ជនជាតិចិនចំនួន ១៥០លាននាក់ បានធ្វើដំណើរកម្សាន្តទូទាំងពិភពលោកនៅក្នុងឆ្នាំ ២០១៨។ ហើយប្រជាជនចំនួនប្រមាណជាង​២,៩លាននាក់បានទៅធ្វើដំណើរកម្សាន្តនៅក្នុងប្រទេសម៉ាឡេស៊ី។ នៅក្នុងឆ្នាំ ២០១៨ ​ខែមិថុនា Wechat បានពង្រីកខ្លួនចូលទៅក្នុងប្រទេសម៉ាឡេស៊ី ដែលហៅថា WeChat Pay MY។​ នេះគឺជាលើកទីមួយរបស់ Wechat ដែលពង្រីកខ្លួនចេញពីផ្ទះរបស់ខ្លួន ចិននិងហុងកុង ទៅកាន់ទីផ្សារអន្ដរជាតិ។ ក្នុងរយៈពេលជិតមួយឆ្នាំមកនេះ​ Wechat Pay MY ទទួលបានភាពរីកចម្រើនរបស់ខ្លួនយ៉ាងខ្លាំងក្លា។

គួរបញ្ចាក់ផងដែរថា ប្រទេសចិនគឺជាបងធំនៅលើពិភពលោកបើយើងនិយាយការទូរទាត់ប្រាក់តាមបែប E-payment​។ កម្មវិធី Wechat និង Alipay ពួកគេមានលំនឹងទីផ្សារធំមែនទែននៅក្នុងប្រទេសចិន។ នៅក្នុងប្រទេសចិន​ Alipay វាយយកទីផ្សារបានចំនួន ៥៥ភាគរយ នៃទីផ្សារ E-payment នៅសល់ប៉ុន្មាន​ Wechat យកទាំងអស់ ។ ជាមួយនឹងការកើនឡើងនៃអ្នកទេសចរជនជាតិចិនធ្វើដំណើរទៅកាន់បរទេសកាន់តែច្រើនឡើង ក្រុមហ៊ុនទាំងពីរក៏បានពង្រីកខ្លួនទៅតាមទីតាំងដែលជនជាតិចិនចូលចិត្ដធ្វើដំណើរទៅកាន់ទីនោះ។ និយាយឲ្យខ្លី ទីណាមានចិន ទីនោះមាន Alipay និង  Wechat។

Alipay បានជ្រៀតចូលទៅក្នុងទីផ្សារម៉ាឡេស៊ីមុន Wechat ។ Alipay បានចាប់ដៃគូរជាមួយនឹងធនាគារក្នុងស្រុកដ៏ធំមួយរបស់ម៉ាឡេស៊ីគឺ ធនាគារ CIMB ចំណែកឯ Wechat វិញចូលទៅក្នុងទីផ្សារម៉ាឡេស៊ីឆៅៗតែម្ដងមិនចាំបាច់ចាប់ដៃគូរជាមួយអ្នកណានោះទេ។ Wechatទទួលបានកម្មសិទ្ធបញ្ញាពីធនាគកណ្ដាលរបស់ម៉ាឡេស៊ីក្នុងការដំណើរការប្រតិបត្ដិការរបស់ខ្លួន។ ជាមួយទំហំអ្នកប្រើប្រាស់កម្មវិធីផ្ញើរសាររបស់ Wechat ជាង ២០លាននាក់រួចស្រាប់ហើយនោះ​ វាកាន់តែធ្វើឲ្យ Wechat កាន់តែមានភាពងាយស្រួលក្នុងការពង្រីកខ្លួនចូលទៅក្នុងទីផ្សារមួយនេះ។

នៅក្នុងប្រទេសម៉ាឡេស៊ីចំនួនអ្នកប្រើប្រាស់កម្មវិធីមានចំនួនប្រមាណជាង ២០លាននាក់  ជាមួយនឹងការកើនឡើងនៃចំនួនអ្នកប្រើប្រាស់ទូរស័ព្ទស្មាតហ្វូនដ៏ច្រើនលើសលប់វាសរបញ្ជាក់ឲ្យឃើញថាជាកំណើនមួយយ៉ាងល្អឥតខ្ចោះសម្រាប់ Wechat ក្នុងការវាយលុកយកទីផ្សារ E-wallet។

បើសិនជាការជ្រៀតចូលទៅក្នុងទីផ្សារថ្មីក្រុមហ៊ុន Wechat ពិតជាជោគជ័យមែននោះ​ វាឱកាសមាសឱកាសពេជ្យរបស់ Wechat ដែលពង្រីកខ្លួនកាន់តែធំបន្ថែមទៀតចូលទៅកាន់ទីផ្សារអាស៊ីអាគ្នេយន៍កាន់តែច្រើនជាងមុន។

គួរបញ្ជាក់ផងដែរថា Wechat គឺជាសត្រូវរបស់ក្រុមហ៊ុន Alibaba ពួកគេកំពុងតែសម្លឹងមើលគ្នាទៅវិញទៅមកពីយុទ្ធសាស្រ្ដថ្មីៗដើម្បីប្រើប្រាស់នៅក្នុងទីផ្សារអន្ដរជាតិ។​ ប្រទេសម៉ាឡេស៊ីបានដាក់ការសាកល្បង ដ៏យុត្ដិធម៌មួយសម្រាប់ពួកការចូល​មកាន់ទីផ្សារមួយនេះ។ បើសិនជាកម្មវិធី Wechat MY ទទួលបានការគាំទ្រ និងទទួលបានភាពជោគជ័យ ពួកគេនឹងអាចពង្រីកខ្លួនបានគ្រប់ទីកន្លែងនៅក្នុងប្រទេសម៉ាឡេស៊ីបន្ថែមទៀត៕

ដោយ៖ ច័ន្ទលាភ