ចង់ទទួលបានការកាត់បន្ថយនិងការលើកទឹកចិត្តពន្ធដារ ម្ចាស់ក្រុមហ៊ុនឬសហគ្រាសគួរស្វែងយល់ចំណុចទាំងនេះ
ដើម្បីចូលរួមនៅក្នុងការអភិវឌ្ឍន៍វិស័យមូលបត្រកម្ពុជា ច្បាប់ហិរញ្ញវត្ថុមាត្រា១២បានអនុញ្ញាតឲ្យមានការលើកទឹកចិត្តទាំងក្រុមហ៊ុនដែលបោះផ្សាយមូលបត្រកម្មសិទ្ធិ និងមូលបត្របំណុល ព្រមទាំងវិនិយោគិនសាធារណៈ ដោយអាចទទួលបានការលើកទឹកចិត្តនេះតាមរយៈអនុក្រឹត្យ។ នៅក្នុងសិក្ខាសាលាស្ដីអំពី “ការលើកទឹកចិត្តពន្ធដារក្នុងវិស័យមូលបត្រ” លោកស្រី សុខ សុគន្ធជីវី ប្រធាននាយកដ្ឋានកិច្ចការគតិយុត្ត បានធ្វើការបកស្រាយទាក់ទងអំពីលក្ខខណ្ឌ និងនិតិវិធីស្នើសុំដើម្បីទទួលបានការលើកទឹកចិត្តពន្ធដារ ដែលមានសេចក្ដីដូចខាងក្រោម៖
លោកស្រី សុគន្ធជីវី បានលើកឡើងថា ដើម្បីទទួលបានការលើកទឹកចិត្តពន្ធដារ ក្រុមហ៊ុនឬសហគ្រាសត្រូវតែជាក្រុមហ៊ុនបោះផ្សាយមូលបត្រកម្មសិទ្ធិ ឬបំណុល ដោយធ្វើការចុះបញ្ជីលើទីផ្សារមូលបត្រប្រតិស្រុត ឬផ្សារមូលបត្រកម្ពុជា(CSX) ដោយត្រូវតែជាការចុះផ្សាយលើកដំបូងនិងជាសាធារណៈ និងទទួលបានការអនុញ្ញាតពី គ.ម.ក។ ទីពីរ ការចុះផ្សាយមូលបត្រត្រូវតែទទួលបានការអនុញ្ញាតពី គ.ម.ក ហើយត្រូវបានធ្វើការចុះបញ្ជីរយៈពេល៣ឆ្នាំបន្ទាប់ពីអនុក្រឹត្យចុះជាធរមាន។ ក្នុងនោះចំពោះក្រុមហ៊ុនដែលបោះផ្សាយមូលបត្រឬចុះបញ្ជីរួចហើយ ក៏អាចទទួលបានការលើកទឹកចិត្តពន្ធ៥០%នៃប្រាក់ចំណូលផងដែរ។
លោកស្រីលើកឡើងថា ប្រភេទពន្ធនៃការលើកទឹកចិត្តសម្រាប់ក្រុមហ៊ុនឬសហគ្រាសមានពីរប្រភេទគឺ ទីមួយពន្ធលើប្រាក់ចំណូល ដែលត្រូវបានកាត់បន្ថយ៥០%លើប្រាក់ចំណូលដែលត្រូវបង់រយៈពេល៣ឆ្នាំ។ ជាមួយគ្នានេះសម្រាប់ការលើកទឹកចិត្តពន្ធលើប្រាក់ចំណូលរយៈពេល៣ឆ្នាំ លោកស្រីបានបន្តដោយលើកជាឧទាហរណ៍ថា៖ ប្រសិនបើក្រុមហ៊ុនធ្វើការបោះផ្សាយលក់មូលបត្រកម្មសិទ្ធិឬមូលបត្របំណុលក្នុងរយៈពេល៦ខែដើមឆ្នាំ នោះក្រុមហ៊ុននឹងទទួលបានការលើកទឹកចិត្តក្នុងឆ្នាំនោះតែម្ដង ដោយការលើកទឹកចិត្តដែលគាត់នឹងទទួលបានគឺការកាត់បន្ថយ ៥០%នៃពន្ធលើប្រាក់ចំណូលដែលត្រូវបង់សម្រាប់ឆ្នាំ២០១៩, ២០២០, និង២០២១។
ដោយឡែក ឧទាហរណ៍ថាក្រុមហ៊ុនដដែល បានធ្វើការបោះផ្សាយលក់ក្នុងកំឡុងពេល៦ខែចុងឆ្នាំគឺចាប់ពីខែកក្កដាទៅ និងទទួលបានការលើកទឹកចិត្តពន្ធនៅឆ្នាំបន្ទាប់ គឺពីឆ្នាំ២០២០, ២០២១ និង២០២២។ ជាមួយគ្នានេះក្រុមហ៊ុនក៏អាចទទួលបានការលើកទឹកចិត្តផ្នែកពន្ធផងដែរ ក្នុងករណីកំឡុងពេលណាមួយដែលទទួលបានការអនុញ្ញាតពីរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។
លោកស្រីបន្តថា ការលើកទឹកចិត្តទីពីរគឺការអនុគ្រោះបំណុលដែលកំពុងទទួលបានការគាំទ្រខ្លាំង ដោយក្នុងនោះការអនុគ្រោះបំណុលពន្ធរួមមាន ពន្ធលើប្រាក់ចំណូលទាំងស្រុង, ពន្ធកាត់ទុក, អាករលើតម្លៃបន្ថែម, អាករពិសេសលើទំនិញ ឬសេវាមួយចំនួន និងអាករបំភ្លឺសាធារណៈ ដោយការអនុគ្រោះពន្ធបំណុលនេះគឺចែកជាពីរទីផ្សារទៀតគឺ ទីផ្សារគោល និងទីផ្សារកំណើន។ ក្នុងករណីក្រុមហ៊ុនទទួលបានការអនុញ្ញាតចុះបញ្ជីនៅទីផ្សារគោល បំណុលពន្ធដែលគាត់ទទួលបានគឺគិតចាប់ពីកាលបរិច្ឆេត N-3 ដល់ N-10 (N ជាឆ្នាំដែលក្រុមហ៊ុន/សហគ្រាសធ្វើការបោះផ្សាយមូលបត្រជាសាធារណៈលើកដំបូង)។ ជាមួយគ្នានេះក្នុងករណីមួយទៀតគឺទីផ្សារកំណើន ដោយគាត់ជាសហគ្រាសធុន់តូចនិងមធ្យមវិញបំណុលពន្ធនិងគិតចាប់ពីឆ្នាំ N-2 ដល់ N-10៕
អត្ថបទដោយ៖ ជួប ស្រីរ័ត្ន
