កម្ពុជានឹងចំណេញ៤០០លានដុល្លារ ប្រសិនបើអាចកាត់បន្ថយការនាំចូលក្នុងវិស័យទេសចរណ៍បាន១០%
ដោយសារតែការអភិវឌ្ឍយ៉ាងគំហុកនៃវិស័យទេសចរណ៍នៅកម្ពុជាបានជំរុញឲ្យមានការកើនឡើងនូវផលិតផលនាំចូលពីបរទេសបម្រើឲ្យការផ្គត់ផ្គង់ក្នុងវិស័យនេះ ដែលនាំឲ្យចំណូលទេចរណ៍ប្រមាណ២៥%ត្រូវបានធ្លាយចេញទៅវិញ ដូច្នេះបើកម្ពុជាអាចកាត់បន្ថយការធ្លុះធ្លាយនៃការនាំផលិតពីបរទេសចូលបានប្រមាណ១០ភាគរយ នោះកម្ពុជាអាចចំណេញបានប្រមាណ៤០០លានដុល្លារ។
ខណៈដែលវិស័យទេសចរណ៍កម្ពុជាបាននាំមកនូវចំណូលក្នុងសេដ្ឋកិច្ចជាតិប្រមាណជាង ៤ពាន់លានដុល្លារ កាលពីឆ្នាំ២០១៨កន្លងមកនេះ យើងក៏ត្រូវគិតគូរពីការធ្លុះធ្លាយសេដ្ឋកិច្ច (Economic Leakages) ក្នុងវិស័យទេសចរណ៍ ដោយចំណូលទេសចរណ៍ប្រមាណ ២៥% ត្រូវបានធ្លាយចេញទៅវិញ ដែលភាគច្រើនកើតឡើងដោយសារការនាំចូលផលិតផលពីបរទេស ដូចជា បន្លែ ផ្លែឈើ សាច់ ស្រា គ្រឿងសង្ហារឹម វត្ថុសិប្បកម្មផ្សេងៗ -ល- ដើម្បីទ្រទ្រង់ កំណើនគំហុកនៃការអភិវឌ្ឍវិស័យទេសចរណ៍នៅកម្ពុជា។
ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានដាក់ទិសដៅដោយត្រូវព្យាយាមកាត់បន្ថយអត្រានៃការធ្លុះធ្លាយឲ្យបានយ៉ាងតិច ១០% បន្ថែមទៀត (ឲ្យមកនៅត្រឹម ១៥% ដែលជាកម្រិតទូទៅរបស់បណ្តាប្រទេសគោលដៅទេសចរណ៍នានា )។ លោករដ្ឋមន្ត្រីបានបង្ហាញថា បើយើង អាចកាត់បន្ថយការធ្លុះធ្លាយបានប្រមាណ១០% បន្ថែមទៀត គឺយើងអាចចំណេញបាន ប្រមាណ ៤០០ លានដុល្លារ ពីការនាំចូល របស់ទាំងនេះ សំរាប់តែ បំរើ ឧស្សាហកម្ម ទេសចរណ៍។
ថ្លែងនៅក្នុងសិក្ខាសាលាស្ដីពី "ខ្សែសង្វាក់តម្លៃផលិតកម្ម និងការបង្កើនប្រើប្រាស់ផលិតផលក្នុងស្រុកក្នុងវិស័យទេសចរណ៍" កាលពីថ្ងៃទី២៨ ខែមីនា ឆ្នាំ២០១៩ នាសណ្ឋាគារ ហ្រ្គីនភែលេស ឯកឧត្តមរដ្ឋមន្ត្រីនៃក្រសួងទេសចរណ៍ ក៏បានស្នើរឲ្យគ្រប់ភាគីពាក់ព័ន្ធទាំងអស់ជួយជម្រុញការប្រើប្រាស់ផលិតផល ក្នុងស្រុកឧស្សាហកម្មទេសចរណ៍ ព្រោះវិស័យនេះជម្រុញឲ្យមានកំណើនឡើងនូវការផ្គត់ផ្គង់ផលិតផលក្នុងស្រុក៕
ប្រភព៖ ក្រសួងទេសចរណ៍
រូបភាព៖ cpp.org.kh
ដោយ៖ ជួប ស្រីរ័ត្ន
