ប្រុងប្រយ័ត្ន! គ្រោះថ្នាក់បណ្តាលមកពីការបរិភោគសាច់ត្រីនិងអាហារសមុទ្រឆៅមិនបានចម្អិនត្រឹមត្រូវ
សាច់ត្រីឆៅដូចជាមាននៅក្នុង sushi ម្ហូបជប៉ុន និងអាហារសមុទ្រដទៃទៀតដែលមិនបានចម្អិនវាពិតជាឆ្ងាញ់ ប៉ុន្តែវាមានគ្រោះថា្នក់ខ្លាំងណាស់ប្រសិនបើអ្នកទទួលទានវាញឹកញាប់។
តាមការលើកឡើងរបស់សារព័ត៌មាន CNN បានបង្ហាញនូវករណីមួយពីបុរសវ័យ ៧១ឆ្នាំមួយរូបបានឆ្លងរោគ បន្ទាប់ពីការបរិភោគអាហារសមុទ្រឆៅដែលបណ្តាលឲ្យមានការប៉ះពាល់ដល់សុខភាពយ៉ាងធ្ងន់ធ្ងរ រហូតឈានដល់ការកាត់កំភួនដៃចោល។ ជំងឺនេះបានធ្វើការវិវត្តត្រឹមរយៈពេល ១២ ម៉ោងប៉ុណ្ណោះបន្ទាប់ពីការញ៉ាំអាហារ ដែលបានធ្វើឲ្យបុរសម្នាក់នោះទៅជាគ្រុនក្តៅ និងឈឺចុកចាប់ខ្លាំងត្រង់ដៃខាងឆ្វេងរបស់លោក។ បុរសម្នាក់នោះមានប្រវត្តិជំងឺទឹកនោមផ្អែមប្រភេទ ២ និងបញ្ហាសម្ពាធឈាមឡើងខ្ពស់ និងកំពុងទទួលបញ្ហាតំរងនោមតំណាក់កាលចុងក្រោយ។ បន្ទាប់ពីទទួលរងការឈឺចុកចាប់អស់រយៈពេលពីថ្ងៃ លោកក៏ត្រូវបានបញ្ជូនទៅផ្នែកសង្គ្រោះបន្ទាន់នៅមន្ទីរពេទ្យ Chonbuk National University Hospital។
ពេលទៅដល់មន្ទីរពេទ្យគេឃើញថាមានឈាមហូរតាមជើងធ្មេញ និងវិវត្តទៅជាការឡើងហើមធំក្រោមស្បែកផ្នែកកំភួនដៃឆ្វេងរបស់គាត់។ ភ្លាមៗ នេះគ្រូពេទ្យក៏បានសម្រេចធ្វើការវះ កាត់បន្ទាន់មួយ ហើយគេបានរកឃើញនូវ Vibrio vulnificus (ឈ្មោះបាក់តេរីម៉្យាងដែលជាទូទៅគេតែងរកវាឃើញនៅតាមមាត់សមុទ្រ) ដែលវាជាហេតុបង្កការឆ្លងជំងឺមួយនេះ។ ក្រោយពីមានការស្រាវជ្រាវបែបវេជ្ជសាស្រ្តមកគេបានកំណត់ថា ការបរិភោគសាច់ត្រី ក៏ដូចជាអាហារសមុទ្រឆៅមិនបានចម្អិនត្រឹមត្រូវវាបង្កជាជំងឺ និងផលវិបាកជាច្រើនដល់សុខភាព។
ខាងក្រោមនេះជាបញ្ហាដែលអាចកើតមានឡើងបណ្តាលមកពីការបរិភោគអាហាសមុទ្រមិនបានចម្អិតត្រឹមត្រូវ៖ Vibrio vulnificus ជាប្រភេទបាក់តេរីម៉្យាងដែលបណ្តាលឲ្យមានការកើតទៅ ជាការស៊ីលើផ្នែកណាមួយនៃសារពាង្គកាយ ហើយវានឹងធ្វើឲ្យឡើងអុចៗពណ៍ខ្មៅៗ និងវិវត្តិទៅជាដំបៅរលួយនៅលើស្បែក។ អ្នកជំងឺនឹងជួបបញ្ហាឈឺចុកចាប់ខ្លាំង ដែលអាចនឹងតម្រូវឲ្យកាត់អវយវៈដែលមានដំបៅនោះចោលបើវាកាន់តែធ្ងន់ធ្ងរទៅៗ។ បើបាក់តេរីនោះធ្លាក់ចូលទៅទុំលើក្រពះពោះវៀន វានឹងបណ្តាលឲ្យកើតជាការរាគរូសខ្លាំង (រាគជាទឹកសុទ្ធ) ដែលគេហៅថាជំងឺអាសន្នរោគ។ រោគសញ្ញានៃជំងឺនេះគឺមានដូចជា រាគទឹក ឈឺពោះខ្លាំង ចង្អោរ ក្អួត គ្រុន ញាក់ជាដើម។ មជ្ឈមណ្ឌលត្រួតពិនិត្យ និងការពារជំងឺឆ្លងរបស់សហរដ្ឋអាមេរិកបានធ្វើការសន្និដ្ឋានថា បាក់តេរីជាមូលហេតុនៃការឆ្លងជំងឺជាង ២០៥ ក្នុងមួយឆ្នាំៗនៅទូទាំងប្រទេស ដែលករណីខ្លះមានការតម្រូវឲ្យកាត់ជើងចោល ក្នុងនោះ ១៥ ទៅ ៣០ភាគរយនៃករណីទាំងនោះបានឈានដល់ដំណាក់កាលធ្ងន់ធ្ងរ។
