កំណើនសេដ្ឋកិច្ចកម្ពុជានៅតែបន្តកើនឡើងក្នុងកម្រិតខ្ពស់ធៀបនឹងរយៈពេល៦ឆ្នាំចុងក្រោយនេះ
កំណើនសេដ្ឋកិច្ចកម្ពុជាក្នុងឆ្នាំ២០១៨ ត្រូវបានប៉ាន់ប្រមាណថាកើនឡើងក្នុងអត្រា ៧,៣% ជាកម្រិតខ្ពស់ធៀបនិងអត្រាកំណើនរយៈពេល៦ឆ្នាំចុងក្រោយ និងខ្ពស់ជាងអត្រាកំណើនមធ្យមនៃប្រទេសកំពុងលូតលាស់ និងប្រទេសក្នុងតំបន់ផងដែរ។ នេះគឺដោយសារតែវិស័យកាត់ដេរ សំណង់ និងទេសចរណ៍ បន្តមានកំណើនក្នុងអត្រាពីរខ្ទង់ក្នុងបរិយាកាសរីកចម្រើននៃសេដ្ឋកិច្ចពិភពលោក និងដោយមានការគាំទ្រដោយគោលនយោបាយសារពើពន្ធវិត្ថារកម្ម គោលនយោបាយរូបិយវត្ថុ និងផ្លែផ្កានៃវិស័យធនាគារនិងវិស័យដទៃទៀត។ នេះបើយោងតាមរបាយការណ៍របស់ធនាគារជាតិនៃកម្ពុជា។
វិនិយោគផ្ទាល់ពីបរទេស (FDI)បន្តកើនឡើងក្នុងអត្រាខ្ពស់ (១២%) ជាពិសេសវិស័យធនាគារ អចលនទ្រព្យ និងកាត់ដេរ ហើយបានគាំទ្រជញ្ជីងទូទាត់ឲ្យមានអតិរេប្រមាណ ៤,៥% នៃផលិតផលក្នុងស្រុកសរុប (ផ.ស.ស)។ មួយវិញទៀត ការនាំចេញរបស់កម្ពុជាបានកើនឡើងគួរឲ្យកត់សម្គាល់ ជាពិសេសផលិតផលកាត់ដេរត្រូវបានប៉ាន់ស្មានថាកើនឡើង ២៤,៧% ស្របពេលដែលការនាំចេញផលិតផលមួយចំនួនត្រូវបានកើនឡើងក្នុងអត្រាពីរទៅបីខ្ទង់ ដូចជាការនាំចេញអង្ករកើន ២៣% ទោចក្រយានយន្តកើន១២% និងគ្រឿងបន្លាស់រថយន្តកើន៣ដង។
ក្នុងនោះផងដែរវិស័យធនាគារបានចាក់ឬសទៅក្នុងវិស័យសេដ្ឋកិច្ចយ៉ាងរឹងមាំដោយបានជម្រុញឲ្យមានភាពស៊ីជម្រៅផ្នែកហិរញ្ញវត្ថុ (M2/GDP) កើនដល់ ៧៨% ធៀបនឹង៧៣% នៅឆ្នាំ២០១៧ ហើយទ្រព្យសកម្មសរុបបានកើនឡើងដល់ ១៧៤% នៃផ.ស.ស (កើន២០%)។ ទន្ទឹមនោះជំនឿទុកចិត្តពីសាធារណៈជនមកលើធនាគារនិងគ្រឹះស្ថានហិរញ្ញវត្ថុត្រូវបានពង្រឹង និងបានជម្រុញឲ្យប្រាក់បញ្ញើរកើនដល់ ៩១% នៃផ.ស.ស (កើន ១៦%)។
ជាមួយគ្នានេះឥណទានចំពោះវិស័យឯកជនបានកើនឡើងដល់ ១០២%នៃផ.ស.ស (កើន ២០,១%) ដែលបានគាំទ្រដល់ការធ្វើពិពិធកម្មមូលដ្ឋានកំណើនសេដ្ឋកិច្ចប្រកបដោយចីរភាព និងបរិយាប័ន្ន។ ជាមួយគ្នានេះ វិស័យធនាគាបានចូលរួមចំណែកអនុវត្តគោលនយោបាយរបស់រាជរដ្ឋាភិបាល ក្នុងការកាត់បន្ថយភាពក្រីក្រ ដោយបានបង្កើនបរិយាប័ន្នហិរញ្ញវត្ថុជាលំដាប់ដែលបច្ចុប្បន្ន ៦៩% នៃប្រជាជនពេញវ័យទទួលបានសេវាហិរញ្ញវត្ថុ ស្របពេលដែលចំណេះដឹងពីការប្រើប្រាស់សេវាហិរញ្ញវត្ថុត្រូវបានពង្រឹងជាប្រចាំ៕
អត្ថបទដោយ៖ ជួប ស្រីរ័ត្ន
