នែៗបុរសៗ បើគិតចង់ទិញអំណោយឲ្យមិត្តស្រី ទិញគ្រឿងអលង្ការទៅ មិនខុសទេ
មនុស្សស្រីជាច្រើននាក់សុខចិត្តចំណាយប្រាក់ដែលខ្លួនឯងខំរក ខំសន្សំទៅទិញគ្រឿងអលង្ការ។ មនុស្សស្រីនិងគ្រឿងអលង្ការហាក់ដូចជាពុំអាចបែកពីគ្នាទាល់តែសោះ។ តើធ្លាប់ឆ្ងល់ដែរឬទេហេតុអ្វីបានជាមនុស្សស្រីស្រលាញ់ និងចូលចិត្តគ្រឿងអលង្ការម្ល៉េះ? ខាងក្រោមនេះ ជាមូលហេតុដែលបង្ហាញថាគ្រឿងអលង្ការមានតម្លៃចំពោះមនុស្សស្រី។ ដូច្នេះហើយ ចូលឆ្នាំចូលខែ ប្រសិនមានបំណងចង់ទិញអំណោយឲ្យមិត្តស្រី ទិញគ្រឿងអលង្ការទៅ មិនខុសនោះទេ៖
១) មានតម្លៃ៖ ការទិញគ្រឿងអលង្ការប្រៀបបានដូចជាការវិនិយោគអ៊ីចឹងឯងព្រោះថាអ្នកទិញថ្ងៃនេះ តម្លៃរបស់វានឹងឡើងថ្លៃនាថ្ងៃអនាគត។ ម៉្យាងវិញទៀត គ្រឿងអលង្ការមិនចេះខូចដូចផ្កាកូឡាបនោះទេ វាទុកបានយូរអង្វែង។។ បន្ថែមពីលើនេះទៅទៀត ពួកគាត់អាចពាក់ទៅចូលរួមកម្មវិធីជាដើមទៀតផង វាមានប្រយោជន៍។
២) ធ្វើចិញ្ចៀនគូស្នេហ៍៖ ប្រសិនអ្នកជាបុរសដែលមិនសូវពូកែមាត់ក អ្នកក៏អាចបង្ហាញក្តីស្រលាញ់តាមរយៈគ្រឿងអលង្ការ ហើយវាមានន័យថែមទៀតផង។ អ្នកអាចធ្វើចិញ្ចៀនដែលមានពាក្យពេចន៍ឬរូបភាពផ្អែមល្ហែមដែលមានន័យសម្រាប់អ្នកទាំងពីរ។ អំណោយបែបនេះគឺពិសេសនិងមានន័យខ្លាំងណាស់។
៣) ស្អាតនិងលើកសម្ផស្ស៖ មនុស្សស្រីពេលពាក់គ្រឿងអលង្ការ គាត់ហាក់ដូចជាស្អាតនិងលើកសម្ផស្សរបស់ពួកគាត់ជាងមុនអ៊ីចឹង។ ប្រសិនអ្នកទិញគ្រឿងអលង្ការឲ្យមិត្តស្រី នោះបង្ហាញថាអ្នកខ្វល់ពីនាងនិងយកចិត្តទុកដាក់ចំពោះនាង។
៤) ក្តីស្រឡាញ់នៅជាប់ខ្លួន៖ ថ្វីត្បិតថាមនុស្សស្រីអាចទិញគ្រឿងអលង្ការដោយខ្លួនឯង ប៉ុន្តែប្រសិននាងទទួលបានកាដូពីមនុស្សជាទីស្រឡាញ់វិញ នោះវាកាន់តែពិសេស ព្រោះថាគ្រឿងអលង្ការប្រៀបបានដូចជាក្តីស្រឡាញ់អ៊ីចឹង។ រាល់ពេលដែលពាក់ជាប់ខ្លួន ក្តីស្រឡាញ់និងក្តីនឹករំលឹកក៏នៅជាប់ខ្លួនដូចគ្នា៕
ដោយ៖ មុយយូ
