រាប់អានមនុស្ស៤ ប្រភេទនេះ ពិតជាមិនខុសទេ!
មានមនុស្សមិនតិចទេដែលបានធ្លាប់ទទួលបាននូវភាពបរាជ័យក្នុងទំនាក់ទំនង។ ទំនាក់ទំនងមនុស្សល្អ នឹងធ្វើឲ្យអ្នកជោគជ័យ។ រាប់អានមនុស្សមិនល្អ អ្នកនឹងក្លាយជាមនុស្សបរាជ័យ។ ក៏ប៉ុន្តែតើមនុស្សប៉ុន្មាននាក់ទៅដែលចង់បរាជ័យ? ចម្លើយគឺប្រហែលជាគ្មានទេ។ បើដូច្នេះមែន ហេតុអ្វីបានជាអ្នកមិនបង្កើតទំនាក់ទំនងជាមួយមនុស្សល្អឲ្យបានច្រើន?
បើអ្នកពិបាករកចម្លើយនេះបាន អ្នកគួររៀនអង្កេតហើយជ្រើសរើសមនុស្ស ៤ប្រភេទខាងក្រោមនេះមករាប់អាន៖
១.មនុស្សស្រលាញ់ការងារ
មនុស្សឡេះឡោះ ធ្វើការងារឲ្យតែរួចពីដៃ មិនបង្ហាញថា មនុស្សនោះជាមនុស្សមានការទទួលខុសត្រូវនោះទេ។ ប្រសិនបើអ្នកចាត់ទុកថា ខ្លួនឯងត្រូវតែវៃឆ្លាតក្នុងការទំនាក់ទំនងជាមួយមនុស្សល្អៗ អ្នកត្រូវសម្លឹងមើលអ្នកណាដែលអ្នកមើលឃើញថា ជាមនុស្សស្រលាញ់ការងារដែលខ្លួនកំពុងធ្វើ។ ជាទូទៅមនុស្សដែលស្រលាញ់ការងារខ្លាំង ខិតខំបំពេញការងារខ្លាំងណាស់ តស៊ូ ហ្មត់ចត់ និងធ្វើការងារស្របតាមផែនការកំណត់។ មនុស្សប្រភេទនេះអាចជួយបង្រៀនថា ទោះជាធ្វើការងារអ្វីក៏ដោយ អ្នកត្រូវធ្វើការងារដែលអ្នកស្រលាញ់ និងត្រូវមានឆន្ទៈប្រឹងប្រែងធ្វើវាឲ្យបានផ្លែផ្កាយ៉ាងពិតប្រាកដ។
២.មនុស្សមានគំនិតវិជ្ជមាន
មនុស្សនឹងធ្វើការងារកាន់តែប្រសើរប្រសិនបើពួកគេសប្បាយចិត្ត។ ដោយឡែកសម្រាប់មនុស្សដែលមានគំនិតអវិជ្ជមានវិញនឹងទាញទម្លាក់អ្នកឲ្យកាន់តែដុនដាប និងមិនអាចផ្តល់ការលើកទឹកចិត្តណាមួយសម្រាប់ភាពជោគជ័យ ឬគំនិតច្នៃប្រឌិតថ្មីៗនោះទេ។ បើអ្នករាប់អានមនុស្សអវិជ្ជមានកាន់តែច្រើនឡើង ការងារ ឬមុខជំនួញរបស់អ្នកនឹងបរាជ័យជាមិនខាន។ យ៉ាងណាមិញ មនុស្សដែលមានគំនិតវិជ្ជមានវិញ នឹងធ្វើឲ្យអ្នកទទួលបានពន្លឺជីវិតទាំងការងារ ទាំងការរកស៊ី ទាំងការទំនាក់ទំនងនៅក្នុងជីវភាពប្រចាំ ថ្ងៃ។ ហេតុដូច្នេះ សូមកុំភ្លេចនាំមនុស្សប្រភេទ នេះឲ្យចូលមកក្នុងជីវិតរបស់អ្នកឲ្យបានច្រើន។
៣.មនុស្សពូកែលើកចម្ងល់
ដូចអ្នកប្រាជ្ញអាល្លឺម៉ង់លោក អាល់ប៊ឺត អាញស្ដាញ និយាយថា "រឿងដែលសំខាន់បំផុត គឺកុំបញ្ឈប់ចម្ងល់របស់អ្នក”។ ក្នុងនាមជាសហគ្រិនក៏ដោយ ជាអ្នកធ្វើការក៏ដោយ អ្នកគួរតែឧស្សាហ៍លើកជាចម្ងល់ឡើងដើម្បីសួរខ្លួនឯង និងអ្វីៗផ្សេងទៀតទាក់ទងទៅនឹងជីវិតរបស់អ្នក។ ក៏ប៉ុន្តែ មិនមែនសុទ្ធតែមនុស្សគ្រប់គ្នាអាចនឹកឃើញពីចម្ងល់សំខាន់ៗទាំងនោះ ឡើយ។ ជាធម្មតាទេ មនុស្សដែលមានចម្ងល់ច្រើន អាចជួយផ្តល់នូវមុំផ្សេងគ្នាលើបញ្ហា ឬគំនិតមួយ ហើយចម្ងល់ទាំងនោះអាចនាំទៅដល់ភាពសំខាន់មួយសម្រាប់អ្នក ឬអាជីវកម្មរបស់អ្នក។ សូមចាំថា ការយល់ឃើញ ឬទស្សនវិស័យ គឺជាជាអ្វីៗគ្រប់យ៉ាង។
៤.មនុស្សដែលមានក្តីសុបិន
មនុស្សគ្រប់រូបសុទ្ធតែមានក្តីសុបិន។ ប៉ុន្តែរាល់ក្តីសុបិនមិនមែនសុទ្ធតែមនុស្សគ្រប់គ្នាអាចសម្រេចបាននោះទេ។ មនុស្សខ្លះស្លាប់ទៅវិញទាំងសោកស្តាយព្រោះមិនបានបំពេញបំណងអ្វីសោះ។ យ៉ាងណាមិញ អ្នកត្រូវដឹងថា ការរៀបចំ គោលដៅ និងការខិតខំប្រឹងប្រែង នឹងជួយអ្នកឲ្យសម្រេចបានក្តីសុបិន្តនោះដែលអ្នកគិតថា មនុស្សគ្រប់គ្នាមិនងាយធ្វើបាន។ ដើម្បីឲ្យអ្នកសម្រេចបាននូវក្តីសុបិននេះ អ្នកក៏គួររស់នៅទំនាក់ទំនងជាមួយមនុស្សដែលមានក្តីសុបិន ឬគោលដៅប្រហាក់ប្រហែលអ្នកដែរ។ ពួកគេនឹងធ្វើឲ្យ អ្នកមានកម្លាំងចិត្តក្នុងការបន្តដំណើរទៅមុខយ៉ាងជឿជាក់៕
ប្រភព៖ Businessinsider
