​ការ​ចាប់​ផ្ដើម​ការងារ​ផ្នែក​គណនេយ្យ ​មិន​មែន​មួយ​​ឆ្នាំ​ឬ​ពីរ​ឆ្នាំ​អាច​ក្លាយ​ជា​​អ្នក​គ្រប់គ្រង​ភ្លាម​នោះ​ទេ​​ ពោល​គឺ​ច្បាស់​ណាស់​ថា​ ​អាជីព​​ផ្នែក​​គណនេយ្យ​​​មាន​ផ្លូវ​ដែល​ត្រូវ​ដើរ​ដោយ​ឆ្លង​កាត់​ពី​មួយ​មុខ​តំណែង​ទៅ​មួយ​មុខ​តំណែង​ទៀត។ នេះ​បើ​តាម​ការ​ថ្លែង​អះអាង​​ដោយ​ផ្អែក​លើ​បទ​ពិសោធន៍​ផ្ទាល់​ក្នុង​អាជីព​គណនេយ្យ​របស់​លោក​ លោក សាន ឬទ្ធិ  ​ដែល​ជា​ប្រធាន​ក្រុមហ៊ុន​ក្រុមហ៊ុន​ BSE Accounting។ អ្នក​ជំនាញ​ដដែល​រូប​នេះ​បាន​ថ្លែង​​ថា​ ជា​ទូទៅ​ ផ្លូវ​អាជីព​របស់​គណនេយ្យករ​ (Career Path) មាន​ប្រាំ​ដោយ​រាប់​ចាប់​តាំង​ពី​ការ​ងារ​សាកល្បង​ (Internship) ​ឡើង​ទៅ។ ការងារ​សាកល្បង​​មាន​រយៈពេល​ ៣​ខែ​ ​បន្ទាប់​មក​​ទៀត​​ជា​ Bookkeeper ​បំពេញ​ការងារ​ចន្លោះ​ពី​​ ៦​ ទៅ​ ១២​​ខែ​ ​ជា​ Junior Accountant ​បំពេញ​ការងារ​ចន្លោះ​ពី​​ ១២​ ទៅ ២៤​ខែ​ Senior Accountant ចន្លោះ​ពី ២​ ទៅ​ ៣​ឆ្នាំ​ ជា​ Accounting Supervisor ចន្លោះ​ពី​ ៣​ ទៅ​ ៥​ឆ្នាំ​ និង​អ្នក​គ្រប់គ្រង​ (Accounting Manager) រយៈពេល​ ៦​ឆ្នាំ​ឡើង​ទៅ។ ​ ​ បើ​តាម​លោក​ ឬទ្ធី​ បើ​ទោះ​បី​ជា​ផ្លូវ​អាជីព​ការងារ​របស់​គណនេយ្យករ​យ៉ាង​នេះ​ក្ដី​ លោក​ថា​ ​ ការ​​ប្រឹង​ប្រែង​សិក្សា​ពី​ការ​ងារ​ជាក់ស្ដែង​ និង​បង្កើន​សមត្ថភាព​​ជា​ប្រចាំ​ជា​រឿង​ចាំ​បាច់​ដើម្បី​​សម្រេច​ផ្លូវ​នៃ​អាជីព​គណនេយ្យ​នេះ​​បាន៕ ​​​​ ​​​