អនុវត្តចំណុចទាំង ៥នេះដើម្បីជួយអ្នកស្រោចស្រង់ខ្លួនពេលជួបវិបត្តិហិរញ្ញវត្ថុ
អ្នកតែងមានការភ័យខ្លាចចំពោះរឿងរ៉ាវមួយចំនួនដែលអាចនាំទុក្ខដល់ខ្លួន រឿងធ្វើអាចធ្វើឲ្យយើងវេទនា។ បញ្ហាទាំងអស់នាំភាគច្រើនបំផុតកើតឡើងដោយសារការប្រែប្រួលហិរញ្ញវត្ថុ ឬមានលក្ខខណ្ឌនានាដែលកើតឡើងចំពោះហិរញ្ញវត្ថុរបស់យើងដូចជា ការបាត់បង់ការងារ ភាពក្រីក្រ ការធ្លាក់ខ្លួនជួបនឹងជំងឺភ្លាមៗជាដើម។ វាពិតជាសុបិនដ៏សែនអាក្រក់មួយដែលគ្មាននរនាម្នាក់ចង់ជួបទេ ហើយម្នាក់ៗក៏ភ័យបារម្ភណាស់ដែរថា នឹងធ្វើយ៉ាងណាប្រសិនបើមានបញ្ហាមួយនោះកើតឡើងពិតមែន? ទោះខំគេចយ៉ាងណា ខំទប់ស្កាត់យ៉ាងណា ក៏នៅតែគ្មាននរណាម្នាក់អាចគេចរួចពីវាបានឡើយ សូម្បីមហាសេដ្ឋីលំដាប់ពិភពលោកក៏នៅមានថ្ងៃជួបរឿងអកុសលបែបនេះបានដែរ។ ដូច្នេះប្រសិនបើជួនស្ថានការណ៍ដែលជូរចត់មួយនេះនៅថ្ងៃណាមួយ តើអ្នកនឹងធ្វើយ៉ាងណា? វិធីសាស្រ្តខាងក្រោមនេះ អាចជួយស្មារតីអ្នកដើម្បីដោះស្រាយបញ្ហាទាំងនេះបាន៖
១) កំណត់បញ្ហាឲ្យបានច្បាស់
ជំហានដំបូងក្នុងការយកឈ្នះវិបត្តិហិរញ្ញវត្ថុ គឺការកំណត់បញ្ហាចំបង បញ្ហាស្នូលដែលនាំឲ្យកើតមានបញ្ហាដទៃ។ បញ្ហាហិរញ្ញវត្ថុជាទូទៅវាជាសូចនាករនៃបញ្ហាធំ ហើយក៏ជាការដែលបង្កើតឲ្យមាននូវដំណោះស្រាយរយៈពេលវែង។ អ្នកត្រូវរកឲ្យឃើញថាអ្វីដែលជាបញ្ហាជាក់ស្តែងទៅដែលជំរុញឲ្យមានបញ្ហាហិរញ្ញវត្ថុមួយនេះកើតឡើង។ ត្រូវចាំណា ពេលមានបញ្ហាអ្វីមួយកើតឡើង ពិសេសបញ្ហាហិរញ្ញវត្ថុអ្នកមិនត្រូវអង្គុយកើតទុក្ខ ហើយមិនធ្វើអ្វីសោះនោះទេព្រោះវាគ្មានបានអ្វីក្រៅពីធ្វើឲ្យអ្នកស្រ្តេស និងឈានដល់កើតជំងឺបាក់ទឹកចិត្តទៀតក៏ថាបាន។ រកវិធីសាស្រ្តដោះស្រាយទោះបីជាវិធីសាស្រ្តបឋមយ៉ាងណាក៏ដោយ ហើយអ្នកត្រូវហ៊ានប្រឈមមុខនឹងវា។
២) បង្កើតកញ្ចប់ថវិកា ធ្វើគម្រោងថវិកា
