បើ​ផ្អែក​តាម​ការសិក្សា​ របស់​​ក្រុមហ៊ុន​ប្រឹក្សា​យោបល់​ Bain & Co ចុះផ្សាយដោយ Businesstimes សេដ្ឋកិច្ច Digital នៃ​សហ​គ្រាស​ខ្នាត​តូច និង​មធ្យម (SME) នឹង​ជួយ​​បង្កើន​ចំណូល​​ផលិតផល​ក្នុង​ស្រុក (GDP) របស់​សមាគម​ប្រជាជាតិ​អាស៊ី​អាគ្នេយ៍ ចន្លោះ​ពី ៧៨០ ពាន់​លាន​ទៅ ១,១៣ ទ្រីលាន​ដុល្លារ នៅ​​ត្រឹម​ឆ្នាំ ​២០២៥។ ​

សព្វថ្ងៃ​នេះ ​​​ជំនួញ​ក្នុង​ទម្រង់​​ឌីជីថល បាន​រួម​ចំណែក​ទីផ្សារ ៧% ស្មើ ២០០ ពាន់​លាន​ដុល្លារ​នៃសំហំ GDP សរុប​របស់​អាស៊ាន។ អ្នក​ស្រាវជ្រាវ​របស់​​ Bain & Co ប្រាប់​​​ថា ការ​​ព្យាករណ៍​​នៃ​​ទំហំ​ទឹកប្រាក់ ១,១៣ ទ្រីលាន​ដុល្លារ​នេះ ក៏​ដោយសារ​​​សេដ្ឋកិច្ច​ក្នុង​តំបន់ មាន​កំណើន​គួរ​ឱ្យ​កត់​សម្គាល់​។ ​បន្ទាប់​ពី​ហក់​​ក្នុង​ពាណិជ្ជកម្ម​អេឡិចត្រូនិក ឬឌីជីថល បើ​តាម​របាយការណ៍ ការ​លក់​រាយ​នៃ​សហគ្រាស​ខ្នាត​​តូច និង​មធ្យម​​ ច្រើន​ជាង ២ ៣០០ ​នៅ​អាស៊ាន ជា​មធ្យម​មាន​កំណើន​ ១៥%។ ចំណែក​វិស័យ​ដឹកជញ្ជូន​កើន​ពី ១០ ទៅ ២០% ខណៈ​កសិពាណិជ្ជកម្ម​កើន​ ៥% ទៅ ១៥% ដែល​តួលេខ​នេះ បាន​មក​ពី​ការ​ស្ទង់​មតិ​អ្នក​ពាក់ព័ន្ធ​ផ្នែក​នេះ។ យ៉ាងណា​ការ​រាំងស្ទះ​នៅ​តែ​មាន​ ដោយ​មាន​តែសហគ្រាស​ខ្នាត​តូច និង​មធ្យម ១៦% ប៉ុណ្ណោះ ប្រើ​បច្ចេកវិទ្យា​ឌីជីថល ​ប្រហែល ៤០% ខ្វះ​ជំនាញ​ផ្នែក​នេះ (Skill gap) និង​ ៤៥% ​មិន​ប្រាកដ​ប្រជា​អំពី​​បច្ចេកវិទ្យា​ឌីជីថល​។ របាយការណ៍​បង្ហាញ​ទៀត​ថា ប្រទេស​សមាជិក​អាស៊ាន គួរ​ធ្វើ​ការ​ជាមួយ​វិស័យ​ឯកជន ដើម្បី​បង្កើន​ជំនាញ​នេះ (Digital skills road maps) ដូច​ដែល​បាន​ធ្វើ​​រួច​មក​ហើយ ក្នុង​ប្រទេស​​សិង្ហបុរី និង​ម៉ាឡេស៊ី។ អ្នក​វិភាគ​ស្រាវជ្រាវ នៅ​ក្រុមហ៊ុន Credit Suisse ប្រចាំ​អាស៊ីអាគ្នេយ៍ លោក Johnson Loh ប្រាប់ The Business Times ថា កំណែ​ទម្រង់​ឌីជីថល ដែល​ធ្វើ​ឱ្យ​ការងារ​មាន​សុវត្ថិភាព និង​កើន​ផលិតភាព គឺ​ជា​ កំណើន​សេដ្ឋកិច្ច​ដ៏​អស្ចារ្យ។ សហគ្រាស​ខ្នាត​តូច និង​មធ្យម គឺជា​ឆ្អឹងខ្នង​សេដ្ឋកិច្ច​ដ៏​សំខាន់​មួយ ​រួម​ចំណែក​ក្នុង​ការ​ជំរុញ​កំណើន​សេដ្ឋកិច្ច​ជាតិ ដូច្នេះ​ជា​រឿង​ល្អ បើ​វិស័យ​នេះ​ហក់​ចូល​ជំនួញ​ឌីជីថល កាន់​តែ​ច្រើន​។

