លៃ។ លោក ពិសី ថ្លែងដូច្នេះថា ៖«ប្រសិនបើអាជីវកម្មខ្នាតតូច និងមធ្យមចេះរៀបចំឯកសារហិរញ្ញវត្ថុបានត្រឹមត្រូវ និងមានរក្សាទុកឯកសារយោងដូចជាវិក្កយបត្របានល្អ គឺអាចជួយកាត់បន្ថយដល់ការទាមទារទៅលើទ្រព្យធានាពីធនាគារ ឬគ្រឹះស្ថានមីក្រូហិរញ្ញវត្ថុបានថែមទៀតផង»។ ចំណុចនេះដែរ មន្ត្រីឥណទាន ក៏ដូចជាគ្រឹះស្ថានហិរញ្ញវត្ថុ នឹងពិនិត្យទៅលើប្រវត្តិនៃការរកស៊ី និងប្រវត្តិហិរញ្ញវត្ថុដែលបានកត់ត្រាដែលឈានទៅដល់ការវាយតម្លៃពីលំហូរសាច់ប្រាក់នៅក្នុងអាជីវកម្មនេះ។
២) ផែនការអាជីវកម្ម៖ ការធ្វើផែនការអាជីវកម្មមិនចាំបាច់ទាមទារឱ្យមានផែនការលម្អិតគ្រប់ជ្រុងជ្រោយបំផុតនោះទេ ប៉ុន្តែវាត្រូវមានចំណុចសំខាន់មួយចំនួនដែលគ្រឹះស្ថានហិរញ្ញវត្ថុអាចវាយតម្លៃបាន គឺទទួលយកបានទៅហើយ។ ធាតុសំខាន់ជាងគេមួយ គឺផែនការនៃការលក់។ ម្ចាស់អាជីវកម្មខ្នាតតូចត្រូវតែកំណត់ឱ្យច្បាស់ ឧបមាថា គាត់ដាក់ផែនការលក់ឱ្យបានចំនួន xxx ឯកតា ហើយគាត់ត្រូវទិញទំនិចចូល xxx ឯកតា (កំណត់ថ្លៃដើម) ផ្អែកទៅលើចំណុចនេះ ម្ចាស់អាជីវកម្មនឹងដឹងថា គាត់មានលទ្ធភាពហិរញ្ញវត្ថុអាចទិញបានប៉ុន្មាន (ចំណាយទៅលើថ្លៃដើម) ហើយត្រូវការកម្ចីប៉ុន្មានបន្ថែមដើម្បីបង្គ្រប់ ហើយលក់ក្នុងតម្លៃប៉ុន្មានដើម្បីទទួលបានប្រាក់ចំណេញ។ មួយវិញទៀត ពាក់ព័ន្ធនឹងទៅការចំណាយទៅលើប្រតិបត្តិការ ដែលចំណុចសំខាន់មានដូចជាចំណាយទៅលើបុគ្គលិក និងចំណាយរដ្ឋបាលផ្សេងៗទៀត។ ផ្អែកទៅតាមផែនការអាជីវកម្មនេះ គឺគាត់អាចយកចំណូលដែលដាក់ផែនការពីការលក់ដកចំណាយថ្លៃដើម និងចំណាយប្រតិបត្តិការផ្សេងៗ គាត់នឹងអាចរកឃើញនូវប្រាក់ចំណេញរំពឹងទុកហើយ។ នេះជាចំណុចចាំបាច់មួយទៀតដែលត្រូវមានប្រសិនបើអាជីវកម្មខ្នាតតូច ឬមធ្យមចង់បានឥណទានពីគ្រឹះស្ថានហិរញ្ញវត្ថុ។
៣) ការគ្រប់គ្រងទូទៅទៅលើអាជីវកម្ម៖ ខាងគ្រឹះស្ថានហិរញ្ញវត្ថុចង់ដឹងពីរបៀបនៃការគ្រប់គ្រងរបស់ម្ចាស់អាជីវកម្មផងដែរ។ ចំណុចសំខាន់ៗមានដូចជា តើថាម្ចាស់អាជីវកម្ម មានផែនការគ្រប់គ្រងទៅលើហានិភ័យផ្សេងៗដូចម្ដេច? ដូចជា បើលក់មិនដាច់ត្រូវធ្វើយ៉ាងម៉េច និងរបៀបចាត់ចែងរបស់គាត់លើអាជីវកម្មទូទៅយ៉ាងម៉េច? គាត់អាចយកកម្ចីទៅចាត់ចែង និងប្រើប្រាស់ត្រូវតាមខ្ទង់ចំណាយសម្រាប់អាជីវកម្មរបស់គាត់ទេ? លោកពិសីលើកឡើងថា ខាងគ្រឹះស្ថានហិរញ្ញវត្ថុនឹងធ្វើសម្ភាសន៍ទៅលើម្ចាស់សហគ្រាសជុំវិញបញ្ហានេះ ប្រសិនបើពួកគាត់ចង់ខ្ចីលុយពីធនាគារ ឬគ្រឹះស្ថានមីក្រូហិរញ្ញវត្ថុ ដើម្បីយកមកប្រើប្រាស់សម្រាប់អាជីវកម្ម។
ទោះជាយ៉ាងណា លោក សួន ពិសី បានលើកឡើងថា អាជីវកម្មខ្នាតតូច និងមធ្យមមានជាង ៥០ម៉ឺនសហគ្រាសនៅក្នុងប្រទេសកម្ពុជា ក្នុងនោះមានជាង ៩០%ជាសហគ្រាសខ្នាតតូច ប៉ុន្តែការប្រើប្រាស់កម្ចីពីគ្រឹះស្ថានហិរញ្ញវត្ថុសម្រាប់យកទៅធ្វើអាជីវកម្មនៅមានបរិមាណតិចតួចនៅឡើយ។ បញ្ហាសំខាន់ត្រង់ថា មានម្ចាស់អាជីវកម្មមកខ្ចីច្រើន ប៉ុន្តែពួកគាត់ពុំអាចបំពេញបានតាមលក្ខខណ្ឌដូចដែលបានរៀបរាប់ពីខាងលើ៕
