តើអ្នកដឹងទេ?​ ការ​​យំ​​ច្រើន​ពិតជាជួយ​ធ្វើ​ឲ្យ​សុខភាព​ផ្លូវ​ចិត្ត​របស់​អ្នក​កាន់​តែ​ល្អប្រសើរ​



មនុស្ស​ម្នាក់​ៗ​ មិន​ចូលចិត្ត​យំ​នោះ​ទេ ព្រោះ​ពួក​គេ​យល់​ថា​ការ​យំ​នេះ​វា​បង្ហាញ​ពី​ភាព​​​​ទន់​ជ្រាយ​​​​ និង​កម្សោយ​របស់​មនុស្ស​ណា​ម្នាក់​បាន​។     ទាល់​តែ​អ្នក​មាន​កំហុស​អ្វី​មួយ​ទើប​អ្នក​អាច​យំ​បាន​។    ហេតុ​នេះ​ហើយ​បាន​ជា​គ្មាន​នរណា​ម្នាក់​ចង់​យំ។     ​តែ​វា​ក៏​មិន​អាច​ត្រឹម​ត្រូវ​ទាំង​អស់​ដែរ។   ពេល​ខ្លះ​ការ​យំ​នេះ​ក៏​​​​អាច​ធ្វើ​ឲ្យ​សុខភាព​ផ្លូវ​ចិត្ត​របស់​អ្នក​កាន់​តែ​ល្អ​ផង​ដែរ។   ចំណុច​ខាង​ក្រោម​នេះ​គឺ​ជា​ហេតុផល​ដែល​អ្នក​គួរ​តែ​ជឿ៖

១)  វា​ធ្វើ​ឲ្យ​សុខភាព​អ្នក​ល្អ៖  «ការ​យំ​គឺ​វា​អាច​ជួយ​សម្រួល​ដល់​ភាព​តាន​តឹង​ទាំង​ផ្លូវ​កាយ​និង​ផ្លូវ​ចិត្ត​​ដល់​មនុស្ស​គ្រប់​គ្នា​បាន​​​» នេះ​បើ​យោង​ទៅ​តាម​​ការ​ស្រាវជ្រាវ​របស់​លោក​Dr. William H. Frey ដែល​​លោក​​គឺ​ជា​ស្ថាបនិក Alzheimer's Research Center ។     ​លោក​ក៏​បាន​បន្ថែម​ទៀត​ដែរ​ថា ៖ «​ការ​យំ​នេះ​នឹង​ជួយ​កាត់​បន្ថយ​ជាតិ​ខ្លាញ់​ដែល​មាន​ក្នុង​ឈាម  ព្រម​ទាំង​ជួយ​កាត់​បន្ថយ​សារធាតុ​គីមី​ដែល​បង្ក​ឲ្យ​អ្នក​កើត​ជំងឺ​ថប់​អារម្មណ៍​នានា​ផង​ដែរ។»

២)  ធ្វើ​ឲ្យ​អ្នក​កាន់​តែ​សប្បាយ​ចិត្ត៖ ការ​យំ​នឹង​ធ្វើ​ឲ្យ​អារម្មណ៍​អ្នក​កាន់​តែ​ប្រសើរ​ឡើង​ ។ តាម​រយៈ​​ការ​ស្រាវជ្រាវ​មួយ​បាន​ឲ្យ​ឃើញ​ថា៖​«​ ៨៨,៨​ភាគរយ នៃ​អ្នក​សាក​ល្បង​ការ​ស្រាវជ្រាវ​របស់​លោក​​គឺ​មាន​អារម្មណ៍​ធូរ​ស្បើយ​នឹង​កាន់​តែ​សប្បាយ​ចិត្ត​​​នៅ​ពេល​ដែល​ពួក​គេ​បាន​បង្ហូរ​ទឹក​ភ្នែក។»  នេះ​វា​បញ្ជាក់​ថា​ការ​យំ​ គឺ​ពិត​ជា​អាច​នាំ​យក​សេចក្ដី​ទុក្ខ​សោក​ចេញ​ពី​ខ្លួន​អ្នក​បាន​​មែន​។ 

៣)  ធ្វើ​ឲ្យ​អ្នក​​មាន​ភាព​ប៉ិនប្រសប់​ក្នុង​ការ​បង្ហាញ​អារម្មណ៍​​​៖  តាម​រយៈ​ការ​យំ​នេះ​ អ្នក​នឹង​ក្លាយ​ទៅ​ជា​មនុស្ស​ម្នាក់​មាន​ភាព​ប៉ិនប្រសប់​ក្នុង​ការ​បញ្ចេញ​អារម្មណ៍​ទៅ​កាន់​អ្នក​ដទៃ។      នៅ​ពេល​អ្នក​យំ​ អ្នក​នឹង​​អាច​បង្ហាញ​អារម្មណ៍​ដែល​អ្នក​កំពុង​មាន យ៉ាង​ស្មោះត្រង់​ អស់​ពី​ចិត្ត​ព្រោះ​ទឹក​ភ្នែក​ដែល​ស្រក់​នោះ​គឺ​វា​កើត​ឡើង​ពី​ទឹក​ចិត្ត​ពិត​របស់​អ្នក​។ 

៤)​ ធ្វើ​​ឲ្យ​អ្នក​ក្លាយ​ជា​មនុស្ស​ស្មោះ​ត្រង់​​ ​៖  ការ​យំ​នេះ​គឺ​មិន​អាច​បន្លំ​ ពី​អ្វី​មួយ​បាន​ទេ។     វា​ពិត​ជា​បង្ហាញ​ពី​អ្វី​ដែល​ចិត្ត​អ្នក​កំពុង​តែ​គិត​យ៉ាង​ជាក់​លាក់​បំផុត។     មនុស្ស​ដែល​តែង​តែ​យំ ភាគ​ច្រើន​ តែង​ដឹង​ពី​ធាតុ​ពិត​របស់​ខ្លួន​ឯង។     នៅ​ពេល​ដែល​អ្នក​ដឹង​ច្បាស់​ ថា​អ្នក​ជា​​មនុស្ស​ដូច​ម្ដេច​ហើយ​នោះ អ្នក​នឹង​ក្លាយ​ជា​មនុស្ស​ដែល​មាន​តែ​ភាព​ស្មោះ​ត្រង់​សម្រាប់​ខ្លួន​ឯង​ជា​រឿង​រហូត៕

 

ដោយ៖ ព្រំ សុវណ្ណកណ្ណិកា

 

X
5s