មានដឹងទេថា រុស្ស៊ីសម្បូរវត្ថុធាតុដើមសំខាន់ៗអ្វីខ្លះ?
សហព័ន្ធរូស្ស៊ីជាប្រទេសធំជាងគេនៅលើពិភពលោក ប្រទេសដែលមានទឹកដីធំវាមានលទ្ធភាពធ្វើឲ្យជាតិក្លាយជាអ្នកមានដោយសារសម្បត្តិធនធានធម្មជាតិ។ រូស្ស៊ីជាជាតិមួយដែលនាំមុខខាងផលិតធ្យូងថ្ម ពេជ្រ អាលុយមីញ៉ូម ត្បូង កំបោរ រ៉ែដែក បុកស៊ីត ម្នាងសិលា -ល- និងរ៉ែដទៃទៀតជាច្រើន។
តែក្នុងចំណោមធនធានទាំងអស់មានធនធានសំខាន់ៗ ហើយសម្បូរជាងគេនៅក្នុងប្រទេសនេះ ក្នុងនោះមានដូចជា៖
១) ប្លាទីន និង ប៉ូតាស្យូម
រូស្ស៊ីអាចផលិតប៉ូតាស្យូមបានប្រមាណ ៩១.១៦ តោន និង ប្លាទីន ២៥.៩ តោន ក្នុងឆ្នាំ ២០១៤។ ទំនិញផលិតផលទាំងនោះបានមកពីតំបន់ផ្សេងៗគ្នាជាច្រើននៅក្នុងប្រទេសរួមមាន Kondyor ដែលអណ្តូងរ៉ែនៅ Kondyor នេះអាចផលិតប្លាទីនបានប្រមាណ ៤.០៨តោន នៅក្នុងឆ្នាំ ២០១៤។ ក្នុងរយៈពេលថ្មីៗនេះ រដ្ឋាភិបាលបានបង្កើនការចំណាយដើម្បីលើកកំពស់ការទាញយកប្លាទីនពីក្រុមលោហៈធាតុ ហើយការបង្កើនការវិនិយោគគឺដើម្បីឆ្លើយតបទៅនឹងអំណោយផលតម្លៃសកលនៃរ៉ែទាំងពីរប្រភេទនេះ។
២) ធ្យូងថ្ម
រូស្ស៊ីជាប្រទេសធំលំដាប់ទី ២ ក្នុងពិភពលោកដែលមានរ៉ែធ្យូងថ្ម ប្រទេសនេះមានធ្យូងថ្មសរុបប្រមាណ ១៧៣ ពាន់លានតោន ដែលស្មើប្រមាណ ១៧.៦% នៃចំនួនរ៉ែធ្យូងថ្មសរុបក្នុងពិភពលោក។ ធ្យូងថ្មទាំងនោះបានមកពីកន្លែងរ៉ែផ្សេងគ្នា ១២៩ កន្លែង និង ២២ បាសាំង (អាង)។ ៨៥% នៃធ្យូងថ្មក្នុងប្រទេសសរុបបានផលិតពីតំបន់ចំនួនបីមានដូចជា Zabaikal'skiy Kemerovskaya Oblast និង the Krasnoyarskiy Kray។ ដោយឡែក ៦៦%ទៀត នៃធ្យូងថ្មដែលបានរុករកគឺបានមកពីអាង ឬអណ្តូងចំនួន ២ អណ្តូង Kuznetskiy និង Kansko-Achinskiy ក្នុងនោះ អណ្តូង Kansko-Achinskiy មាន ៤០.៧% នៃស្រទាប់រ៉ែក្នុងស្រុកសរុប។ អណ្តូង Kuznetskiy មានផ្ទុករ៉ែនេះចំនួន ២៧.៤% ហើយវាក៏ផលិតបានចំនួនច្រើនជាងគេបំផុតនៃធ្យូងថ្មជាតិទាំងអស់។
៣) ឧស្ម័នធម្មជាតិ
