តើអ្នកគួរទទួលយកឬអត់ បើក្រុមហ៊ុនសុំចរចាដំឡើងប្រាក់ខែនៅពេលអ្នកដាក់ពាក្យលាឈប់ពីការងារ?
មានមូលហេតុច្រើនណាស់ដែលបុគ្គលិកម្នាក់បានសម្រេចចិត្តដាក់ពាក្យសុំលាឈប់ពីការងារដូចជាទំនាស់នៅក្នុងក្រុមហ៊ុន ផ្តល់ប្រាក់ខែមិនសមនឹងសមត្ថភាព ឬ ក៏អាចបណ្តាលមកពីបរិស្ថានការងារបច្ចុប្បន្នមើលមិនឃើញពីភាពរីកចម្រើនទៅមុខ ជាដើម។ មកដល់ចំណុចនេះមានសំនួរមួយចោទសួរឡើងនោះគឺថា តើអ្នកសុខចិត្តនៅធ្វើការបន្តទៀតទេ ប្រសិនបើក្រុមហ៊ុនសុំចរចាដំឡើងប្រាក់ខែនៅពេលអ្នកដាក់ពាក្យសុំលាឈប់ពីការងារ?
១.បើអ្នកជាបុគ្គលិកល្អ ហេតុអ្វីក្រុមហ៊ុនមិនដំឡើងប្រាក់ខែតាំងពីមុនមក? ជុំវិញសំនួរនេះអ្នកជំនាញផ្នែកគ្រប់គ្រងបុគ្គលិកក្រុមហ៊ុនបានលើកឡើងថា នៅពេលដែលអ្នកសម្រេចចិត្តដាក់ពាក្យសុំលាឈប់ពីការងារហើយ ការសម្រេចទទួលយកការចរចាដំឡើងប្រាក់ខែវិញ មិនមែនជាការសម្រេចចិត្តមួយដ៏ល្អនោះឡើយនៅក្នុងជីវិតអាជីពការងាររបស់អ្នក។ ចំណុចមួយដែលគួរឲ្យពិចារណានោះគឺថា បើអ្នកជាបុគ្គលិកមានសក្ដានុពល និងមានតម្លៃសម្រាប់ក្រុមហ៊ុន ហេតុអ្វីបានជាគេមិនដំឡើងប្រាក់ខែឲ្យអ្នកតាំងពីមុនមក?
២.ហេតុអ្វីក្រុមហ៊ុនចង់ចរចាដំឡើងប្រាក់ខែ បើអ្នកដាក់ពាក្យលាឈប់ទៅហើយ? ការពិតនៅពេលអ្នកសុំលាឈប់ ទំនុកចិត្តរបស់អ្នក និងក្រុមហ៊ុនគឺបានបាត់បង់រួចទៅហើយ។ អ្នកត្រូវដឹងថា មានមូលហេតុមួយចំនួនដែលធ្វើឲ្យភាគីក្រុមហ៊ុនមិនចង់ឲ្យអ្នកដើរចេញនៅពេលនេះ ហើយសុំចរចាដំឡើងប្រាក់ខែឲ្យអ្នកដោយហេតុតែនិយោជករបស់អ្នកមើលឃើញពីបញ្ហាមួយចំនួន។ មូលហេតុទាំងនោះដូចជា ក្រុមហ៊ុនមានការលំបាកដើម្បីរកបុគ្គលិកថ្មីមកជំនួសតំណែងរបស់អ្នកឲ្យទាន់ពេល ឬ ជាផ្នែកមួយដើម្បីទុកពេលឲ្យក្រុមហ៊ុនសិក្សាថា តើខ្លួនគួរជ្រើសរើសបុគ្គលិករបៀបម៉េចដើម្បីជំនួសដំណែងអ្នកបាននៅពេលក្រោយ? ជាទូទៅប្រសិនបើអ្នកទទួលយកការដំឡើងប្រាក់ខែជាជាងការដើរចេញ វត្តមានរបស់អ្នកនៅក្រុមហ៊ុននេះមិនសូវជាយូរអង្វែងនោះឡើយ។ ជាងនេះទៅទៀត វានឹងកាន់តែធុញថប់ប្រសិនបើអ្នកមិនពេញចិត្តការងារអ្នកស្រាប់ផងនោះ។ អ្នកនឹងសង្កេតឃើញថា អ្នកគ្រប់គ្រង ឬ ការដែលក្រុមហ៊ុនរបស់អ្នកស្នើសុំឲ្យអ្នកនៅបន្ត ប្រហែលជាចូលចិត្តការងារអ្នក ជាជាងរឿងផ្តល់ប្រាក់ខែខ្ពស់តាមអ្វីដែលអ្នកចង់បាន។
