តើរដ្ឋាភិបាលហ្វីលីពីនកាត់បន្ថយភាពក្រីក្រក្នុងប្រទេសដោយរបៀបណា?
តួលេខមួយក្នុងឆ្នាំ ២០១៥ បានបង្ហាញថា ២១.៦% នៃប្រជាជនហ្វីលីពីនកំពុងរស់នៅក្រោមបន្ទាត់នៃភាពក្រីក្រ ដែលអត្រានេះមានការធ្លាក់ចុះពីចំនួន ២៥.២% ក្នុងឆ្នាំ ២០១២។ តែទោះជាយ៉ាងណាចំនួននេះវានៅតែបង្ហាញពីភាពក្រីក្រនៅឡើយ ដោយសារមួយភាពប្រាំ (១/៥) នៃប្រជាជនហ្វីលីពីនមានជីវភាពទន់ខ្សោយ និងច្រើនជាង ១០% កំពុងរស់នៅក្នុងជីវភាពក្រីក្រខ្លាំង។
រដ្ឋាភិបាលហ្វីលីពីន ក៏ដូចជាអង្គការមិនមែនរដ្ឋាភិបាលបានខិតខំប្រឹងប្រែងខ្លាំងក្នុងការលើកកម្ពស់ជីវភាពប្រជាជនឲ្យងើបចេញពីភាពក្រីក្រ ហើយរដ្ឋាភិបាលក៏មានបំនងធ្វើឲ្យអត្រានៃភាពក្រីក្រប្រជាជនក្នុងប្រទេសធ្លាក់ចុះមកនៅត្រឹម ១៣% ទៅ ១៥% នៅឆ្នាំ ២០២២ តាមផែនការអភិវឌ្ឍប្រាំឆ្នាំ ២០១៧-២០២២។ កំណើនសេដ្ឋកិច្ចបានជួយឲ្យប្រជាជនក្នុងប្រទេសចេញពីភាពក្រីក្របានមួយផ្នែក ដោយសារពួកគេមានការងារធ្វើក៏ដូចជាឱកាសការងារច្រើនជាងមុន។
Source: Philippines Statistics Authority/Straits Times
រដ្ឋាភិបាលប្តេជ្ញាពង្រីកគម្រោង 4Ps
4Ps ជាអ្វីទៅ? 4Ps សំដៅលើ Pantawid Pamilyang Pilipino Program ដែលបានបង្កើតនៅឆ្នាំ ២០០៨ ដោយអតីតប្រធានាធិបតី Arroyo ដើម្បីជាជំនួយដល់គ្រួសារដែលក្រីក្របំផុតក្នុងប្រទេសទទួលបានការអប់រំនិង ការការពារផ្នែកសុខភាព។ កម្មវិធីមួយនេះចំណាយលុយអស់ច្រើនណាស់ដើម្បីកាត់បន្ថយភាពក្រីក្រ ពលកម្មលើកុមារ និងជំរុញវិស័យអប់រំ។ ដើម្បីទទួលបានការឧបត្តម្ភ គ្រួសារដែលចាត់ទុកថាជាជនក្រីក្រត្រូវបញ្ជូនកូនៗរបស់ពួកគេទៅពិនិត្យសុខភាព និងចាក់ថ្នាំបង្ការនៅមន្ទីរពេទ្យ ហើយក្នុងនោះគេសង្កេតឃើញថា ៩៦.៥% ទទួលបានសិទ្ធ។ ៤.៣ លានគ្រួសារនៃប្រជាជក្នុងប្រទេសទទួលបានអត្ថប្រយោជន៍ពីកម្មវិធីជំនួយនេះ ៩៨% បានយកកូនទៅចុះឈ្មោះចូលរៀន (ក្មេងប្រមាណ ១០.២លាននាក់) ការពិនិត្យសុខភាព និងការផ្តល់អាហារូបត្ថម្ភក៏មានការកើនឡើង។ ធនាគារពិភពលោកបានធ្វើការកត់សម្គាល់ថា ភាពក្រីក្រក្នុងប្រទេសហ្វីលីពីនបានធ្លាក់ចុះ ១.៥%។ ដោយឡែកប្រធានាធិតីបច្ចុប្បន្នលោក Rodrigo Duterte បានប្តេជ្ញាពង្រីកគ្រោងការណ៍មួយនេះបន្ថែម ប៉ុន្តែមិនបានបញ្ជាក់ពីព័ត៌មានលម្អិតច្បាស់លាស់ណាមួយឡើយ។ ជាងនេះទៅទៀតច្បាប់ថែទាំសុខភាពថ្មីរបស់លោក Duterte ទំនងជាកាត់បន្ថយសម្ពាធដល់ជនក្រីក្រក្នុងប្រទេសបានច្រើន។
ច្បាប់រៀបចំផែនការគ្រួសារត្រូវជួបរឿងបរាជ័យ
