បុរសម្នាក់នោះនឹងគ្មានថ្ងៃបែកចិត្តពីអ្នកឡើយ បើគេហ៊ានធ្វើរឿងអស់ទាំងនេះហើយ
នៅពេលបុរសម្នាក់បានស្វែងរកឃើញមនុស្សស្រីដែលគួរឲ្យទុកចិត្តហើយនោះ ច្បាស់ណាស់ថាគេនឹងចំណាយពេលអស់មួយជីវិតដើម្បីតែនារីម្នាក់នោះមកធ្វើជាគូអនាគត។ ពេលខ្លះសម្រាប់នារីៗ វាពិតជាពិបាកបន្តិចហើយ ក្នុងការសម្លឹងមើលបុរសៗ ជាទីស្រលាញ់ថាតើគេអាចនៅជាប់លាប់ជាមួយនឹងអ្នកបានយូរដល់ណា។ ដើម្បីឲ្យកាន់តែច្បាស់ថាបុរសនោះនឹងស្ថិតនៅជាមួយអ្នករហូត អ្នកអាចសង្កេតតាមវិធីខាងក្រោមនេះ៖
១) បុរសដែលប្ដេជ្ញារក្សាចំណងមិត្តភាពនោះ ៖ មានន័យថាទោះបីស្នេហានោះជួបទុក្ខលំបាកយ៉ាងណាក្ដីក៏គេមិនទុកអ្នកចោលដែរ។ បុរសដែលមិនចេះបង្កជម្លោះ ឬក៏លើកខ្លួនឯងសំខាន់ជាងដៃគូនោះគឺជាបុរសដែលស្មោះស្ម័គ្រនឹងអ្នកយ៉ាងប្រាកដណាស់។
២) បុរសដែលមិនដែលគេចពីបញ្ហា៖ បុរសពិតគឺមិនគេចចេញពីសេចក្ដីលំបាកនោះទេ។ នៅពេលមានបញ្ហា គេមិនខ្លាចនឹងប្រឈមមុខឡើយ ព្រោះស្នេហាគឺមានន័យបំផុតនៅពេលអ្នកចេះកាន់ដៃគ្នាឆ្លងផុតបញ្ហាដោយជោគជ័យ។
៣) បុរសដែលតែងយកចិត្តទុកដាក់មិនថារឿងតូចឬធំ៖ ពេលដែលគេនៅម្នាក់ឯង វាមិនសូវជាសំខាន់ក្នុងការខ្វល់ខ្វាយពីរឿងតូចៗគ្មានប្រយោជន៍ទាំងនោះទេ។ តែនៅពេលគេមានមនុស្សជាទីស្រលាញ់ អ្វីៗក៏ត្រូវបានផ្លាស់ប្ដូរអស់។ មិនថារឿងតូចឬធំក្ដីអោយតែប៉ះពាល់ដល់នារីរបស់គេ គេតែងគិតគូជានិច្ច។
៤) បុរសដែលឆ្លាតវៃ៖ នេះមិនមែនមានន័យថាអ្នកត្រូវតែស្រលាញ់បុរសណាដែលឆ្លាតនោះទេ។ វាមានន័យថាអ្នកគួរស្វែងរកបុរសណាដែលប្រើប្រាស់គំនិតធ្វើអ្វីមួយដោយភាពឆ្លាតវៃដែលគេមាន។ បុរសដែលតែងតែផ្ដល់ដំបូន្មានដល់អ្នក ជាពិសេសគឺនៅពេលអ្នកមានបញ្ហា។
៥) បុរសដែលលើកទឹកចិត្តឲ្យអ្នកស្រលាញ់ខ្លួនឯង៖ បុរសដែលតែងតែបង្ហាញពីភាពអស្ចារ្យដែលអ្នកមាន។ ហើយចាំជួយលើកទឹកចិត្តឲ្យអ្នកចេះរក្សានិងរៀនស្រលាញ់ខ្លួនឯង។
៦) បុរសដែលយកបញ្ហាអ្នកមកធ្វើជារបស់ខ្លួនឯង៖ ប្រសិនបើមានអ្វីដែលរំខានដល់អារម្មណ៍អ្នក បុរសម្នាក់នោះក៏នៅមិនស្រណុកខ្លួនដែរ។ ការទទួលយកបញ្ហាគេ មកជារបស់ខ្លួនគឺមិនមែនជារឿងងាយទេ។ អ្វីដែលពិបាកបំផុតគឺឃើញមិត្ត ស្រី ខ្លួនកំពុងប្រឈមនឹងបញ្ហាទៅវិញទេ៕
ប្រែសម្រួល៖ ព្រំ សុវណ្ណកណ្ណិកា
ប្រភព៖ power of positivity.com
