ក្រុមហ៊ុនអាកាសចរណ៍វៀតណាមចំនួនពីរបានបញ្ជាទិញយន្តហោះ ១១០គ្រឿងពីក្រុមហ៊ុន ប៊ូអ៊ិង
តាមការចេញផ្សាយដោយសារព័ត៌មាន Bloomberg កាលពីថ្ងៃទី ២៧ កុម្ភៈ កន្លងទៅបានឲ្យដឹងថា ក្រុមហ៊ុនអាកាសចរណ៍វៀតណាម Bamboo Airways និង VietJet Aviation JSC បានចុះហត្ថលេខាព្រមព្រៀងក្នុងការបញ្ជាទិញយន្តហោះពីក្រុមហ៊ុនប៊ូអ៊ិង (Boeing Co.) អំឡុងពេលជំនួបកំពូលរវាងប្រធានាធិបតីសហរដ្ឋអាមេរិក ដូណាល់ត្រាំ និង ប្រធានាធិបតីកូរ៉េខាងជើងលោក គីម ជុងអ៊ុន។
ក្រុមហ៊ុន Bamboo យល់ព្រមទិញ Dreamliners ចំនួន ១០ គ្រឿងក្នុងតម្លៃ ៣ពាន់លានដុល្លារអាមេរិច ខណៈដែល VietJet Aviation JSC បញ្ជាទិញយន្តហោះ Boeing 737 Max ១០០ គ្រឿង មានតម្លៃ ១២.៧ ពាន់លានដុល្លារ នេះបើតាមការឲ្យដឹងពីក្រុមហ៊ុន Boeing កាលពីថ្ងៃពុធកន្លងទៅ។
ការបញ្ជាទិញ Boeing 737 Max ១០០ គ្រឿងនេះជាប្រភេទយន្តហោះដែលមានតួខ្លួនតូចៗ ដើម្បីយកមកជំនួសយន្តហោះចាស់។ ហើយយន្តហោះថ្មីនេះសម្រាប់ធ្វើការដឹកជញ្ជូននៅចន្លោះឆ្នាំ ២០២០ និង ២០៣០ តាមរយៈការផ្តល់កិច្ចសម្ភាសន៍ដោយកាយកប្រតិបត្តិ VietJet Aviation JSC លោក ឌួង ទ្រីតាញ់ កាលពីសប្តាហ៍មុន។
គួរបញ្ជាក់ផងដែរថា កាលពីពេលថ្មីៗនេះវៀតណាមទើបទទួលបានការអនុញ្ញាតឲ្យមានការហោះហើរត្រង់ទៅសហរដ្ឋអាមេរិក ហើយការទិញយន្តហោះនេះក៏សម្រាប់ការហោះហើរទៅកាន់ California ដូចគ្នា៕
ដោយ៖ ទីន ម៉ាទីយ៉ា
ប្រភព៖ Bloomberg