ក្នុងឆ្នាំ ២០១២ រដ្ឋាភិបាលបានអនុម័ត្តច្បាប់ស្តីពីគ្រួសារមួយ ដែលតម្រូវឲ្យមានការពន្យាកំណើតដោយឥតគិតថ្លៃ ការពិនិត្យសុខភាព និងជំនួយក្នុងការរៀបចំផែនការគ្រួសារសម្រាប់អ្នកដែលមានជីវភាពក្រីក្របំផុត។ តែច្បាប់នេះគ្មានប្រសិទ្ធិភាពឡើយរហូតដល់ឆ្នាំ ២០១៤ ដោយសារមានបញ្ហាផ្នែកច្បាប់។
ការបង្កើននូវលទ្ធភាពពន្យារកំណើតដោយឥតគិតថ្លៃនេះមានន័យថា ការពារនូវការមានផ្ទៃពោះដោយចៃដន្យ ដូចនេះទើបទាមទារឲ្យប្រជាជនមានការយល់ដឹងពីការធ្វើផែនការគ្រួសារ។ នាយកដ្ឋានសុខភាពបានព្យាករណ៍ថា ស្វាមី ភរិយាប្រមាណ ៦លានគូ ដែលនឹងត្រូវការសេវាពន្យាកំណើត ប៉ុន្តែវាខុសទាំងស្រុងពីការរំពឹងទុក។ ការត្រួតពិនិត្យលើកំណើនប្រជាជនអាចកាត់បន្ថយធនធានមនុស្សពិតមែន តែការបង្កើនគុណភាពវិស័យអប់រំ យកចិត្តទុកដាក់លើសុខមាលភាពមាតានិងទារក ជាកត្តាមួយផ្តល់លទ្ធភាពគ្រប់គ្រងធនធានមនុស្សដោយប្រសិទ្ធិភាពនាពេលអនាគត។
បន្ថែមឱកាសការងារលើសពីការងារកសិកម្មជាអ្វីដែលគួរធ្វើដើម្បីជម្រុញសេដ្ឋកិច្ច និងកាត់បន្ថយភាពក្រីក្រ។ ប្រជាជនជាង ៥០% ជាអ្នករស់នៅជនបទ ហើយអ្នកទាំងនោះក៏ជាអ្នកដែលងាយរកគ្រោះ ងាយរងផលប៉ះពាល់ពីគ្រោះធម្មជាតិ។ ៥០% នៃចំនួនប្រជាជនមិនមែនជាចំនួនតិចទេ មនុស្សរាប់លាននាក់ពឹងផ្អែកលើកសិកម្មជាមធ្យោបាយរកចម្បងបំផុត នៅពេលមានគ្រោះធម្មជាតិណាមួយយាយី សេដ្ឋកិច្ចពួកគេនឹងត្រូវបាត់បង់ស្ទើរទាំងស្រុង។ ស្របពេលជាមួយគ្នានេះដែររដ្ឋាភិបាលបានកំពុងធ្វើទំនើបកម្មសេដ្ឋកិច្ច កាត់បន្ថយការពឹងផ្អែកតែលើកសិកម្ម។
ទោះជាយ៉ាងណាក៏ដោយធនាគារពិភពលោកបានព្យាករណ៍ថា មួយផ្នែកដែលជាលទ្ធផលនៃការផ្លាស់ប្តូររបស់រដ្ឋាភិបាលដើម្បីកាត់បន្ថយការពឹងផ្អែកលើវិស័យកសិកម្មនេះ បានធ្វើឲ្យមនុស្សរហូតដល់ទៅជាងមួយលាននាក់ត្រូវដកចេញពីភាពក្រីក្រក្នុងមួយឆ្នាំនឹង។
អង្គការមួយចំនួនទៀតក៏កំពុងចូលរួមចំណែកជួយសង្គមកាត់បន្ថយភាពក្រីក្រ
មូលនិធិអភិវឌ្ឍន៍កសិកម្មអន្តរជាតិ International Fund for Agricultural Development (IFAD) បានជួយដល់កសិករក្នុងការស្វែងរកទីផ្សារសម្រាប់ផលិតផលកសិកម្មរបស់ពួកគេ ផ្តល់នូវបច្ចេកទេស និងដើមទុនសម្រាប់កសិកម្មតាំងពីឆ្នាំ ១៩៧៨ មក ហើយគម្រោងនេះបានចំណាយអស់ ៣២១.១ លានដុល្លារសម្រាប់ ១.៨លានក្រុមគ្រួសារ។
Zero Extreme Poverty PH ២០៣០ ជាគ្រោងការណ៍ថ្មីដែលអង្គការក្រៅរដ្ឋាភិបាលកំពុងប្រមូលធនធាននិងចំណេះដឹងក្នុងគោលបំណង ដើម្បីលុបបំបាត់ភាពក្រីក្រខ្លាំងនៅក្នុងប្រទេសហ្វីលីពីន។
ទាំងអស់នេះបានបង្ហាញពីភាពខិតខំប្រឹងប្រែងរបស់រដ្ឋាភិបាលហ្វីលីពីន ដើម្បីកាត់បន្ថយភាពក្រីក្រក្នុងប្រទេសរបស់ខ្លួន។
ដោយ៖ យ៉ាយ៉ា
