ហេតុអ្វីបានជាការរៀបចំពេលវេលាពិតជាសំខាន់សម្រាប់សិស្សានុសិស្ស?
ពិតណាស់ដើម្បីឲ្យការសិក្សាទទួលបានភាពជោគជ័យ ការរៀបចំពេលវេលាគឺពិតជាសំខាន់ខ្លាំងណាស់។ ដើម្បីដឹងកាន់តែច្បាស់ថា តើការរៀបចំពេលវេលាបានផ្តល់ផលប្រយោជន៍ និងមានសារៈសំខាន់យ៉ាងណានោះ អត្ថបទខាងក្រោមនេះនឹងរៀបរាប់អំពីអត្ថប្រយោជន៍នៃការរៀបចំពេលវេលាសម្រាប់សិស្សានុសិស្ស៖
១) អ្នកនឹងក្លាយទៅជាមនុស្សដែលមានរបៀប៖ ជាការពិតណាស់ផ្នែកមួយដែលសំខាន់សម្រាប់ការរៀបចំពេលវេលានោះគឺការរៀបចំគម្រោងដែលវាជួយឲ្យអ្នកមានការរៀបចំនៅពេលវេលាច្បាស់លាស់សម្រាប់រំលឹកមេរៀនណាដែលអ្នកមិនទាន់មិនយល់ ឬក៏មុនពេលប្រឡង និងម្យ៉ាងវិញទៀតដើម្បីបំពេញកិច្ចការងារសាលាបានទាន់ពេលវេលាល្អ។ លើសពីនេះទៅទៀតការរៀបចំគម្រោងនេះផងដែលអ្នកអាចបែងចែកវាជាកាលវិភាគមួយដែលរួមផ្សំជាមួយនឹងការរៀបរាប់ពីអ្វីដែលអ្នកត្រូវធ្វើពីមួយម៉ោងទៅមួយម៉ោង។ ការដែលអ្នកក្នុងនាមជាសិស្សចេះរៀបចំបែបនេះវានឹងក្លាយជាទម្លាប់មួយដ៏ល្អ វាបាននាំឲ្យអ្នកមានអារម្មណ៍ថារីករាយនឹងការសិក្សាព្រោះថារាល់កិច្ចការងារសាលាទាំងឡាយអ្នកបានបំពេញរួចរាល់ទាន់ពេលវេលា។
២) អ្នកបានកសាងកេរ្តិ៍ឈ្មោះដ៏ល្អមួយ៖ ពិតណាស់បន្ទាប់ពីអ្នកមានភាពល្អប្រសើរនៅផ្នែករៀបចំបែងចែកពេលវេលា អ្នកនឹងទទួលលទ្ធផលល្អមួយពីការសិក្សារបស់អ្នក លើសពីនេះទៅទៀតទម្លាប់បែបនេះនឹងបន្តនាំអ្នករហូតដល់អ្នកមានការងារធ្វើ នៅពេលដែលអ្នកមានការងារធ្វើដែលអ្នកប្រាកដជាបុគ្គលិកម្នាក់ដែលឆ្នើមដោយសារតែអ្នកជាមនុស្សម្នាក់មានភាពល្អប្រសើរទៅលើការរៀបចំការងារបានល្អប្រកបទៅដោយភាពទទួលខុសត្រូវខ្ពស់។
៣) អ្នកមានពេលវេលាច្រើនសម្រាប់ជីវិតផ្ទាល់ខ្លួន៖ ដើម្បីឲ្យជីវិតរបស់អ្នកមានភាពរីករាយនៅពេលដែលអ្នកកំពុងតែសិក្សាផងនោះ វាពិតជាសំខាន់ខ្លាំងណាស់ព្រោះថាអ្នកត្រូវតែមានការបែងចែកឲ្យច្បាស់រវាងការសិក្សានិងជីវិតផ្ទាល់។ ពិតណាស់ការសិក្សាគឺពិតជាសំខាន់ខ្លាំងណាស់ ប៉ុន្តែអ្នកក៏ត្រូវការពេលវេលាខ្លះដើម្បីសម្រាប់ការជួបជុំជាមួយមិត្តភក្តិ ឬក៏ក្រុមគ្រួសារផងដែរ។ យ៉ាងណាមិញអ្នកនឹងទទួលបានពេលវេលាសម្រាកបែបជីវិតផ្ទាល់ខ្លួន ជាមួយមិត្តភក្តិ ឬក៏ក្រុមគ្រួសារប្រសិនបើអ្នកមានការរៀបចំបែងចែកពេលវេលាបានល្អ ព្រោះថាការរៀបចំពេលវេលាបានល្អវាធ្វើឲ្យអ្នកមានភាពរីករាយដោយមិនមានការព្រួយបារម្ភ ព្រោះថាអ្នកអាចមានពេលវេលាជួបជុំ ដោយកិច្ចការងារទាំងឡាយរបស់អ្នកបានបំពេញចប់រួចរាល់ទៅហើយ៕
