អ្នក​ជំនាញ​ថា ទី​ផ្សារ​ដី​ឡូតិ៍កម្ពុជា​នាពេល​អនាគត​អាច​នឹង​ត្រូវ​ជំនួស​​ដោយ​ផ្ទះ​ដែល​មាន​តម្លៃ​ទាប​



នា​រយៈ​ពេល​ប៉ុន្មាន​ឆ្នាំ​ចុង​ក្រោយ​នេះ សកម្មភាព​នៃ​ការ​ពុះដីឡូតិ៍​នៅ​កម្ពុជា​បាន​នឹង​កំពុង​តែ​ពុះកញ្ជ្រោល​ខ្លាំង​និង​គួរ​ឲ្យ​កត់សម្គាល់​។ តើទីផ្សារ​ដីឡូតិ៍​​ទៅ​ថ្ងៃ​អនាគត​នឹង​មាន​ការ​ប្រែប្រួល​យ៉ាង​ណា?

នៅ​ក្នុង​បទសម្ភាសន៍​ជា​មួយ​ក្រុម​ការងារ​ Bizkhmer អ្នក​ជំនាញ​សេដ្ឋកិច្ចលោក ង៉ែត ជូ ប្រាប់​ថា​ កន្លង​មក​លោក​មើល​ឃើញ​ថា​គោលគំនិត​នៃ​ការ​ពុះ​ដីឡូតិ៍​នេះ​គឺ​ជំនួស​ឲ្យ​លទ្ធភាព​នៃ​ការ​ទិញ​ផ្ទះ​ល្វែង ប៉ុន្តែ​លោក​បាន​សង្កេត​ឃើញ​​ពី​និន្នាការ​ទៅ​ថ្ងៃ​អនាគត​នៃ​ទីផ្សារ​ដី​ឡូតិ៍​នៅ​កម្ពុជា​ថា​អាច​នឹង​ត្រូវ​បាន​ជំនួស​ទៅ​ដោយ​ផ្ទះ​ដែល​មាន​តម្លៃ​ទាប។

អ្នក​ជំនាញ​រូប​នេះ​បាន​លើក​ឡើង​បន្ត​ថា ភាគ​ច្រើន​នៃ​អ្នក​ដែល​ទិញ​ដីឡូតិ៍​តែង​គិត​ថាទិញ​ដី​ឲ្យ​ហើយ​ទើប​សង់​ផ្ទះ​ពេល​ក្រោយដែល​ជា​ទូទៅ​វា​មាន​ការ​លំបាក​ច្រើន​សម្រាប់​អ្នក​ដែល​ទិញ​ដីឡូតិ៍។ ដូច្នេះ​ប្រសិន​បើ​មាន​ផ្ទះ​សម្រាប់​អ្នក​ដែល​មាន​ចំណូល​ទាប​តែ​ម្ដង​ មាន​ន័យ​ថា​អ្វីៗ​គឺ​ពួក​គាត់​បាន​រៀប​ចំ​ជា​ស្រេច​ ទាំង​ប្រព័ន្ធ​លូ ទឹកភ្លើង ហេដ្ឋារចនា​សម្ព័ន្ធ និង​ការ​សាងសង់​ផ្ទះ ហើយ​ពេល​ខ្លះ​អាច​មាន​រហូត​ដល់​សន្តិសុខ​យាម​ទៀត​ផង​ ដែល​នេះ​គឺជា​​ការ​ល្អ​សម្រាប់​ពួកគាត់។

បន្ថែម​ពី​នោះ​លោក ង៉ែត ជូ បន្តថា​ ការ​រៀប​ចំ​កញ្ចប់​ហិរញ្ញវត្ថុ​ គឺ​វា​កាន់​តែ​ងាយ​ស្រួល​ថែម​ទៀត​ ដែល​មាន​ន័យ​ថា​បើ​យើង​ទិញ​ផ្ទះ​បង់រំលស់​មួយ​សារ​គឺ​ចប់​តែ​ម្ដង ដោយ​មិន​ចាំបាច់​ទិញ​ដី​ហើយ​ នៅ​សន្សំលុយ​ធ្វើ​ផ្ទះ នៅ​ត្រូវ​ជួល​ជាង​ទៀត​នោះ​ទេ។ លោក​ថា ចំពោះ​ការ​សង្កេត​មើល​ពី​ទីផ្សារ​ដីឡូតិ៍​កម្ពុជា​នា​ពេល​អនាគត វា​អាច​នឹង​មាន​កំណើន​យឺត​នារយៈ​ពេល​បុន្មាន​ឆ្នាំ​ខាង​មុខ​នេះ ព្រម​ទាំង​អាច​ឈាន​ទៅ​ដល់​បាត់​ទីផ្សារតែ​ម្ដង​​នា​រយៈ​ពេល​ប៉ុន្មាន​ឆ្នាំ​ខាង​មុខ​នេះ៕

ដោយ៖ ស្រីរ័ត្ន