ធនាគារកណ្ដាល​ថៃ (BoT) បានប្រកាស​ថា  ខ្លួនរំពឹង​បញ្ចប់​ការសាកល្បងដំណាក់​កាល​ទី​១​នៃ ការ​អភិវឌ្ឍន៍​ រូបិយប័ណ្ណឌីជីថល​របស់​ធនាគារកណ្ដាល (CBDC-central bank digital currency) នៅត្រឹមខែមិនា ឆ្នាំ២០១៩ ខាងមុខ។ ធនាគារកណ្ដាលរបស់ថៃមួយនេះ បានប្រកាសក្នុងសេចក្ដីថ្លែង កាលពីថ្ងៃអង្គារ សប្ដាហ៍​នេះ​ ថា ខ្លួនបានចាប់ដៃគូជាមួយស្ថាប័នហិរញ្ញវត្ថុចំនួន៨ ក្នុងប្រទេសថៃ ដើម្បី​ធ្វើ​ការ​ដេញ​ថ្លៃ​មួយ​​បង្កើត CBDC ផ្អែកលើ​បច្ចេកវិទ្យា Corda អភិវឌ្ឍ​​ដោយ​ក្រុមហ៊ុនបច្ចេកវិទ្យាចែកចាយទិន្នន័យ R3។ ក្នុងសេចក្ដីថ្លែងបានបញ្ជាក់ទៀតថា គោលដៅនៃកិច្ចការនេះ គឺ​​ប្រើប្រាស់រូបិយប័ណ្ណឌីជីថល ឬអេឡិកត្រូនិក ដើម្បីសម្រួលដល់ប្រតិបត្តិការអន្តរធនាគារ និងបង្កើនប្រសិទ្ធភាព នៃហេដ្ឋារចនាសម្ព័ន្ធទីផ្សារហិរញ្ញវត្ថុថៃ។ ចំណែក​ទេសាភិបាលធនាគារកណ្ដាលថៃ បានបង្ហាញគំនិតដំបូងនៃគម្រោងនេះ កាលពីខែមិថុនាដែរថា ការង្កើតនេះគឺដើម្បីស្វែកយល់ពីសក្ដានុពល នៃ blockchain ក្នុងការសម្រួលប្រតិបត្តិការអន្តរធនាគារ មុនវាត្រូវបានដាក់អោយប្រើប្រាស់ជាផ្លូវការ ក្នុងទ្រង់ទ្រាយធំ។ ដើម្បីជួយ និងពន្លឿនគម្រោងដែលមានឈ្មោះថា Project Inthanon នេះ ធនាគារថៃបានចុះហត្ថលេខាចាប់ដៃគូជាមួយក្រុមហ៊ុនបច្ចេកវិទ្យា R3 និងស្ថាប័នហិរញ្ញវត្ថុ ៨ ផ្សេងទៀត រាប់បញ្ចូលទាំង Bangkok Bank Public, Krung Thai, Siam Commercial Bank, Standard Chartered Bank (Thailand) និង HSBC ជាដើម៕ ប្រភព៖ Coindesk ប្រែសម្រួល៖ សុម៉ាវត្តី