ផ្លូវមួយដែលល្អក្នុងការប្រឈមមុខនឹងបញ្ហាហិរញ្ញវត្ថុគឺការបង្កើតផែនការថវិកា រៀបចំផែនការជាប្រចាំសប្តាហ៍ ប្រចាំខែ និងប្រចាំឆ្នាំ ផែនការចំនាយរបស់អ្នក ដែលគួរតែចំណាយលើអ្វីសំខាន់ប៉ុណ្ណោះ។ បើអ្នកមិនចេះរៀបចំផែនការចំណាយជាប្រចាំទេ អ្នកមិនអាចគ្រប់គ្រងលើការចំណាយបានទេ ទោះបីអ្នកអាចរកចំណូលបានច្រើនកំរិតណាក៏ដោយ ក៏អ្នកនៅតែជួមបញ្ហាហិរញ្ញវត្ថុដែរ។ ពេលដែលអ្នកមានភាពប្រាកដប្រជាលើការចំណាយ អ្នកនឹងមានប្រាក់គ្រប់គ្រាន់ និងច្បាស់លាស់សម្រាប់ធ្វើការសន្សំ។ មានសំនួរខ្លះក៏បានសួរត្រលប់វិញថា តើធ្វើផែនការចំនាយយ៉ាងណា? តើគួរសន្សំដោយវិធីណា? ពិតណាស់វាមិនពិបាកណាស់ណាទេដោយគ្រាន់តែអ្នកកាត់បន្ថយការចេញទៅញ៉ាំអាហារខាងក្រៅ កាត់បន្ថយការកំសាន្តឥតប្រយោជន៍ យកអាហារថ្ងៃត្រង់ទៅនៅកន្លែងធ្វើការជាដើម នោះចំណែកដែលអ្នកដកចេញទាំងនោះយកវាមកជាប្រាក់សន្សំវិញ។
៣) កំណត់អាទិភាពហិរញ្ញវត្ថុ
អ្វីដែលចាំបាច់សឹមចំណាយ ដូចនេះវាក្លាយជាអាទិភាពសម្រាប់ហិរញ្ញវត្ថុ អាទិភាពលើការចំណាយរបស់អ្នកហើយ។ ធ្វើបែបនេះជួយអ្នកបានច្រើនណាស់ក្នុងការសម្រេចចិត្តលើហិរញ្ញវត្ថុដូចជាការចំណាយលើក្រេឌីតកាត ការចំណាយលើការទិញផ្ទះ ការសន្សំសម្រាប់អនាគត -ល-។ អាទិភាពហិរញ្ញវត្ថុអាចរួមបញ្ចូលនូវការចំណូលបន្ថែម រកការងារបន្ទាប់បន្សំជាដើម។
៤) ដោះស្រាយបញ្ហា
មនុសុ្សភាពច្រើនតែងដោះស្រាយបញ្ហាហិរញ្ញវត្ថុរបស់ពួកគេដោយកាត់បន្ថយចំណាយ និងព្យាយាមបង្កើនចំណូល តែអ្នកខ្លះវិញព្យាយាមផ្លាស់ប្តូររបៀបរបបនៃការរស់នៅតែ វាជារឿងមួយពិបាកបំផុតព្រោះផ្លាស់ប្តូរទម្លាប់របស់ខ្លួនបែបនេះ។
៥) បង្កើតផែនការនិងតាមដានវឌ្ឍនភាព
នៅពេលដែលអ្នកមានគំនិតដើម្បីដោះស្រាយបញ្ហាហិរញ្ញវត្ថុរបស់អ្នក ចូរបង្កើតនូវផែនការជាក់ស្តែងដើម្បីសម្រេចបាននូវគោលដៅហិរញ្ញវត្ថុរបស់អ្នក ជាមួយនឹងពេលវេលានៃសប្តាហ៍ ខែ ឬឆ្នាំហើយតាមដានការរីកចម្រើនរបស់អ្នកបន្ត។ នៅពេលអ្នកស្ថិតនៅលើផ្លូវដើម្បីសម្រេចគោលដៅ សូមចំណាយពេលប៉ុន្មាននាទីដើម្បីពិនិត្យមើលវឌ្ឍនភាព។ វាយតម្លៃផែនការរបស់អ្នកមើលថា តើអ្នកកំពុងធ្វើឱ្យមានវឌ្ឍនភាពឆ្ពោះទៅរកគោលដៅរបស់អ្នក ហើយបើកចំហចំពោះលទ្ធភាពនៃការកែតម្រូវផែនការនេះឬទេ៕
ដោយ៖ យ៉ាយ៉ា
