នៅកម្ពុជាមានអ្នកប្រើអ៊ីនធឺណិតជាង ១២លាន យុទ្ធសាស្ត្រធ្វើទីផ្សារបែបណាទើបមានប្រសិទ្ធភាព!
របាយការណ៍ដែលទើបនឹងចេញផ្សាយថ្មីៗនេះបានឱ្យដឹងថា ចំនួនអ្នកប្រើប្រាស់អ៊ីនធឺណិតសរុបនៅកម្ពុជាបានកើនឡើងដល់ជាង ១២លាននាក់ហើយ ហើយអាចនឹងបន្តកើនឡើងបន្ថែមទៀតទៅថ្ងៃខាងមុខទៀតនោះ។ នេះបើយោងតាមរបាយការណ៍ពីក្រុមហ៊ុនមេឌៀ We Are Social និង Hootsuite ដែលទើបនឹងចេញផ្សាយកាលពីដើមឆ្នាំ២០១៩ កន្លងទៅថ្មីៗនេះ។
បើធៀបទៅនឹងចំនួនរបស់ប្រជាជនកម្ពុជា យើងមើលឃើញថា ចំនួនអ្នកប្រើប្រាស់អ៊ីនធឺណិតនៅកម្ពុជាមានប្រមាណជាង ៧៥%ដែលជាចំនួនមួយគួរឱ្យចាប់អារម្មណ៍ដល់ការធ្វើទីផ្សារតាមអនឡាញ ឬឌីជីថលម៉ាឃីធីងនៅកម្ពុជា។
អ្វីដែលយើងមានឃើញជាក់ច្បាស់មួយទៀតនោះគឺថា ប្រជាជនដែលមានវ័យក្រោម ៣៥% មានប្រហែល ៧៥%ដែលធ្វើឱ្យទីផ្សារអនឡាញនៅកម្ពុជាកាន់តែមានសក្ដានុពល ពោលនិយាយឱ្យខ្លី អតិថិជនគោលដៅរបស់អាជីវកម្មភាគច្រើននៅទីផ្សារអនឡាញនោះហើយ។
ការពិតថា អ្នកចេះប្រើប្រាស់ ហ្វេសប៊ុកផេកមានច្រើន ប៉ុន្តែអ្វីដែលជាទិសដៅនៃការធ្វើទីផ្សារឱ្យបានជាក់លាក់ និងកំណត់គោលដៅច្បាស់លាស់ អាចជំរុញការធ្វើទីផ្សារតាមអនឡាញឱ្យត្រូវចំគោលដៅ និងស្របទៅតាមនិយាមស្ដង់ដារនៃការគ្រប់គ្រងម៉ាកយីហោច្បាស់លាស់។
កញ្ញា ទ្រី រស្មី ប្រធានផ្នែកគ្រប់គ្រងហ្វេសប៊ុក BizKhmer Media បានលើកឡើងថា ឆ្លងកាត់ការដំណើរការគ្រប់គ្រងសេវាកម្មជូនអតិថិជនជាតិ និងអន្តរជាតិជាច្រើនមក យើងអាចវាយតម្លៃបានថា ការធ្វើទីផ្សារតាមហ្វេស៊បុក ឬមធ្យោបាយអនឡាញផ្សេងៗទៀត ទាមទារនូវការរៀបចំយុទ្ធសាស្ត្រមាតិកា ឬខ្លឹមសារផ្សាយ (Content Strategies) ដែលឆ្លងតបទៅនឹងការកំណត់អតិថិជនគោលដៅរបស់អតិថិជន។ ការច្នៃប្រឌិតលើការរៀបខ្លឹមសារផ្សាយបូករួមទាំងការឌីហ្សាញរូបភាព ថតរូប ថតវីដេអូ និងរូបមានចលនាផ្សេងៗទាមទារនូវបច្ចេកទេសខ្ពស់ ដើម្បីឆ្លើយតបទៅនឹងចំណង់ចំណូលចិត្តរបស់អតិថិជនដែលតែងតែទាមទារនូវអ្វីដែលស្អាត និងទាក់ទាញឡើងៗពីមួយថ្ងៃទៅមួយថ្ងៃ។ បើនិយាយអំពីវីដេអូវិញ គឺទាមទារពីវីដេអូកម្រិតធម្មតា រហូតដល់ 4K ជាដើម។
ទីផ្សារកម្ពុជានៅឆ្នាំ២០១៩ នេះ ប្រាកដណាស់ថា នឹងមានការផ្លាស់ប្ដូរច្រើន ស្របពេលដែលក្រុមហ៊ុនយក្សអាលីបាបា ប្រកាសថា នឹងយកដាក់លើទីផ្សារប្រទេសកម្ពុជា ដែលនេះក្នុងក្របខណ្ឌមួយគឺថាម្ចាស់អាជីវកម្មដែលយកអនឡាញជាទីផ្សារធំ ត្រូវការយកចិត្តដាក់ខ្ពស់ និងមានយុទ្ធសាស្ត្រផ្សព្វផ្សាយប្រកបដោយអត្តសញ្ញាណច្បាស់លាស់ ស្របជាមួយនឹងការជ្រើសរើសយកផលិតផលដែលមានលក្ខណៈពិសេស និងគុណភាពពិតៗដើម្បីធានាបាននូវទំនុកចិត្ត និងការចាប់អារម្មណ៍ក្នុងទិសដៅរុញច្រើនពួកគាត់ឱ្យក្លាយទៅជាអតិថិជនស្មោះស្ម័គ្រយូរអង្វែង។
ចំណុចសំខាន់ៗមួយដែលបងប្អូនកំពុងធ្វើទីផ្សារអនឡាញត្រូវគិត គឺ ត្រូវកំណត់ទីផ្សារគោលដៅច្បាស់លាស់ ដឹងពីការចង់បាននិងក្ដីរំពឹងទុករបស់គាត់ ចេះកំណត់នូវផែនការផ្សព្វផ្សាយផ្សារភ្ជាប់ជាមួយមធ្យោបាយប្រកបដោយប្រសិទ្ធភាព (ហ្វេសប៊ុក និងគួរតែមានវែបសាយសម្រាប់អាជីវកម្មច្បាស់លាស់) មានក្រុមការងារធ្វើច្បាស់លាស់ និងមានខ្ទង់ថវិកាត្រឹមត្រូវសម្រាប់ប្រើប្រាស់ពេញមួយឆ្នាំ៕
