ក្នុងចំណោម​ប្រទេស ​៥ ដែល​មាន​ប្រព័ន្ធសុខមាលភាពសាធារណៈ ល្អបំផុតលើពិភពលោក សិង្ហបុរី ជាប់ចំណាត់ថ្នាក់​លេខ ២ វាយតម្លៃដោយ Legatum មានមូលដ្ឋានគ្រឹះនៅប្រទេសអង់គ្លេស។ សិង្ហបុរី សិង្ហបុរី ជាប្រទេសកូនកោះតូចមួយក្នុងតំបន់អាស៊ីអាគ្នេយ៍ ដោយស្ថិតលើផ្ទៃដីសរុបត្រឹម​ប្រមាណ ៧២១,៥ គីឡូម៉ែត្រការ៉េប៉ុណ្ណោះ ជាមួយចំនួនពលរដ្ឋសរុបគិតត្រឹមឆ្នាំ២០១៧ ជាង ៥ លាន ៦ សែននាក់។ ទោះជាប្រទេសតូចមួយក៏ពិតមែន ប៉ុន្តែសឹង្ហបុរី ជាឋានសួគ៌ដ៏សុខដុម ជាកន្លែងពលរដ្ឋរាប់សិបលាននាក់​ជុំវិញពិភពលោកប្រាថ្នាចង់រស់នៅ ព្រោះប្រទេសនេះជាមជ្ឈមណ្ឌលពាណិជ្ជកម្មដ៏សំខាន់មួយ​របស់ពិភពលោក ជាកន្លែងប្រមូលផ្តុំដោយគ្រឹះស្ថានអប់រំប្រកបសោយស្តង់ដារពិភពលោក ខណៈ GDP ប្រចាំឆ្នាំសម្រាប់ពលរដ្ឋសិង្ហបុរីម្នាក់ៗគឺមានដល់ទៅជាង ៦១,៧០០ ដុល្លារអាមេរិក។ អ្វីកាន់តែសំខាន់ ប្រទេសនេះ មានសេវាសុខមាលភាពសាធារណៈល្អបំផុតសម្រាប់ពលរដ្ឋខ្លួន នាំឲ្យសឹង្ហបុរីអាចឈរនៅលេខរៀងទី២ ខណៈពលរដ្ឋ​សឹង្ហបុរីជាធម្យមអាចរស់ដល់អាយុ ៨៣ ឆ្នាំ។ យោងតាមបណ្តាញសារព័ត៌មាន​ Business Insider លទ្ធផលនេះ គឺជាការស្រាវជ្រាវរបស់វិទ្យាស្ថាន Legatum Institute ដែលមានមូលដ្ឋានក្នុង​ទីក្រុងឡុងដ៏ ចក្រភពអង់គ្លេស កាលពីចុងឆ្នាំ ២០១៧ កន្លងទៅ ដោយវាយតម្លៃលើប្រទេស​សរុប ១០៤ ជុំវិញពិភពលោក ដើម្បីប្រៀបធៀប​ប្រព័ន្ធសុខមាលភាព​សាធារណៈល្អបំផុត សម្រាប់មនុស្សជាតិ។ លេខ១ បានទៅលើប្រទេស លុច្សហ្សំបួរ។ ១- ប្រទេស លុច្សហ្សំបួរ  ​លុច្សហ្សំបួរ ជាប្រទេស​សុខដុមរម្យនាមួយក្នុងទ្វីបអឺរ៉ុប ស្ថិតនៅចន្លោះរវាងប្រទេសប៊ែលហ្សិក បារាំង និងអាល្លឺម៉ង់ និង​ជាប្រទេសមាន​បំផុត​លំដាប់កំពូលរបស់ពិភពលោកផ្អែកលើ GDP ជាធម្យមប្រចាំឆ្នាំនៃពលរដ្ឋម្នាក់ៗមានដល់ទៅជាង ១២​ម៉ឺនដុល្លារអាមេរិក។  លុច្សហ្សំបួរ ក៏ជាប្រទេសមានសេវាសុខមានភាពសាធារណៈ​ល្អបំផុតលើលោកដូចគ្នា ដែលនាំឲ្យពលរដ្ឋ​ក្នុងប្រទេសនេះ ជាធម្យមអាចរស់បានដល់អាយុ ៨២ ឆ្នាំ។ ៣- ប្រទេស ស្វីស ស្ថិតនៅតំបន់ភាគខាងលិចឈាងខាងត្បូងទ្វីបអឺរ៉ុប មានព្រំដែនជាប់ប្រទេសអាល្លឺម៉ង់ បារាំង និងអ៊ីតាលី, ស្វីស ជាប្រទេសមានបំផុតមួយលើលោក ជាប្រទេសដ៏ស្រស់ស្អាតលើផែនដី ក៏ជាប្រទេសមានសេវាសុខាភិបាលអស្ចារ្យបំផុតផងដែរ។ ក្រៅពីជាប្រទេសឈរនៅលេខរៀងទី២ មាន GDP ប្រចាំឆ្នាំជាធម្យមខ្ពស់បំផុតលើលោក គឺប្រមាណ ជាង ៨០,៨០០ ដុល្លារអាមេរិក សម្រាប់ពលរដ្ឋម្នាក់ៗ ស្វីស​ ក៏ជាកន្លែងមនុស្សស្ទើរទូទាំងពិភពលោក ប្រាថ្នាចង់រស់នៅ និងជាប្រជាជាតិមានសេវាសុខាភិបាលស្តង់ដារសកលលោក ដោយមានសេវា​ធានារ៉ាប់រងសុខភាពគ្រប់ពលរដ្ឋ​ស្វីសទាំងអស់ ដោយឈរនៅលេខរៀងទី៣ នៃតារាងវាយតម្លៃរបស់វិទ្យាស្ថាន Legatum Institute ដោយពលរដ្ឋម្នាក់ៗអាចរស់នៅជាមធ្យមដល់អាយុ ៨២ឆ្នាំ។ ៤- ប្រទេស ជប៉ុន ជប៉ុន ជាប្រទេសជាដែនកោះដ៏ខ្លាំងក្លាមួយក្នុងទ្វីបអាស៊ីប ជាប្រទេសមានសេដ្ឋកិច្ចធំបំផុតលំដាប់ទី៣លើពិភពលោក ជាទឹកដីមួយដែលពលរដ្ឋអាចទទួលបានចំណូលប្រចាំឆ្នាំជាមធ្យមជាង ៤០,៨០០ ដុល្លារអាមេរិក។ ក្រៅពីជាប្រទេសមានសេដ្ឋកិច្ចដ៏ខ្លាំងក្លាហើយនោះ ជប៉ុនក៏ជាប្រទេស​មានសេវាសុខមាលភាពសាធារណៈដ៏អស្ចារ្យដូចគ្នា អាចឈរនៅលេខរៀងទី៤ លើកំពូលតារាងវាយតម្លៃរបស់វិទ្យាស្ថាន Legatum Institute ខណៈពលរដ្ឋជប៉ុនជាធម្យមអាចរស់បានដល់អាយុ ៨៣ឆ្នាំ។ ៥- ប្រទេស ហូឡង់ ហូឡង់ ដែលស្ថិតនៅភាគខាងលិចទ្វីបអឺរ៉ុប គឺជាប្រទេសដ៏សុខដុមរម្យនាមួយ ជាប្រទេសធ្លាប់ឈរលើកំពូលតារាង វាយតម្លៃប្រព័ន្ធសុខមាលភាពសាធារណៈរបស់សហភាពអឺរ៉ុបឆ្នាំ២០១៥ ជាប្រទេសមានសេដ្ឋកិច្ចរឹងមាំ​ឈរនៅលេខរៀងទី ១៣ សម្រាប់ចំណូលប្រចាំឆ្នាំជាមធ្យមនៃពលរដ្ឋម្នាក់ជាង ៥៥,០០០ ដុល្លារអាមេរិក។ ក្នុងឆ្នាំ២០១៥ ប្រទេសនេះ គឺមានស្តង់ដារ និងប្រព័ន្ធសុខមាលភាពសាធារណៈល្អបំផុតលើលោកវាយតម្លៃ​ដោយ​សហភាពអឺរ៉ុប ជាមួយពិន្ទុ ៩១៦ នៃពិន្ទុសរុប ១០០០ ប៉ុន្តែសម្រាប់​តារាងវាយតម្លៃរបស់វិទ្យាស្ថាន Legatum Institute ហូឡង់គឺស្ថិតនៅលេខរៀងទី៥ ជាប្រទេសមានប្រព័ន្ធសុខមាលភាពសាធារណៈល្អបំផុតលើលោក៕   ដោយ៖ សុវណ្ណមុនីលីតា