បើក្រឡែកមើលទៅក្រុមហ៊ុន Samsung, Oppo និង Xiaomi វិញ អ្នកទាំងនេះហាក់​ជា​អ្នក​ទទួល​បាន​ផល​ពី​បញ្ហា​របស់​ Huawei នៅពេល​នេះ។ អ្នក​ប្រើ​ប្រាស់ Huawei នៅតែអាច​បន្ត​ដំណើ​រការ​មុខ​ងារ​ទូរស័ព្ទ​ខ្លួន​បាន​ធម្ម​តា​ តែ​វា​អាច​នឹង​មាន​បញ្ហា​មួយចំនួននៅ​ពេល​ខាង​មុខ។

ខណៈ​ដែល​ក្រុម​ហ៊ុន Google ដាក់​ការ​រឹត​បន្តឹង​លើ​​អាជីវកម្ម​របស់​ Huawei លើប្រ​ព័ន្ធ​ប្រតិ​បត្តិការ​ Android នេះ​ គេ​បាន​សង្កេត​ឃើញ​ថាក្រុម​ហ៊ុន​មួយ​ចំនួន​ដូចជាក្រុម​ហ៊ុន​ឈា​ន​មុខ​ផ្នែក​ស្មាត​ហ្វូន​ Samsung និង​ក្រុម​ហ៊ុន​ក្នុង​ស្រុក Xiaomi និង Oppo ហាក់កំពុង​​ក្លាយ​ជា​អ្នកទទួល​ផល​ពី​បញ្ហា​មួយ​នេះ។ ហេតុ​ផល​គឺ​ដោយសារ​អ្នក​ប្រើ​ប្រាស់អាចថាជា អ្នកគាំទ្រ របស់ Huawei កំពុង​តែ​ពិ​ចារណា​ថា​ពួកគេ​នឹង​បន្ត​ប្រើ​ប្រាស់​ Huawei ដោយ​គ្មាន​ប្រតិបត្តិ​ការ Android បាន​ដោយ​វិធី​ណា។ លើស​ពី​នេះ​ក៏​នៅ​មាន​មតិ​មួយ​ចំនួន​បាន​ព្យាករណ៍​ដែរ​ថាចំនួន​នៃ​ការ​ប្រើ​ប្រាស់​ទូរស័ព្ទ​ដៃ​ និ​ងថេប្លេត​ Huawei នឹង​មានកា​រ​ធ្លាក់​ចុះ​។ ស្ថិត​ក្នុ​ងអំឡុង​ពេល​ចាំអ៊ុត​មើល​ពី​ដំណើរ​ការ​បន្ត​របស់ប្រព័ន្ធ​ប្រតិបត្តិ​ការ​ Huawei នេះ អ្នក​ដែល​ទើប​ចូល​វាយ​លុយ​ទីផ្សារ Oppo និង Xiaomi កំពុង​ដើរ​តួ​នាទី​ក្នុ​ងការលក់​ ពង្រីក​អាជីវកម្ម​របស់ខ្លួន​លើ​ទីផ្សារ​អន្តរ​ជាតិ​ ក៏​ដូចជា​ព្យាយាម​ចាប់​យក​ចំណែក​ទីផ្សារ​នៅ ប៉ែក​អឺរ៉ុប​ អេស្ប៉ាញ បារាំង​ អ៊ី​តាលីជា​ដើម។

គួរ​បញ្ជាក់​ថា ការលក់ស្មាតហ្វូនទូទាំងសកល​លោកសម្រាប់ក្រុមហ៊ុន Huawei បានកើនឡើង ៥០ ភាគរយនៅក្នុងត្រីមាសទី ១ នៃឆ្នាំ ២០១៩ ដែល​ធ្វើ​​ឲ្យ​ទូរគមនាគមន៍យក្ស​របស់ចិនមួយនេះឈាន​ដល់​កម្រិត​ប្រកួត​ប្រជែង​ខ្ពស់​ជាមួយ​ជើង​ចាស់ Samsung និង Apple៕

ដោយ៖ យ៉ាយ៉ា