ត្រីមាសទី១ សិង្ហបុរីស្រូបបានទេសចរបរទេសច្រើន តែចំណូលធ្លាក់ចុះ
កំណើនទេសចរក្នុងប្រទេសកូនខ្លាសេដ្ឋកិច្ចនៅអាស៊ី សិង្ហបុរី នៅត្រឹមត្រីមាសទី១ ឆ្នាំ២០១៨ មានការកើនច្រើន បើធៀបរយៈពេលដូចគ្នាកាលពីឆ្នាំមុន ប៉ុន្តែបើតាមក្រុមប្រឹក្សាទេសចរណ៍ប្រទេសនេះ ថ្ងៃ ២៤ សីហា ចំណូលទេសចរណ៍ដែលបានពីការលក់សំបុត្រ បែរជាធ្លាក់ចុះបន្តិចវិញ។
ចំណូលបានពីលក់សំបុត្របានធ្លាក់ចុះ ០.៥% (ស្រូបបាន ៦,៧ពាន់លានដុល្លារសិង្ហបុរី) ដោយសារតែភ្ញៀវ បានបង្វែរការចំណាយទៅលើការទិញទំនិញ ការស្នាក់នៅ អាហារហូបចុក និងភេសជ្ជៈជាដើម។
ភ្ញៀវបរទេសមកលេងប្រទេសកូនកោះដ៏ស៊ីវិល័យមួយនេះ បានកើនឡើង ៧,៣% ស្មើ ៤,៦លាននាក់ ហើយទេសចរ៤ប្រទេសសំខាន់បំផុតរបស់សិង្ហបុរី ពោលគឺចិន ឥណ្ឌូណេស៊ី ឥណ្ឌា និងម៉ាឡេស៊ី មានសន្ទុុះកើនឡើងប្រសើរ ហើយអ្វីគួរឱ្យកត់សម្គាល់នោះ ភ្ញៀវឥណ្ឌាកើន ២២% បើធៀបនឹងត្រីមាសទី ១ ឆ្នាំ២០១៧។
ប្រទេសមានទំហំ GDP ធំលំដាប់លេខ៤ នៅ ASEAN ដដែល ក្រសោបបានទេសចរចិន ៩៣៣.០០០ នាក់ ឥណ្ឌូណេស៊ី ៧៤៧.០០០ នាក់ ឥណ្ឌា ២៩៥. ០០០ នាក់ ម៉ាឡេស៊ី ២៨២ ០០០ នាក់ និងអូស្ត្រាលី ១៦៥.០០០នាក់ ស្មើ ៥៤% នៃភ្ញៀវអន្តរជាតិសរុប។
ដោយឡែកប្រាក់ចំណូលបន្ទប់សណ្ឋាគារ ដែលបានចុះបញ្ជីនៅត្រីមាសទី១ បានកើនឡើង ៨.៥ ស្មើនឹង ១ពាន់លានដុល្លារសិង្ហបុរី៕
ដោយ៖ សុម៉ាវត្តី