អ្វីជា SME? សហគ្រាស​ខ្នាត​តូច និង​មធ្យម SMEs ជា​ឃ្លាកាត់​មក​ពី “Small and medium-sized enterprises​” ឬ​គេ​អាចហៅម្យ៉ាងទៀត​ថា “សហគ្រាស​ខ្នាត​​​តូច​ និង​មធ្យម  (SMBs)”​។ និយមន័យ “សហគ្រាស​ខ្នាត​តូច និង​មធ្យម” នៅ​កម្ពុជាតាម​​អនុក្រឹត្យ លេខ ១២៤ អនក្រ.បក ចេញ​ដោយ​រដ្ឋាភិបាល ស្ដី​ពីការ​លើក​ទឹកចិត្ត​ភ្នែក​ពន្ធ​ដារ សម្រាប់​សហគ្រាស​ធុន​តូច និង​មធ្យម ក្នុង​វិស័យ​អាទិភាព​រដ្ឋាភិបាល ជំពូក​ទី២ “ការ​កំណត់​និយមន័យ និង​វិស័យ​អាទិភាព ក្នុង​មាត្រា ៤  បាន​ឱ្យ​ដឹង​ថា៖ សហគ្រាស​ធុន​តូច ​​សំដៅ​លើ​សហគ្រាស​ដែល​មាន​ផលរបរ​​ប្រចាំ​ឆ្នាំ​ចាប់​ពី ២៥០ លាន​រៀល​ដល់ ៧០០ លាន​រៀល ឬ សហគ្រាស​ដទៃ​ទៀត ​ដែល​ជា​កម្មវត្ថុ​នៃ​ការ​​ចុះ​បញ្ជី​ពន្ធដារ​ជា​អ្នក​ជាប់​ពន្ធ​តូច ស្រប​តាម​ច្បាប់ និង​បទបញ្ញត្តិ​ស្ដីពី​ពន្ធដារ ឬ​មាន​និយោជិក​ចាប់​ពី ១០ នាក់ទៅ ៥០ នាក់។ ចំណែក សហគ្រាស​ធុន​មធ្យម សំដៅ​លើ​សហគ្រាស ​ដែល​មាន​ផលរបរ​​ប្រចាំ​ឆ្នាំ​ចាប់​ពី ៧០០ លាន​រៀល​ដល់ ៤ ០០០ លាន​រៀល​ ឬ សហគ្រាស​ដទៃ​ទៀត​ ដែល​ជា​កម្មវត្ថុ​នៃ​ការ​​ចុះ​បញ្ជី​ពន្ធដារ​ជា​អ្នក​ជាប់​ពន្ធ​​មធ្យម​ ស្រប​តាម​ច្បាប់ និង​បទបញ្ញត្តិ​ស្ដីពី​ពន្ធដារ ឬ​មាន​និយោជិក​ចាប់​ពី ៥១ នាក់​ដល់​ ១០០ នាក់៕

ដោយ៖ សុវណ្ណមុនីលីតា