៣ ចំណុចដែលអ្នកគួរដឹងពីស្ថានភាពអ្នកមាននៅជុំវិញសាកលលោកនៅក្នុងឆ្នាំ ២០១៨ កន្លងទៅ
នេះគឺជាព័ត៌មានដ៏គួរឲ្យចាប់អារម្មណ៍មួយថ្មីទៀតស្តីពីអ្នកមានបំផុតនៅលើសាកលលោកសម្រាប់ឆ្នាំ ២០១៨ កន្លងទៅ។ ក្រុមសេដ្ឋី និងមហាសេដ្ឋីចំណូលថ្មីត្រូវបានគេរកឃើញថា បានកើនឡើង ២% ទៀតកាលពីឆ្នាំ ២០១៨ កន្លងទៅនេះបើយោងតាមរបាយការណ៍ស្រាវជ្រាវរបស់ក្រុមហ៊ុន Wealth-X។
ការស្រាវជ្រាវខាងលើបានបញ្ជាក់ថា ក្រុមអ្នកមានដែលមានទ្រព្យសម្បត្តិស្តុកស្តម្ភនៅលើសកលលោកគឺមានចំនួនសរុប ២៣ លានអ្នកនៅក្នុងឆ្នាំ ២០១៨ កន្លងទៅ និងបានកាន់កាប់ទ្រព្យសម្បត្តិសរុប ៦២ ពាន់ពាន់លានដុល្លារ។ អាមេរិកគឺជាទឹកដីទី១ ដែលមានសេដ្ឋី និងមហាសេដ្ឋីកាន់កាប់ទ្រព្យសម្បត្តិច្រើនជាងគេរហូតដល់ទៅ ៤០% នៃទ្រព្យសម្បត្តិសរុបរបស់អ្នកមានទាំងនេះ។ ក្រុមសេដ្ឋី និងមហាសេដ្ឋីទាំងនេះត្រូវបានកំណត់ទ្រព្យសម្បត្តិចាប់ពី ១ លានដុល្លារឡើងទៅ។
១. តើក្រុមសេដ្ឋី និងមហាសេដ្ឋីទាំងនេះបរិច្ចាគប្រាក់ទៅលើអ្វីខ្លះ?
ក្រុមសេដ្ឋី និងមហាសេដ្ឋីនៅលើសាកលលោកត្រូវបានគេទទួលស្គាល់ថា ជាបុគ្គលដែលបរិច្ចាគប្រាក់ច្រើនជាងគេបំផុត។ សកម្មភាពមនុស្សធម៌ គឺជាកិច្ចការសំខាន់បំផុតមួយនៅក្នុងចំណោមកិច្ចការផ្សេងទៀតដែលក្រុមអ្នកមាននៅលើពិភពលោកបានធ្វើដោយក្នុងនោះសេដ្ឋី ៣៦% និងមហាសេដ្ឋី ៥៧% បានបរិច្ចាគប្រាក់លើសកម្មភាពមនុស្សធម៌នេះ។
សកម្មភាពមនុស្សធម៌ទាំងនោះមានដូចជា ការផ្តល់មូលនិធិសម្រាប់ជួយទ្រទ្រង់ដល់វិស័យអប់រំ សេវាកម្មសង្គម សិល្បៈ វប្បធម៌ និងសុខភាព។ បន្ទាប់មកគឺការផ្តល់មូលនិធិសម្រាប់អាជីវកម្មដែលផ្តោតលើហិរញ្ញវត្ថុ កីឡា និងការកម្សាន្ត។ ក្រុមអ្នកមានទាំងនេះក៏ចូលចិត្តចំណាយប្រាក់ច្រើនសន្ធឹកសន្ធាប់ដែរទៅលើសកម្មភាពកម្សាន្តប្រចាំថ្ងៃរបស់ខ្លួនដូចជា ការលេងកូនគោល (Golf) ជាកីឡាដែលអ្នកមានចូលចិត្តបំផុត បាល់បោះ ជិះស្គី បាល់ទាត់ជាដើម។
២. តើអ្នកមានជាងគេបំផុតទាំងនោះជានរណាខ្លះ?
