តើមហាសេដ្ឋីពិភពលោកបច្ចុប្បន្នរស់នៅទ្វីបណាច្រើនជាងគេ?
សម្រាប់ឆ្នាំ ២០១៧ កន្លងទៅ គេបានរកឃើញថា យ៉ាងហោចណាស់នៅក្នុងរយៈពេល ២ថ្ងៃមានមហាសេដ្ឋី (Billionaire) ចំណូលថ្មីបានកើតឡើងម្នាក់ នេះបើយោងតាមរបាយការណ៍ស្រាវជ្រាវរបស់អង្គការ Oxfam។ ចំណែកសេដ្ឋី (Millionaire) វិញក៏មានការកើនឡើងផងដែរ ពោលគឺបានកើនឡើង ៣៦% រវាងចន្លោះឆ្នាំ ២០០៦ ដល់ឆ្នាំ ២០១៦។
នេះបានធ្វើឲ្យចំនួនសេដ្ឋីសរុបនៅជុំវិញពិភពលោកបានកើនឡើងជាង ១៣ លានអ្នក នេះបើយោងតាមរបាយការណ៍របស់ក្រុមហ៊ុន Knight Frank ប្រចាំឆ្នាំ ២០១៧ កន្លងទៅ។ របាយការណ៍នេះក៏បានធ្វើបែងចែកផងដែរថា តើសេដ្ឋី និងមហាសេដ្ឋីទាំងអស់នេះភាគច្រើនបានរស់នៅតំបន់ណាខ្លះនៅជុំវិញពិភពលោក?
នៅតំបន់អឺរ៉ុប សេដ្ឋីភាគច្រើនបានជ្រើសរើសទីក្រុងឡុងដុងរបស់អង់គ្លេសជាគេហដ្ឋានរបស់ពួកគេ ដែលក្នុងទីក្រុងនេះមានសេដ្ឋីរស់នៅប្រមាណ ៣៥៧ ២០០ នាក់។ ក្នុងចំណោមសេដ្ឋីទាំងនេះ មានសេដ្ឋី ៤ ៧៥០ នាក់មានទ្រព្យសម្បត្តិ ៣០ លានដុល្លារ ឬ លើសពីនេះ។
នៅអាមេរិកខាងជើង ទីក្រុងញីវយ៉ករបស់អាមេរិកគឺជាផ្ទាំងស៊ីបដ៏សំខាន់សម្រាប់ក្រុមសេដ្ឋី។ សេដ្ឋីចំនួន ៣៣៩ ២០០ នាក់ត្រូវបានគេរកឃើញថា បានកំពុងរស់នៅក្នុងទីក្រុងមួយនេះ ខណៈដែលទីក្រុងតូក្យូរបស់ជប៉ុនឈរនៅទី៣ មានសេដ្ឋីរស់នៅ ២៧៨ ៨០០ នាក់ពោលគឺច្រើនជាងប្រទេសណាៗទាំងអស់នៅក្នុងតំបន់អាស៊ី។
របាយការណ៍ដដែលបានបញ្ជាក់ទៀតថា នៅក្នុងរយៈពេលត្រឹមតែ ៧ ឆ្នាំចុងក្រោយ ទ្រព្យសម្បត្តិរបស់សេដ្ឋី និងមហាសេដ្ឋីទាំងនេះបានកើនឡើងរហូតដល់ទៅ ២០,៦ ពាន់ពាន់លានដុល្លារ។ ចំនួននេះនឹងកើនឡើងទៀតនៅពេលខាងមុខ ខណៈដែលសេដ្ឋី និងមហាសេដ្ឋីចូលថ្មីក៏នឹងកើនឡើងដែរ ជាពិសេសប្រទេសចិន៕
ប្រភព៖ cnbc
