វិទ្យាសាស្ត្រនិយាយថា ចង់សប្បាយរីករាយ អ្នកគួរធ្វើរឿងនេះ
តើសុភមង្គល គឺជាជម្រើសដែរឬទេ? ចម្លើយគឺអាចត្រូវអាចខុស។ ចិត្តវិទូលោកស្រី Sonja Lyubomirsky មកពីសាកលវិទ្យាល័យ California បានលើកឡើងថា ៥០% នៃសុភមង្គលមាននៅក្នុងហ្សែនពីកំណើតរបស់អ្នក។ ដូច្នេះ អ្នកកើតមក គឺនាំយកសុភមង្គលបាន ៥០% រួចទៅហើយ។ ប៉ុន្តែនៅសល់ ៥០% ទៀត ដោយវាអាស្រ័យថា តើអ្នកមានសមត្ថភាពយកវាបានឬក៏អត់?
ដើម្បីទទួលបានសុភមង្គលដែលនៅសល់ ៥០% ផ្សេងទៀត គឺត្រូវពឹងផ្អែកលើសមត្ថភាពគ្រប់គ្រងខ្លួនអ្នកផ្ទាល់ដូចជា សុខភាព ទំនាក់ទំនងស្នេហា អាជីពការងារ ការសម្រេចបានគោលដៅ និងសកម្មភាពផ្សេងៗជាច្រើនទៀតដែលអ្នកធ្វើប្រចាំថ្ងៃ។ នេះមានន័យថា បើអ្នកគ្រប់គ្រងសកម្មភាពទាំងនេះបានល្អ អ្នកនឹងទទួលបានភាពរីករាយបន្ថែមទៀតលើសុភមង្គល ៥០% ដែលមានស្រាប់។ ខាងក្រោមនេះ គឺជាវិធីដែលធ្វើឲ្យអ្នកសប្បាយចិត្តកាន់តែខ្លាំងឡើង៖
១.រកវិធីជួយអ្នកដទៃឲ្យបានកាន់តែច្រើន
ការផ្តល់ឲ្យអ្នកដទៃត្រូវបានចាត់ទុកថា គឺជាការធ្វើអំពើល្អមួយដែលមិនគិតផលប្រយោជន៍ខ្លួនឯងជាធំ។ ការផ្តល់ឲ្យអ្នកដទៃ ឬការរួមចំណែកក្នុងការចែករំលែកដល់សង្គម គឺមានតម្លៃខ្លាំងណាស់ក្នុងការធ្វើឲ្យសង្គម និងបរិស្ថាននៅជុំវិញអ្នកពោរពេញទៅដោយភាពភាតរភាព។ អ្នកអាចសង្កេតដោយខ្លួនឯងបានថា នៅពេលអ្នកជួយអ្នកដទៃបានកាន់តែ ច្រើនឡើង ជាពិសេសមនុស្សដែលត្រូវការជំនួញជាចាំបាច់ នឹងធ្វើឲ្យ អ្នកមានអារម្មណ៍កាន់តែសប្បាយចិត្ត បើទោះបីជាអ្នកមិនគិតពីផលប្រយោជន៍ដែលទទួលបានមកវិញក៏ដោយ។
២.ពុះពារដើម្បីសម្រេចគោលដៅរបស់អ្នក
គោលដៅដែលអ្នកចង់ទៅ ប៉ុន្តែអ្នកមិនបានប្រឹងប្រែងពុះពារដើម្បីសម្រេចគោលដៅនោះ នេះគេមិនចាត់ទុកថា ជាគោលដៅទេ។ វាគ្រាន់តែជាក្តីសុបិន្ដមួយប៉ុណ្ណោះ ហើយក្តីសុបិន្ដអាចធ្វើឲ្យអ្នកសប្បាយរីករាយបាន នៅពេលដែលអ្នកធ្វើឲ្យក្តីសុបិន្ដនោះក្លាយជាការពិតតែប៉ុណ្ណោះ។ ហេតុដូច្នេះហើយបានជាអ្នកនិពន្ធសៀវភៅ “Simple Secrets of the Best Half of Life” លោក David Niven និយាយថា អ្នកដែលអាចកំណត់គោលដៅដែលខ្លួនបានធ្វើ គឺ ១៩% ហាក់ដូចជាពេញចិត្តនឹងជីវិតរបស់ពួកគេ ហើយ ២៦% ហាក់ដូចជាមានអារម្មណ៍វិជ្ជមានចំពោះខ្លួនឯង ។ យ៉ាងណាមិញ នៅពេលអ្នកពុះពារពីមួយជំហានទៅមួយជំហានតម្រង់ឆ្ពោះទៅកាន់គោលដៅរបស់អ្នក អ្នកនឹងមានក្តីសង្ឃឹមទុកជាមុនថា អ្នកនឹងអាចសម្រេចវាបាន។ ទីបំផុតអ្នកនឹងរីករាយនឹងលទ្ធផលនេះ។
៣.ឧស្សាហ៍ធ្វើរឿងដែលអ្នកធ្វើបានល្អបំផុត
តើអ្នកមានធ្លាប់ពិសោធន៍ខ្លួនឯងដែរទេថា នៅពេលអ្នកធ្វើអ្វីមួយដែលអ្នកស្រលាញ់បំផុត និងពូកែបំផុត អ្នកមានអារម្មណ៍បែបណា? ចម្លើយគឺគ្មានអ្វីក្រៅពីអារម្មណ៍រីករាយនោះទេ។ ដូច្នេះ បើអ្នកធ្វើការងារដែលអ្នកពូកែ ដែលអ្នកចូលចិត្ត អ្នកនឹងកាន់តែរីករាយឡើងៗ។ សកម្មភាពរបស់អ្នកដែលនាំឲ្យអ្នករីករាយ និងមានគុណតម្លៃជាទូទៅ វានឹងជំរុញឲ្យ អ្នកកាន់តែជោគជ័យបន្ថែមទៀត។
៤.បង្កើតមិត្តភាពស្និទ្ធស្នាលឲ្យកាន់តែច្រើន
មានបណ្ដាញទំនាក់ទំនងល្អទាំងនៅក្នុងការងារក្តី ទាំងក្រៅការងារក្តី ក្នុងជំនួញក្តី ឬជាមួយអតិថិជនក្តី សុទ្ធតែផ្តល់គុណសម្បត្តិដល់អ្នក។ នៅក្នុងទិដ្ឋភាពជាក់ស្តែង អ្នកអាចសង្កេតឃើញថា មនុស្សដែលបង្កើតមិត្តភាពច្រើន មានភាពជោគជ័យជាងមនុស្សដែលចូលចិត្តឯកោ។ ទន្ទឹមនឹងនេះ ជីវិតអ្នកនឹងរីករាយកាន់តែច្រើនឡើង ប្រសិនបើមិត្តភាពរបស់អ្នកជាមិត្តភាពល្អ យល់ចិត្តយល់ថ្លើម និងមិនគិតពីផលប្រយោជន៍ជាធំ។
៥.កុំប្រកាន់ទស្សនៈ មានលុយច្រើនធ្វើឲ្យ អ្នកកាន់តែសប្បាយចិត្ត
សាកលវិទ្យាល័យ Princeton បានរកឃើញថា ថ្វីត្បិតតែលុយសំខាន់ ហើយវាអាចទិញអ្វីៗបានភាគច្រើនក៏ពិតមែន ប៉ុន្តែលុយកាន់តែច្រើនមិនមែនជាលក្ខខណ្ឌតែមួយគត់ដែលអាចធ្វើឲ្យអ្នកសប្បាយចិត្តនោះឡើយប្រសិនបើ អ្នកមិនបានដឹងពីវិធីដែលធ្វើឲ្យអ្នកសប្បាយចិត្ត។ ការស្រាវជ្រាវសាកលវិទ្យាល័យនេះបានបញ្ជាក់ថា ការគ្រប់គ្រងភាពលោភលន់របស់អ្នក ពោលគឺអារម្មណ៍ចង់បាននេះចង់បាននោះមិនចេះចប់ ហើយការចំណាយពេលធ្វើរឿងផ្សេងៗជាមួយមនុស្សដែលអ្នកស្រលាញ់ឲ្យបានកាន់តែច្រើន អ្នកនឹងទទួលបានអារម្មណ៍វិជ្ជមានចំពោះខ្លួនឯងកាន់តែខ្លាំងឡើង៕
ប្រភព៖ Inc