ក្រុមសេដ្ឋី និងមហាសេដ្ឋីដែលជាបុរសនៅតែឈរនៅលេខរៀងច្រើនជាងគេ។ នៅក្នុងចំណោមសេដ្ឋីទាំងនោះមានស្ត្រី ត្រឹមតែ ១៦% ប៉ុណ្ណោះ និងមហាសេដ្ឋីជាស្រ្តីមានចំនួន ១៤%។ ជាង ៤០% នៃអ្នកមានទាំងអស់ក្នុងសាកលលោក បានរស់នៅទ្វីបអាមេរិកខាងជើង ខណៈដែល១ភាគ៤ ផ្សេងទៀតរស់នៅទ្វីបអឺរ៉ុប និង ១ភាគ ៤ផ្សេងទៀតរស់នៅក្នុងតំបន់អាស៊ី។
អាមេរិកឈរលំដាប់ទី១ ដែលមានអ្នកមានកាន់កាប់ទ្រព្យសម្បត្តិច្រើនជាងគេ បន្ទាប់មកគឺចិនឈរនៅលេខ២ ជប៉ុនលេខ៣ អាល្លឺម៉ង់លេខ៤ និងអង់គ្លេសលេខ៥។ ក្រុមប្រទេសដែលសំបូរអ្នកមានជាងគេបំផុតទាំង១០ នៅលើសាកលលោកបានក្តោបក្តាប់ទ្រព្យសម្បត្តិស្មើនឹង ៣ភាគ៤ នៃទ្រព្យរបស់ក្រុមអ្នកមានទាំងអស់នៅលើពិភពលោក។
ទីក្រុងញីវយ៉កជាប់លំដាប់ថ្នាក់ជាទីក្រុងដែលសំបូរអ្នកមានរស់នៅច្រើនជាងគេបំផុតនៅលើពិភពលោក ប៉ុន្តែចំនួននេះបានធ្លាក់ចុះប្រហែលពាក់កណ្តាលនៅក្នុងឆ្នាំ ២០១៨ កន្លងទៅពោលគឺមានចំនួនប្រហែលក្រោម ១ លានអ្នក។ ក៏ប៉ុន្តែអ្នកមានទាំងនេះក្តោបក្តាប់ទ្រព្យសម្បត្តិច្រើនជាងរបស់ក្រុមអ្នកមានកំពូលៗរបស់ជប៉ុនដែលឈរនៅលេខរៀងទី២ដល់ទៅ ៦៥%។
ហុងកុងជាប់ចំណាត់ថ្នាក់លេខ១ជាទីក្រុងដែលមានពលរដ្ឋរបស់ខ្លួនក្លាយជាសេដ្ឋីច្រើនជាងគេបំផុត ពោលគឺច្រើនជាង ១ ម៉ឺននាក់។ យ៉ាងណាមិញ ទ្រព្យសម្បត្តិរបស់អ្នកមានទាំងនោះបានធ្លាក់ចុះសរុបអស់ ១១% កាលពីឆ្នាំ ២០១៨ កន្លងទៅដោយសារតែភាពល្អក់កករដែលកើតចេញពីជម្លោះសង្គ្រាមពាណិជ្ជកម្មរវាងអាមេរិក និងចិន។ ចំណែកឯប្រទេសដែលគេរំពឹងថា នឹងមានកំណើនអ្នកមានច្រើនជាងគេបំផុតនោះរួមមាន នីហ្សេរីយ៉ា អេហ្ស៊ីប បង់ក្លាដេស និងវៀតណាម។
៣. តើអ្នកមានទាំងនេះរកលុយបានមកពីណា?
នៅក្នុងចំណោមក្រុមសេដ្ឋី និងមហាសេដ្ឋីនៅជុំវិញពិភពលោក មានបុគ្គលមួយចំនួនតូចគឺ ប្រមាណ ៥% ប៉ុណ្ណោះដែលមានទ្រព្យសម្បត្តិច្រើនដោយសារតែទទួលបានតាមរយៈទាយាទ ឬកេរមរតក។ ៨៤% នៃក្រុមសេដ្ឋី និងមហាសេដ្ឋីទាំងនោះរកចំណូលបានដោយខ្លួនឯងតាមរយៈការបង្កើតក្រុមហ៊ុន ឬបង្កើតមុខជំនួញដោយខ្លួនឯង និងប្រហែល ១២% ទៀតមានទ្រព្យសម្បត្តិពីមុខជំនួញផង និងពីកេរមរតកផង។
របាយការណ៍ខាងលើបានចង្អុលបង្ហាញទៀតថា ខណៈដែលវិសមភាពនៃការកាន់កាប់ទ្រព្យសម្បត្តិនៅលើពិភពលោកមានការកើនឡើងកាន់តែ ខ្លាំងនៅក្នុងរយៈពេលប៉ុន្មានទសវត្សចុងក្រោយ ក្រុមអ្នកមានដែលបានមកពីកេរមរតកមានការធ្លាក់ចុះ។ ចំណែកអ្នកមានដែលកសាងទ្រព្យសម្បត្តិដោយខ្លួនឯង មានការកើនឡើងពីមួយឆ្នាំទៅមួយឆ្នាំ។ វិស័យសំខាន់ៗដែលធ្វើឲ្យអ្នកមាននៅលើសាកលលោកកសាងទ្រព្យសម្បត្តិយ៉ាងច្រើនមហាសាលនោះរួមមាន វិស័យហិរញ្ញវត្ថុ អាជីវកម្ម និងការវិនិយោគឈរនៅលេខរៀងទី១ ស្របពេលដែលវិស័យឧស្សាហកម្មឈរនៅលេខរៀងទី២ បច្ចេកវិទ្យាឈរនៅលេខរៀងទី៣ អាជីវកម្មសេវាកម្មទី៤ និងសំណង់ឈរនៅលេខរៀងទី៥៕
ប្រភព៖ cnn