៣. ដកពាក្យលាឈប់វិញទេ បើអ្នកសម្រេចចិត្តរួចហើយ? តើអ្នកដឹងទេ នៅពេលអ្នកគ្រាន់តែបង្ហើបចង់លាឈប់ ប៉ុន្តែមិនទាន់ដាក់ពាក្យលាឈប់ ឥទ្ធិពលចរចាដំឡើងប្រាក់ខែរបស់អ្នកមានប្រៀបតិចជាងភាគីក្រុមហ៊ុន។ បើអ្នកនៅ មានភាពស្ទាក់ស្ទើរ ក្រុមហ៊ុននឹងព្យាយាមបញ្ចុះបញ្ចូលអ្នកឲ្យនៅធ្វើការបន្តទៀត។ ដូចនេះមុនពេលសម្រេចចិត្តលាឈប់ អ្នកត្រូវឲ្យប្រាកដថា ការងារនៅកន្លែងថ្មីល្អជាងនេះ និងជួយផ្តល់ឱកាសឲ្យអ្នកអភិវឌ្ឍអាជីពការងារបានកាន់តែប្រសើរនៅក្នុងរយៈពេល២ទៅ៣ឆ្នាំខាងមុខ។
៤.លិខិតលាឈប់ពីការងារ គួរសរសេរអ្វីខ្លះ? គ្មានឡើយលិខិតលាឈប់ពីការងារដ៏ល្អឥតខ្ចោះនោះ។ ប៉ុន្តែមានចំណុចខ្លះដែលអ្នកគួរសរសេរ និងមិនគួរសរសេរ មិនមែនចេះតែសរសេររៀបរាប់ឲ្យតែរួចពីដៃនោះទេ។ ជាទូទៅដើម្បីឲ្យលិខិតលាឈប់មើលទៅមានស្តង់ដារ និងថ្លៃថ្នូរ អ្នកគួរសរសេរលើកឡើងពីចំណុចល្អរបស់ក្រុមហ៊ុនដូចជា អរគុណដល់ក្រុមហ៊ុនដែលបានចំណាយពេលបណ្តុះបណ្តាល និង ផ្តល់ឱកាសការងារឲ្យអ្នកនៅ ពេលកន្លងមក។ អ្នកក៏អាចសរសេរបន្ថែមថា ពីឱកាសការងារនៅកន្លែងថ្មីដែលមានលក្ខណៈប្រសើរ និងស្របតាមជំនាញរបស់អ្នក។ ការរៀបរាប់ទាំងឡាយនៅក្នុងលិខិតលាឈប់អ្នកសរសេរយ៉ាងណាក៏ដោយត្រូវជៀសវាងភាសាជម្លោះ និងលើកហេតុផលរិះគន់ដល់ក្រុមហ៊ុនរបស់អ្នកនោះឡើយ បើទោះបីជាអ្នកបានលាឈប់ដោយសារតែជម្លោះ ឬបញ្ហាផ្សេងៗក៏ដោយ។ ការធ្វើបែបនេះបង្ហាញថា អ្នកជាមនុស្សមានសីលធម៌ល្អ និងចេះឲ្យតម្លៃអ្នកដទៃ ព្រមទាំងមិនបាត់បង់មិត្តភាពនៅពេលអ្នកចេញផុតទៅទៀតផង៕
សូមកុំរំលងអត្ថបទ៖ បើអ្នកសម្ភាសន៍សួរថា “ហេតុអ្វីអ្នកដាក់ពាក្យលាឈប់ការងារនៅកន្លែងចាស់” តើអ្នកគួរឆ្លើយយ៉ាងម៉េច?
ដោយ៖ សូរ៉ាន់ដារ
