ភាពខុសគ្នារវាង Content Writing និង Copy Writing
បរិបទនៃការសរសេរមានច្រើនបែប ច្រើនទម្រង់ ច្រើនសណ្ឋាន។ យ៉ាងណាមិញការសរសេរជាលក្ខណៈការកម្សាន្ត និងការសរសេរលេងពាក្យពេចន៍ដើម្បីឃោសនាអ្វីមួយក៏មានភាពខុសប្លែកគ្នាដែរ។ ក្រលែកមកមើលពីការសរសេរបែប Content Writing និង Copy Writing ថាមានលក្ខណៈខុសគ្នាយ៉ាងណា តោះទៅមើលការបកស្រាយខាងក្រោម។
១) Content Writing គឺជាការសរសេរបែបកម្សាន្ត បែបល្បួងដាក់គន្លឺះបង្កប់អត្ថន័យល្អៗ សរសេរអត្ថបទដែលមានប្រយោជន៍ ធ្វើយ៉ាងណាទាក់ចិត្តអ្នកអាន (online audiences) ឲ្យនៅតែបន្តចូលមើល តាមដានគេហទំព័ររបស់យើងបន្តទៀត។ វាបង្កើតនូវតម្លៃការសរសេរ មានន័យថាបង្កើតខ្លឹមសារដ៏មានតម្លៃដែលត្រូវបានផ្តល់ជូននូវគោលបំណងជាក់លាក់មួយ ដូចជាការធ្វើជំនួញ ទីផ្សារ ពាណិជ្ជកម្មជាដើម។ ជាទូទៅ Content Writing ទាក់ទាញអតិថិជនគោលដៅ និងបង្ហាញគេពីផលិតផលឬសេវាកម្មនៃយីហោណាមួយតាមរយៈការប្រើប្រាស់ឬចូលទៅសេខក្តីប្រកាសព័ត៌មាន កំណត់ហេតុដែលមានលើបណ្តាញសង្គម (blogs) និងអត្ថបទនានា។ Content Writing ជួយដល់ការធ្វើទីផ្សារឲ្យកាន់តែល្អ ពិសេសចំពោះអាជីវកម្មផ្នែក Media បើយើងធ្វើ Content Writing ល្អយើងនឹងឈានដល់ការទទួលបានអ្នកអាន អ្នកចូលមើលដល់ចំនួនកំណត់ និងសម្រេចកម្មវត្ថុដែលចង់បាន។
២) Copy Writing គឺជាការសរសេរបែបធ្វើការផ្សព្វផ្សាយ ធ្វើ promotion ធ្វើទីផ្សារ (Marketing) ដើម្បីសម្រេចបានការលក់។ Copy Writing វាមានការពាក់ព័ន្ធជាមួយនឹង Content Writing តែវាមានភាពទាក់ទាញជាង ដូច្នេះវាងាយនឹងចាប់យកអ្នកមើលអ្នកអានភ្លាមៗ។ តែ Copy Writing មានភារកិច្ចធំជាងក្នុងដើម្បីធ្វើឲ្យបាននូវការលក់ពីតម្លៃដ៏ពិតប្រាកដមួយនៃទំនិញ និងសេវាកម្ម។ Copy Writing គឺជាគ្រឿងផ្សំសំងាត់ជំនួយក្នុងការសរសេរ Content Writing មានន័យថាវាបង្កើតឲ្យមានភាពពិរោះពិសា គួរឲ្យទាក់ទាញ ដាក់បញ្ចូលនូវមនោសញ្ចេតនា ផ្តល់តម្លៃខ្ពស់ដល់អត្ថបទក្នុងគោលបំណងចាប់ផ្តើម និងបោះបង្គោលយីហោរបស់អ្នកនៅលើទីផ្សារឲ្យកាន់តែរឹងម៉ាំ។ គោលបំណងចុងក្រោយនៃ Copy Writing គឺលក់ផលិតផលទំនិញឬសេវាកម្ម ដែលខុសពី Content Writing មិនព្យាយាមជំរុញឲ្យអតិថិជនទិញផលិតផលទេ គ្រាន់តែជួយឲ្យអតិថិជនបានយល់ច្បាស់ពីយីហោនិងមានការចាប់អារម្មណ៍ខ្លាំង៕
ដោយ៖ យ៉ាយ៉ា
ប្រភព៖ Search Engine Journal