ជាប្រទេសមួយ ក្នុងចំណោមអ្នកដែលអាចផលិតបានឧស្ម័នធម្មជាតិធំបំផុតលើពិភពលោក ប្រទេសនេះផលិតឧស្ម័នធម្មជាតិបានប្រមាណ ២២,៧០៧ ពាន់លានហ្វីតគូបក្នុងឆ្នាំ ២០១៤ ដែលគិតជាភាគរយប្រហែល ១៩% នៃចំនួនសរុបក្នុងពិភពលោក។ ចំនែកទីផ្សារបានធ្លាក់ចុះយ៉ាងគំហុក យោងទៅលើការកើនឡើងនៃផលិតកម្មតាមបណ្តាប្រទេសដូចជា កាតា សហរដ្ឋអាមេរិក និងអ៊ីរ៉ង់។ ឧស្ម័នធម្មជាតិបំរុងរបស់រូស្ស៊ីមានប្រមាណ ១,៧៤៨ រយពាន់លានហ្វីតគូប ក្នុងនោះ Urengoyskoye ជាអណ្តូងដែលមានឧស្ម័នធម្មជាតិធំជាងគេមានចំនួន ១៨៧.១៧ រយពាន់លានហ្វីតគូប ឯអណ្តូង Bovanenkovskoye មានប្រមាណ ១៥១.៨៥ រយពាន់លានហ្វីតគូប។ ឧស្ម័នធម្មជាតិគឺជាមុខទំនិញចម្បងសម្រាប់ការនាំចេញទៅទីផ្សារអឺរ៉ុប ហើយអ្នកដែលនាំចូលធំសំខាន់ៗធំៗពីរូស្ស៊ីមានដូចជា អាល្លឺម៉ង់ បេឡារូស ទួកគី អ៊ុយក្រែន ជប៉ុន កាហ្សាក់ស្ថាន និងបារាំង។
៤) ប្រេង
រូស្ស៊ីផលិតប្រេងបានប្រមាណ ៥៧៩.៨លានតោនក្នុងឆ្នាំ ២០១៤ ហើយប្រទេសមួយនេះបានឈរនៅលំដាប់លេខ ៣ នៃអ្នកផលិតប្រេងធំបំផុតលើលោកជាមួយដៃគូរ អារ៉ាប៊ី សាអ៊ូឌីត និងសហរដ្ឋអាមេរិច។ ហើយគេអាចចម្រាញ់បានប្រេង ៣២៥.២ តោននៅក្នុងឆ្នាំដដែលនេះ (២០១៤)។ ទីតាំងសំខាន់សម្រាប់អណ្តូងរ៉ែប្រេងនេះគឺនៅ ស៊ីបេរីខាងលិច ដែលមានប្រមាណ ៦៦,៦% នៃផលិតកម្មក្នុងស្រុក ចំណែកឯស៊ីបេរីខាងកើតត្រូវបានគេដឹងថាជាតំបន់ដែលផ្ទុកប្រេងបំរុង។
៥) ទីតាញ៉ូម
រូស្ស៊ីផលិតបានទីតាញ៉ូមប្រមាណ ៤៧,០០០ តោននៃ titanium sponge (ខ្នាតរង្វាស់នៃទីតាញ៉ូម) ក្នុងឆ្នាំ ២០១៤ ដែលនាំឲ្យមានការកើនឡើងផលិតកម្មប្រៀបធៀបនឹងឆ្នាំកន្លងមក។
៦) រ៉ែ លោហៈដទៃទៀត
តាមការរុករកនឹងសន្មត គេរំពឹងថាមានរ៉ែមាសបំរុងដែលមិនទាន់ជីកយកមានចន្លោះពី ២៥% ទៅ ៤០% ។ សហព័ន្ធរូស្ស៊ីជាប្រទេសធំលំដាប់លេខ ៦ ជាអ្នកផលិតមាសក្នុងពិភពលោក ដែលមានប្រមាណ ២៤៩ តោនផលិតក្នុងឆ្នាំ ២០១៧។ បន្ថែមពីនេះ រូស្ស៊ីមាន ១០% នៃអ៊ុយរ៉ាញ៉ូមបំរុងក្នុងពិភពលោក ហើយក៏ផលិតបាន ៨% នៃអ៊ុយរ៉ាញ៉ូមក្នុងពិភពលោក។ រូស្ស៊ីក៏បានរួមចំណែកក្នុងការផលិតនីកែលបាន ១៧% ខណៈដែលផលិតកម្ម ម៉ង់កាណែសអាចផលិតបាន ២២% នៃoutput ក្នុងពិភពលោក។
សក្តានុពលធនធានធម្មជាតិរបស់ប្រទេសរូស្ស៊ីមានជាង ២០% នៃធនធានបំរុងក្នុងពិភពលោក ដែលជាហេតុនាំឲ្យរូស្ស៊ីក្លាយជាកន្លែងមួយពិសេសក្នុងចំណោមបណ្តាប្រទេសឧស្សាហកម្មទាំងអស់។ ធនធានធម្មជាតិដែលត្រូវបានប្រើដោយសេដ្ឋកិច្ចនៃប្រទេសរុស្ស៊ីមានចំនួន ៩៥,៧ %នៃទ្រព្យសម្បត្តិជាតិ៕
ដោយ៖ យ៉ាយ៉ា
