តាម​សេចក្តី​ប្រកាស​ព័ត៌​មាន​របស់​បណ្តាញ​សង្គម​ផ្លូវ​កា​រ​របស់ ​ក្រុម​ប្រឹក្សា​អភិ​វឌ្ឍន៍​កម្ពុជា (CDC) បាន​ឲ្យ​ដឹងកាល​ពី​ថ្ងៃ​ទី ២០ កុម្ភៈ ២០១៩ ​ថា “សម្រេច​ចេញ​វិញ្ញា​បន​បត្រ​ចុះបញ្ជី​ជាស្ថាពរជូន​ដល់ ក្រុម​ហ៊ុន Big C Supercenter (Cambodia) CO.,LTD ក្នុង​គម្រោង​បង្កើត​មជ្ឍ​មណ្ឌល​ពាណិជ្ជកម្ម ដែល​មាន​​ទីតាំង​វិនិយោគ​ស្ថិត​នៅភូមិ​ក្បាល​ស្ពាន​១ សង្កាត់​ប៉ោ​យប៉ែត​ ក្រុង​ប៉ោយ​ប៉ែត ខេត្ត​បន្ទាយ​មាន​ជ័យ ដែលមាន​ទុន​វិនិយោគ​ប្រមាណ​ ៦,៨​ លាន​ដុល្លារ​អាមេរិច និងអាច​បង្កើត​ការងារ​បាន​ចំនួន ១,២២២ កន្លែង។”​ គួរ​បញ្ជាក់​ផង​ដែរ​ថា ប៊ីកស៊ី Big C ឬ Big C Supercenter (บิ๊กซี ซูเปอร์เซ็นเตอร์) គឺជា​កន្លែង​លក់​រាយ​គ្រឿង​ទេស និង​ទំនិញប្រើ​ប្រាស់​ឧបភោគ​បរិភោគ​ទូទៅ​ ដែល​ស្ថិត​ក្នុង​ទម្រង់​ជា​ម៉ាត​ខ្នាត​ធំ (hypermart) ​មាន​ស្នាក់​ការ​កណ្តាល​នៅ​ក្នុ​ងទីក្រុង​បាង​កក ប្រទេស​ថៃ។ ប៊ីក​ស៊ី ​គឺ​ជា​ប្រតិ​បត្តិ​ករ​ផ្សារ​ទំនើប​ធំ​លំដាប់​ទី​២ ក្នុង​ឆ្នាំ ២០១៦ បន្ទាប់​ពី Tesco Lotus។ វាមាន​ប្រតិ​បត្តិការ​នៅ​ក្នុង​ ៣​ប្រទេស​គឺ ថៃ វៀត​ណាម និង​ឡាវ ក្រោយ​មកក៏​​មាន​​ការ​រួមបញ្ចូលធុរកិច្ច​គ្នា​​របស់ Carrefour (ដែលជា​ក្រុម​ហ៊ុនអន្តរជាតិ​មួយ​ផ្នែក​លក់​រាយរបស់​បារាំង បើក​ដំណើរ​ការ​នៅ​ប្រទេស​ជាង ៣០ ក្នុង​ពិ​ភព​លោក​)​​ ហើយ​បច្ចុប្បន្នមានសាខា​ទាំង​អស់ ១៨៥ ដែលបាន​បែង​ចែក​ជា​ ប៊ីក​ស៊ី​ស៊ូភើ​សែនធើ (BigC Supercenter) ១៣៣សាខា ប៊ីក​ស៊ី​អ៊ិច​ត្រា (BigC Extra) ១៦សាខា និងប៊ីក​ស៊ី​ម៉ាខេត (BigC Market) ៣៣សាខា។  ដោយ​មានហាង​ដែល​ជា​​បុត្រ​សម្ព័ន្ធប្រតិបត្តិការ​ចំនួន​ ៦៩៧ ក្នុង​ប្រទេស​ថៃគិត​ត្រឹម​ខែកញ្ញា​ឆ្នាំ ២០១៥។ ​ក្រុមហ៊ុន​បាន​បង្ហាញ​ពី​ប្រាក់​ចំណេញ​សុទ្ធ​ចំនួន​ ៣៨លាន​ដុល្លារសម្រាប់ចុង​​ត្រី​មាស​ទី​៣ ២០១៥។​ ប៊ីក​ស៊ី​បាន​ឲ្យ​និយម​ន័យ​នៃ​ពាក្យ “Big C” ថា៖ _ Big គឺ​អ្វី​ដែល​មាន​ខ្នាត​ធំ មានកា​រផ្តល់​​សេវាកម្មងាយ​ស្រួល​ដល់​អតិថិ​ជន និង​មាន​ទំនិញ​ច្រើន​មុខ​ច្រើនប្រភេទ​ដើម្បី​បម្រើ​ដល់​តម្រូវ​ការ​របស់អតិថិជន​។ _ C សំដៅ​ដល់​អតិថិជន​ដែល​តែង​តែ​គាំទ្រ​ប៊ីក​ស៊ី​រហូត​មក៕ ដោយ៖ ទីន​ ម៉ាទី​យ៉ា ប្រភព៖ ក្រុម​ប្រឹក្សា​អភិ​វឌ្ឍន៍​កម្ពុជា (CDC)