កម្ពុជា ប្រកាសជួយឥណ្ឌូណេស៊ី ២០ម៉ឺនដុល្លារ ក្រោយជួបគ្រោះធម្មជាតិដ៏កំណាច
រដ្ឋាភិបាលកម្ពុជា បានសម្រេចផ្ដល់ជំនួយមនុស្សធម៌ ២០ ម៉ឺនដុល្លារសហរដ្ឋអាមេរិក ដល់ឥណ្ឌូណេស៊ី ក្រោយរញ្ជួយដី និងរលកស៊ូណាមិដ៏កំណាច បានបោកបក់លើទីក្រុង Palu លើកោះ Sulawesi របស់ប្រទេសនេះ។ ការសម្រេចផ្ដល់ជំនួញរបស់រដ្ឋាភិបាលកម្ពុជា ដល់ប្រទេសឥណ្ឌូណេស៊ី ធ្វើឡើងតាមរយៈសេចក្ដីប្រកាសព័ត៌មាន របស់ក្រសួងការបរទេស និងសហប្រតិបត្តិការអន្តរជាតិ។ គ្រោះរញ្ជួយដីកម្រិត ៧,៥រ៊ិចទ័រ បានបង្កើតឲ្យមានរលកយក្សស៊ូណាមិ ហើយបោកបក់មកលើផ្ទះសម្បែងរបស់ប្រជាជនជាង ៣៥ ម៉ឺននាក់ក្នុងទីក្រុង Palu កាលពីថ្ងៃសុក្រសប្ដាហ៍មុន។ អ្នកស្លាប់ក្នុងហេតុការណ៍នេះ បានកើនដល់ ៤០៥នាក់ និងជាង ៤០០ នាក់ផ្សេងទៀតរងរបួសធ្ងន់ធ្ងរ។ នេះបើតាមការបញ្ជាក់អ្នកនាំពាក្យភ្នាក់ងារគ្រប់គ្រងមហន្តរាយឥណ្ឌូណេស៊ី៕ ដោយ៖ សុវណ្ណមុនីលីតា