បន្ទាប់ពីទទួលការវះកាត់ អ្នកជំងឺត្រូវទទួលថ្នាំផ្សះកម្រិតខ្លាំង ២ ប្រភេទ តែទោះជាយ៉ាងណាថ្នាំមិនអាចជួយឲ្យបញ្ហាដំបៅដែលរលួយនៅលើស្បែកបានស្រាក់ស្រានធូរស្បើយបានដែរ។ បន្ទាប់ពីនោះគ្រូពេទ្យអាចនឹងសម្រេចធ្វើការកាត់ចោលនូវផ្នែកដែលមានបញ្ហាដំបៅរលួយនោះ។ ប៉ារ៉ាស៊ីត Parasites ប្រជាប្រិយភាពក្នុងការបរិភោគ sushi និងអាហារសមុទ្រឆៅ មិនបានចម្អិនបានកើនឡើងនៅប្រទេសលោកខាងលិច និងកំពុងតែបង្កើននូវជំងឺដែលបង្កដោយពពួកដង្កូវ anisakid nematodes នេះបើតាមការបង្ហាញការសិក្សាជាសាធារណៈរបស់ BMJ Case Reportsកាលពីឆ្នាំមុន។ នៅពេលដែលពពួកដង្កូវទាំងនោះវានាំគ្នាប្រមូលផ្តុំនៅតាមជញ្ជាំងខាងក្នុងនៃផ្ទៃពោះ ឬនៅក្នុងពោះវៀន វាជាហេតុបង្កឲ្យមានការឈឺចាប់ដល់ក្រពះពោះវៀន និងប្រព័ន្ធរំលាយអាហារ ហើយនេះក៏បណ្តាលមកពីការបរិភោគគ្មានអនាម័យ ឬបរិភោគរបស់មិនស្អាតមិនបានចម្អិន ហើយវាក៏ បានធ្វើឲ្យអ្នកជំងឺឈឺក្នុងពោះខ្លាំង រកកល់ចង់ក្អួត ក្អួតជាដើម។ មានអ្នកខ្លះអាចឈានដល់បញ្ហារំលាយអាហារ ដូចជាការហូរឈាម ការស្ទះពោះវៀន និងទល់លាមក។
តាមការលើកឡើងពីអ្នកដែលធ្លាប់មានបទពិសោធន៍ទៅអាហារសមុទ្រឆៅនេះនឹងអាចមានប្រតិកម្មមួយចំនួនដូចជា ការហើម រមាស់ស្បែក ប្រតិកម្មអាណាហ្វីឡាក់ទិចដែលធ្វើឲ្យពិបាកដកដង្ហើម ថប់ដង្ហើមរហូតបាត់បង់ស្មារតីក៏មាន។ តែបញ្ហាទាំងនេះវាមិនចម្លងពីមនុស្សម្នាក់ទៅមនុស្សម្នាក់ឡើយ។ Salmonella Salmonella ជាប្រភេទបាកើតេរីដែលមានភាគច្រើននៅក្នុងពោះវៀនសត្វ ពិសេសសត្វជ្រូក និងបសុបក្សី ហើយនៅ សហរដ្ឋអាមេរិកមានការស្លាប់បណ្តាលមកពី salmonella កើនដល់ប្រមាណ ៤៥០ នាក់ក្នុងមួយឆ្នាំៗ ខណៈដែលអ្នកកើតជំងឺនេះមានប្រមាណ ១លានពីរសែននាក់។ សាច់ត្រី ឬអាហារសមុទ្រឆៅភាគប្រើនក៏ជាហេតុបណ្តាលឲ្យមានការពុលដោយសារបាក់តេរីមួយនេះ មិនត្រឹមតែប៉ុណ្ណោះសាច់មាន់ និងសាចគោដែលចម្អិនមិនបានឆ្អិនល្អក៏អាចមានផ្ទុកបាក់តេរីមួយនេះដែរ។ អាការៈនៃ salmonella វាបណ្តាលឲ្យអ្នកជំងឺរាគ គ្រុន និងរមួលពោះបន្ទាប់ពីការចម្លងជំងឺនិងចម្លងបាក់តេរីនេះអស់ ៧២ ម៉ោងរួចមក។
អ្នកជំងឺអាចមានសភាពធម្មតាក្នុងរយៈពេលពី ៤ ទៅ ៧ថ្ងៃចុងក្រោយ តែអ្នកជំងឺអាចមានសភាពស្រាកស្រានឡើងវិញដោយមិនបាច់ព្យាបាល តែអ្នកជំងឺមួយចំនួនចាំបាច់ត្រូវបញ្ជូកទៅមន្ទីរពេទ្យដោយសារការបាត់បង់ជាតិទឹកខ្លាំងពេកបន្ទាប់ពីរាគនិងការវិវត្តខ្លាំងនៃបាក់តេរី។ ដើម្បីកាត់បន្ថយអត្រានៃការកើតជំងឺទាំងនេះអ្នកគួរបរិភោគសាច់ត្រី អាហារសមុទ្រ និងសាច់សត្វដទៃទៀតដោយឆ្លងកាត់ការចម្អិនឲ្យបានត្រឹមត្រូវ និងប្រើកំដៅយ៉ាងតិច ៦៣ អង្សាសេ៕
ដោយ៖ យ៉ាយ៉ា ប្រភព៖ CNN
