មូលហេតុចម្បង៣យ៉ាង ដែលនាំឲ្យនារីខ្លះមិនទាន់ជួបបុរសក្នុងក្ដីស្រមៃនោះ
វាអាចមានរឿងរ៉ាវច្រើនណាស់ដែលកើតឡើងចំពោះស្នេហាអ្នក។ ពេលខ្លះវាអាចមកពីកត្តាផ្សេងៗគ្នាដែល នាំឲ្យអ្នកមិនងាយរកឃើញបុរសដែលត្រូវនឹងអ្វីដែលអ្នកចង់បាន។ ពេលខ្លះអ្នកក៏ជួបបុរសល្អ ប៉ុន្តែភាពល្អនោះក៏វាមិនស្ថិតស្ថេរបានយូរដែរ។ ហេតុនេះហើយ ទើបអ្នកតែងគិតថាបុរសដែលល្អគឺពិតជាកម្ររកបានណាស់នៅលើលោកនេះ។ តើមូលហេតុអ្វីខ្លះទៅ ដែលអ្នកគិតថាវាពិបាកណាស់ក្នុងការស្វែងរកបុរសដ៏ល្អម្នាក់ ដែលអ្នកតែងតែស្រមៃចង់បាននោះ?
១) នារីៗចូលចិត្តចាត់ទុកអ្នកដទៃត្រឹមតែជាមិត្ត៖ ពេលខ្លះបុរសដ៏ល្អម្នាក់បានឈានចូលទៅក្នុងជីវិតរបស់អ្នកហើយ។ ប៉ុន្តែអ្វីដែលគេទទួលបានមកវិញគឺអ្នកចាត់ទុករូបគេគ្រាន់តែជាមិត្តភក្ដិប៉ុណ្ណោះ។ ពេលខ្លះ ទោះបីបុរសម្នាក់នោះគ្រាន់តែជាមិត្តភ័ក្ដិអ្នកក្ដី។ ប៉ុន្តែគេអាចដឹងគ្រប់យ៉ាងថាអ្នកចង់បានអ្វី? ត្រូវការអ្វី? ហើយគេអាចបំពេញអ្វីដែលអ្នកចង់បានទាំងអស់។ ដោយសារតែអ្នកឲ្យតម្លៃមិត្តភាពជាងក្ដីស្រលាញ់ វាក៏អាចជាមូលហេតុមួយដែលធ្វើឲ្យអ្នកពិបាករកបុរសល្អសម្រាប់ជីវិតក៏ថាបាន។
២) ទាមទារបុរសដែលល្អហួសពេក៖ ដោយសារតែចំណង់របស់អ្នកគឺខ្ពស់ខ្លាំងពេក។ ទើបជាហេតុនាំឲ្យអ្នកពិបាកស្វែងរកមនុស្សដែលសក្ដិសមនឹងអ្វីដែលអ្នកចង់បាន។ អ្នកត្រូវគិតថាមានបុរសតិចណាស់ដែលស្ថិតក្នុងប្រភេទដែលអ្នកចង់បាន តែបុរសដែលមានចិត្តស្មោះ តែងយល់ចិត្តនារីៗ ប៉ុន្តែក្រីក្រ ហើយមិនមែនជាមនុស្សសម្ភារៈនិយមគឺនៅមានច្រើនណាស់។
៣) ដោយសារតែអត្តចរិតរបស់អ្នក៖ អ្នកមិនត្រូវសួរទៅកាន់ពិភពលោកទេថា ៖ «ហេតុអ្វីមិនប្រគល់បុរសល្អម្នាក់ដល់អ្នកទៅ?» អ្វីដែលអ្នកត្រូវធ្វើគឺសួរទៅខ្លួនឯង ថាទាំងចរិយាមារយាទ និងបុគ្គលិកលក្ខណៈរបស់អ្នក តើវាសក្ដិសមឬនៅដែលឲ្យបុរសដ៏ល្អចូលមកក្នុងជីវិតអ្នកនោះ?
ដោយ៖ ព្រំ សុវណ្ណកណ្ណិកា
