តើអ្នកត្រូវសន្សំលុយប៉ុន្មានដើម្បីចំណាយលើរឿង ៣នេះនៅក្នុងជីវិតរបស់អ្នក?
អ្នកតែងធ្លាប់ឮគេនិយាយថា សន្សំលុយហើយចេះវិនិយោគ ទើបធ្វើឲ្យអ្នកមាន។ ប៉ុន្តែអ្នកប្រហែលជាមិនបានទទួលចំណេះដឹងច្រើននោះឡើយថា តើត្រូវសន្សំលុយដោយវិធីណាឬក៏ថា តើត្រូវសន្សំប្រាក់បានប៉ុន្មានទើបសម្រេចបានគោលដៅដែលអ្នកចង់បាន? នេះទើបជាបញ្ហាស្មុគស្មាញមួយដែលមនុស្សភាគច្រើនកំពុងជួបប្រទះ។
មានអ្នកជំនាញហិរញ្ញវត្ថុល្បីៗបានផ្តល់យោបល់ច្រើនណាស់ពីចំណេះដឹងសន្សំប្រាក់នេះ។ អ្នកជំនាញខ្លះបានឲ្យយោបល់ថា អ្នកគួរសន្សំ ២០ ទៅ ៣០% នៃប្រាក់ចំណូលរបស់អ្នក និងដោះបំណុលឲ្យអស់។ យ៉ាងណាមិញ រឿងនេះគួរឲ្យសោកស្តាយត្បិតអីស្ថានភាពហិរញ្ញវត្ថុ និងអត្តចរិតប្រើប្រាស់លុយរបស់មនុស្សម្នាក់ៗវាមិនដូចគ្នាឡើយ។ អត្ថបទខាងក្រោមនេះ នឹងបង្ហាញគន្លឹះក្នុងការត្រៀមប្រាក់សន្សំដោយរបៀបណាទើបអ្នកសម្រេចបានភាពជោគជ័យហិរញ្ញវត្ថុ។
១.តើអ្នកត្រូវការលុយប៉ុន្មានដើម្បីគោលដៅរបស់អ្នក?
ជំហានដំបូងគឺអ្នកត្រូវកំណត់គោលដៅរបស់អ្នក។ វាអាចរួមបញ្ចូលទាំងការចំណាយសម្រាប់អាពាហ៍ពិពាហ៍ សងបំណុល ប្រាក់សន្សំសម្រាប់សង្គ្រោះបន្ទាន់ ទិញផ្ទះ ផែនការបង្កើតគ្រួសារ លុយសម្រាប់កូនៗរៀននៅសាលាឯកជន ឬមហាវិទ្យាល័យ ដំណើរកម្សាន្ត ចូលនិវត្តន៍មុនអាយុ និងផែនការផ្សេងៗជាច្រើនទៀតនៅក្នុងជីវិតរបស់អ្នក។ អ្នកត្រូវចាំថា បើគោលដៅរបស់អ្នកកាន់តែសំខាន់ អ្នកចាំបាច់ត្រូវតែមានផែនការហិរញ្ញវត្ថុសម្រាប់គោលដៅទាំងនោះកាន់តែច្រើនផងដែរ។ ផ្ទុយទៅវិញ បើវាមិនសូវសំខាន់ទេ អ្នកមិនចាំបាច់សន្សំលុយត្រៀមទុកច្រើនពេកនោះទេ ហើយការចំណាយទាំងនោះមិនគួរលើសពីផែនការចំណាយនោះទេ។
២.តើអ្នកត្រូវការប្រាក់ប៉ុន្មានដើម្បីការចាយវាយប្រចាំថ្ងៃ?
ឥឡូវនេះវាជាពេលវេលាមួយដែលអ្នកត្រូវដឹងថា តើអ្នកត្រូវចំណាយប្រាក់ប៉ុន្មានដើម្បីចាយវាយប្រចាំថ្ងៃ ទាំងការចំណាយចាំបាច់ និងមិនចាំបាច់? ប្រសិនបើអ្នកចូលចិត្តទទួលទានអាហារពេលល្ងាចច្រើននៅហាងទំនើប មិនធ្វើម្ហូបខ្លួនឯង ឬជាប់ចិត្តតែផលិតផលម៉ាកល្បីៗដូចជា Apple អ្នកគួរតែដឹងហើយថា ស្ថានភាពចំណាយរបស់អ្នកស្ថិតនៅក្នុងទិដ្ឋភាពបែបណា។ និយាយមកដល់ចំណុចនេះ អ្នកត្រូវគូសរូបភាពមួយដើម្បីកំណត់ពីអត្តសញ្ញាណជីវិតចាយវាយប្រចាំថ្ងៃផ្ទាល់ខ្លួនមួយរបស់អ្នកឡើងថា តើអ្នកជាមនុស្សចាយលុយក្នុងប្រភេទណា? និងជាពិសេសនោះគឺថា តើអ្នកចាំបាច់ត្រូវការលុយប៉ុន្មានទើបអាចផ្គត់ផ្គង់ការចំណាយប្រចាំថ្ងៃទាំងនោះបាន? ប្រសិនបើអ្នកយល់ថា អ្នកកំពុងសប្បាយចិត្តហ្នឹងការចំណាយប្រចាំថ្ងៃ ហើយមានលទ្ធភាពអាចធ្វើបានយ៉ាងរលូន អ្នកគួរបន្តធ្វើវាទៀត។ នៅ ត្រង់នេះ អ្នកគួរលៃលកថា ការចំណាយនោះស្ថិតនៅក្នុងខ្ទង់ប៉ុន្មានក្នុងមួយថ្ងៃ? ក្នុងមួយខែ? ក្នុងមួយឆ្នាំ? ហើយសម្រាប់ជាយោបល់ល្អ អ្នកគួរសន្សំ ១០ ទៅ ២០% លើការចំណាយប្រចាំឆ្នាំ ព្រោះដោយសារតែកំណើនអតិផរណា (ទំនិញឡើងថ្លៃ)។
៣.តើអ្នកត្រូវការលុយនៅពេលណា?
ជំហានបញ្ចប់នោះគឺអ្នកត្រូវកំណត់អាទិភាពគោលដៅរបស់អ្នក និងបង្កើតពេលវេលាជាក់លាក់មួយដើម្បីសម្រេចគោលដៅហិរញ្ញវត្ថុ។ អ្នកត្រូវកំណត់ថា តើអ្នកសម្រេចផែនការហិរញ្ញវត្ថុបាននៅពេលណា? នៅអាយុប៉ុន្មាន? បន្ទាប់មកអ្នកត្រូវរៀបចំគម្រោងដែលអ្នកត្រូវធ្វើជាចំណែកៗឆ្ពោះទៅកាន់ការសម្រេចគោលដៅធំ។ ឧទាហរណ៍ថា អ្នកចង់មានលុយទុកក្នុងដៃ ៥០ ០០០ ដុល្លារនៅពេល ៥ ឆ្នាំខាងមុខ។ នេះមានន័យថា យ៉ាងហោចណាស់ក៏អ្នកត្រូវការសន្សំលុយឲ្យបាន ៨៣៤ ដុល្លារដែរក្នុងមួយខែៗ។ នេះជាឧទាហរណ៍ងាយៗមួយ ហើយអ្នកអាចរៀបចំគម្រោងរកលុយតាមវិធីផ្សេងៗទៀតដើម្បីមកបង្គ្រប់ផែនការដែលអ្នកបានបង្កើតឡើង៕
ប្រភព៖ Businessinsider
