អ្ន​កធានាទិញ​មូល​បត្រគឺ​ជា​អន្តរការីហិរញ្ញវត្ថុដែល​ផ្តល់ភាព​ខុស​គ្នា​ច្រើន​ផ្នែក​នៃ​​សេវាកម្ម​។ ​អ្ន​កធានាទិញ​មូល​បត្រភាគ​ច្រើន​មាន​ឯក​ទេសធំសំខាន់​ និង​ស្មុគ​ស្មាញផ្នែក​ប្រតិបត្តិ​ការ​ហិរញ្ញ​វត្ថុដូចជា ការ​ធានាទិញ​មូល​បត្រ សកម្ម​ភាព​អន្តរការីមូល​បត្រ​រវាង​អ្នកបោះ​ផ្សាយ​និង​វិនិយោគិន​មូល​បត្រ​ (ក្នុ​ងដំណាក់​កាល​ IPO) ធ្វើ​ការ​សម្រប​សម្រួលក្នុង​ការ​ទិញ​ ឬ​រួម​បញ្ចូលគ្នា​នៃ​ក្រុម​ហ៊ុនសាជីវកម្ម​នានា និង​សកម្ម​ភាព​ជាឈ្មួញ​ជើង​សារមូល​បត្រ​ ឬអ្នក​ផ្តល់​ប្រឹក្សា​​ហិរញ្ញ​វត្ថុ​សម្រាប់​ស្ថាប័ន​។ នៅ​ប្រទេសកម្ពុជា ​​ប្រតិបត្តិ​ករដែល​ជា​អ្ន​កធានាទិញ​មូល​បត្រ​មាន​ដូចជា​៖ ១) Yuanta Securities (Cambodia) Plc. ២) RHB Indochina Securities PLC. ៣) Cana Securities Ltd. ៤) Campu Securities Plc. ៥) SBI Royal Securities Plc. ៦) Phnom Penh Securities

ដំណើរ​កា​រ​នៃ​ប្រតិបត្តិ​ករធានាទិញ​មូល​បត្រ​

ក្នុងការ​ផ្តល់​ប្រឹក្សា​របស់​ប្រតិបត្តិ​ករ​ធានាទិញ​មូល​បត្រគឺ ត្រូវ​ធ្វើ​ការ​បង់​ថ្លៃ​លើ​សេវាកម្ម​ប្រឹក្សា​របស់​ពួកគេ​ ខណៈ​​ការ​​ជួញ​ដូរ​ទាំង​នោះ​អាចខាតឬ​ចំនេញវា​ផ្អែក​លើ​ដំណើរ​ការ​របស់​ទីផ្សារនិង​ជា​បទពិសោធន៍ដែល​ពួកគេ​ធ្លាប់​ឆ្លង​កាត់។ អ្នក​ជំនាញ​ដែល​​ធ្វើ​ការ​ក្នុង​ប្រតិបត្តិ​ករ​ធានាទិញ​មូល​បត្រនេះ សុទ្ធ​សឹង​ជាអ្នក​ផ្តល់់​ប្រឹក្សា​ហិរញ្ញ​វត្ថុ ឬអ្នក​ជួញ​ដូរ​បូល​បត្រជា​ដើម​។ ដំណើរ​ការ​នៃប្រតិបត្តិ​ករ​ធានាទិញ​មូល​បត្រនេះអាច​មាន​ផល​ចំនេញ​ច្រើន​ តែ​ជាក់​ស្តែង​វា​ត្រូវ​ប្រើ​ពេលវេលា​យូ​រនិង​មាន​ភាព​ស្មុគ​ស្មាញ​ច្រើន។ ជាទូ​ទៅ​គេ​បានដឹង​ថា​​​ប្រតិបត្តិ​ករ​ធានាទិញ​មូល​បត្រដើរ​តួ​ជា​អន្តរ​ការី​ហិរញ្ញ​វត្ថុ​ ពួកគេ​ជួយ​ដល់​ក្រុម​ហ៊ុន​សាជីវកម្មក្នុង​ការ​បោះ​ផ្សាយ​លក់​មូល​បត្រ​ថ្មី​របស់​ខ្លួន​នៅ​ក្នុង​ទីផ្សារ​ដំបូង (Primary Market) ក្នុងដំណើរ​ការ IPO។

ពួកគេ​ក៏​បានជួយ​ដល់​ក្រុម​ហ៊ុន​សាជីវកម្ម​ក្នុង​ការ​ស្វែង​រក​វិនិយោគិន​សម្រាប់​សញ្ញាប័ណ្ណសាជីវកម្ម​។ តួនាទី​របស់​ប្រតិបត្តិ​ករ​ធានាទិញ​មូល​បត្រចាប់​ផ្តើម​ពី​ការ​ផ្តល់​ប្រឹក្សា​ និង​បន្ត​ការ​បែង​ចែក​មូល​បត្រ​ក្នុ​ងទម្រង់​ជា​ការ​ណែនាំ​ជាមុន​សិន​មុនពេល​សម្រេច​ដល់​ការ​ធានាទិញ​ (Start from Pre-underwriting in form of advice)។ ប្រតិបត្តិ​ករ​ធានាទិញ​មូល​បត្រនឹង​ធ្វើ​ការ​កំណត់​នូវ​របាយ​ការ​ណ៍​ហិរញ្ញ​វត្ថុ​សម្រាប់បញ្ជាក់​​ភាពត្រឹម​ត្រូវ​ និង​ចេញ​ផ្សាយឯកសារ​ផ្តល់​ព័ត៌​មាន​​ (​prospectus) ដើម្បី​ពន្យល់​ក៏​ដូចជា​បង្ហាញ​ផ្លូវ​ដល់​វិនិយោគិន​មុន​ពេល​មូល​បត្រត្រូវ​បោះ​ផ្សាយ​លក់​ជា​ផ្លូវ​ការ​។

អតិថិជន​របស់​ធនា​គារវិនិយោគ ឬប្រតិបត្តិ​ករ​ធានាទិញ​មូល​បត្រមាន​ដូច​ជា​ សាជីវកម្ម​ មូល​និធិ​សោធននិវត្តន៍ (Pension Fund) ស្ថាប័ន​ហិរញ្ញ​វត្ថុ​ដទៃទៀត រដ្ឋាភិបាល និង (Hedge Fund)។ ទំនាក់​ទំនង​កាន់​តែ​ច្រើន​នៃ​ធនាគារ​ក្នុង​ទីផ្សារ​ នាំ​ឲ្យ​មាន​ផល​ចំនេញ​កាន់​តែ​ច្រើន​ក្នុង​ការរវាង​​ផ្គូរ​ផ្គង​អ្នក​លក់​ និង​អ្នក​ទិញ​មូល​បត្រ។ បញ្ជាក់៖ ប្រតិបត្តិ​ករ​ធានាទិញ​មូល​បត្រអាច​ដើរ​តួ​នាទី​ជា អ្នក​ធានាទិញ​មូល​បត្រផង ពាណិជ្ជករមូល​បត្រផង និងជា​ឈ្មួញ​ជើង​សារ​មូល​បត្រ​ក៏​បាន៕

ដោយ៖ យ៉ាយ៉ា ប្រភព៖ SECC