យោង​តាម​បណ្តាញសង្គម Twitter របស់ Emirate កាលពី​ថ្ងៃទី​ ១៣ កុម្ភៈ ឆ្នាំ ២០១៩ បាន​ឲ្យ​ដឹង​ថា ក្រុម​ហ៊ុន​ Emirates នឹង​ដាក់​ដំណើរ​ការ​សេវា​​ហោះ​ហើរ​ប្រចាំ​ថ្ងៃភ្ជាប់​ពី​ភ្នំ​ពេញ និង ទីក្រុងបាងកក ​ចាប់​ពី​ ថ្ងៃទី​ ០១ មិថុនា​ ខាង​មុខ​នេះ។ ​ ជើង​ហោះ​ហើរ​ពី​ភ្នំពេញទី​ក្រុង​ឌូ​បៃតាម​រយៈទីក្រុង​បាង​កក នឹង​ផ្តល់​ជម្រើស​ហោះហើរ​កាន់​តែ​ច្រើន​ទៅ​ដល់​អ្នក​ដំណើរ​រវាង​ទីក្រុង​នៃប្រទេស​កម្ពុជា និង​ប្រទេស​ថៃ។ អ្នក​ទេសចរពី​បណ្តា​ប្រទេស​ក្នុង​តំបន់​ប្រជាជាតិ​អាស៊ី​អាគ្នេយ៍នឹង​រីក​រាយជាមួយ​ការ​ភ្ជាប់​ទំនាក់​ទំនងទៅ​ ១៥០គោល​ដៅ ក្នុង ៨៦​ប្រទេសនិងដែន​ដី។ ក្នុង​ការ​ដាក់​ដំណើរ​ការ​ផ្លូវ​ថ្មី​នេះ​នឹង​ហោះហើរជាមួយ​យន្ត​ហោះ​ Boeing 777 ដោយ​ចេញ​ដំណើរ​ពី​ទី​ក្រុង​ឌូបៃ (Dubai International Airport DXB) នៅម៉ោង​ 8:45នាទីព្រឹក តាមជើង​ហោះហើរ EK370 និង​ទៅ​ដល់​ទីក្រុង​បាង​កកនៅម៉ោង 6:15នាទីល្ងាច។ ជើង​ហោះរហើរ​ដដែល​នេះ នឹង​ចេញ​ដំណើរពី​ទីក្រុង​បាង​កកនៅ​ម៉ោង 8:00នាទីយប់ ហើយ​​ទៅ​ដល់​អាកាស​យាន្ត​ដ្ឋាន​អន្តរជាតិ​ភ្នំពេញនៅ​ម៉ោង 9:25នាទីយប់។ ចំពោះ​ការ​ហោះ​ត្រឡប់ទៅ​ទីក្រុងឌូ​បៃ​វិញ ជើង​ហោះហើរ EK371 នឹង​ចេញពី​ភ្នំពេញ​នៅ​ម៉ោង 11:20នាទី​យប់ និង​ទៅ​ដល់​ទីក្រុង​បាង​កកនៅ​ម៉ោង 12:40នាទី​រំលង​អាធ្រាត។ ​វា​នឹង​ហោះ​ចេញទៅទីក្រុង​ឌូ​បៃ​នៅ​ម៉ោង 2:25នាទី​អាធ្រាត និង​ទៅ​ដល់នៅម៉ោង 5:35នាទី​ព្រឹកម៉ោងនៅ​​ក្នុង​ស្រុក។ គួរ​បញ្ជាក់ផង​ដែរ​​ថា Emirates បាន​បើក​ដំណើរ​ការ​ដឹក​អ្នក​ដំណើរច្រើនជាង ១០០,០០០នាក់ ​ទៅ​ភ្នំពេញ តាំងពី​ខែ កក្កដា ឆ្នាំ ២០១៧ កន្លង​មក៕ ដោយ៖ ទីន ម៉ាទី​យ៉ា ប្រភព÷ Emirate Twitter