ស្រីៗគួរដឹងសញ្ញាទាំង ៥ ដែលបង្ហាញថាមនុស្សដែលអ្នកស្រលាញ់មិនដែលបោកប្រាស់អ្នកទេ
ទំនាក់ទំនងស្នេហាពិតប្រាកដមួយស្តែងចេញតាមរយៈការទុកចិត្តគ្នាទៅវិញទៅមករវាងមនុស្សពីរនាក់។ វាមិនទាមទារនូវការសន្យា ឬពាក្យសម្តីដើម្បីឲ្យភាគីម្ខាងទុកចិត្តទេ តែអ្វីដែលអ្នកអាចសង្កេតបានពិតប្រាកដគឺចេញពីកាយវិការ និងទង្វើដែលផុសចេញពីចិត្ត។
ក្នុងទំនាក់ទំនងស្នេហាមួយគេសង្កេតឃើញថា មនុស្សស្រីជាអ្នកដែលតែងទទួយរងផលប៉ះពាល់ច្រើនជាងមនុស្សប្រុសនៅពេលមានការប្រះឆាចំណងស្នេហាអ្នកទាំងពីរនោះគឺដោយសារភាគីបុរសក្បត់ចិត្ត។ តែធ្វើយ៉ាងណាទើបនារីៗអាចដឹងថាមនុស្សដែលនាងស្រលាញ់មិនបោកប្រាកមនោសញ្ចេតនារបស់នាង? ខាងក្រោមនេះអាចឲ្យអ្នកសង្កេមនុស្សដែលអ្នកស្រលាញ់បានថាគេគិតយ៉ាងណាចំពោះស្នេហាមួយនេះ៖
១) គាត់តែងប្រាប់អ្នកពីការពិត
ទោះក្នុងកាលៈទេសៈណាក៏ដោយ បុរសម្នាក់មិនដែលព្យាយាមកុហសមនុស្សដែលគាត់ស្រលាញ់ឡើយ។ ពិសេសពេលគាត់ត្រូវចេញទៅណាមកណាដោយគ្មានវត្តមានអ្នក គាត់តែងប្រាប់អ្នកជាមុនថា គាត់ទៅណា ជាមួយអ្នកណា ដើម្បីអ្វី ហើយពេលណាមកវិញ។ អ្វីដែលគាត់ធ្វើទាំងអស់គឺបង្ហាញពីការគោរពដល់អ្នក ព្រោះគាត់ខ្លាចបំផុតគឺការដែលធ្វើឲ្យអ្នកឈឺចាប់។
២) គាត់ការពារនិងខ្លាចបាត់បង់អ្នក
គ្មានអ្វីចម្លែកទេបើគ្រាន់តែគាត់ព្រួយបារម្ភនៅពេលដែលអ្នកទៅណាមកណាជាមួយបុរសផ្សេង ត្រលប់មកផ្ទះវិញយប់ជ្រៅ។ អាចនិយាយបានថាគាត់កំពុងប្រចណ្ឌតែគិតមើលថា គាត់អាចប្រាប់អ្នកពីរឿងលម្អិតបានពេលគាត់ចេញទៅណាដោយគ្មានអ្នក ចុះហេតុអ្វីអ្នកមិនអាចប្រាប់គាត់ដូចដែលគាត់បានធ្វើ។ ត្រូវចាំថាមនុស្សដែលស្រលាញ់អ្នកពិតគឺគេខ្លាចបាត់បង់អ្នកណាស់។
៣) គាត់ផ្តោតលើការងារគាត់ណាស់
សួរថាគ្រាន់តែផ្តោតលើការងារគាត់ខ្លាំងអាចបង្ហាញថាគាត់ស្មោះត្រង់ មិនបោកប្រាស់ទំនាក់ទំនងអ្នកបានដោយរបៀបណា? ច្បាស់ណាស់គាត់គិតពីការងារ គាត់មិនមែនលេងសើចលើការងាររបស់គាត់មានន័យថាគាត់កំពុងរៀបពីការទទួលខុសត្រូវ ម្យ៉ាងវិញទៀតការដែលគាត់យកចិត្តទុកដាក់លើការងារព្រោះគាត់មិនចង់ឲ្យអ្នកលំបាកដោយសារគាត់គ្មានការងារធ្វើទេ ហើយគាត់ក៏បង្ហាញដែរថាគាត់អាចទទួលខុសត្រូវមនុស្សដែលគាត់ស្រលាញ់បាន។
៤) គាត់មិនទាក់ទងជាមួយអ្នកចាស់របស់គាត់ទៀតទេ
គាត់មិនដែលរំឮកពីមនុស្សអតីតរបស់គាត់ គាត់មិនព្យាយាមទាក់ទងគេព្រោះគាត់បានតាំងចិត្តឲ្យដាច់ស្រាច់ជាមួយគេហើយ គាតដឹងច្បាស់ថាគាត់កំពុងនៅជាមួយនរណា ហើយនរណាដែលអាចធ្វើឲ្យជីវិតរបស់គាត់បានប្រសើរយ៉ាងពិតប្រាកដ។
៥) គាត់តែងផ្តល់អាទិភាពដល់អ្នក
មនុស្សប្រុសដែលស្រលាញ់នារីម្នាក់ពិត គាត់មិនដែលខ្វល់ពីសម្តីអ្នកដទៃឬខ្វល់ពីការគិតបែបណាមកលើគាត់ទេ។ មុនធ្វើកិច្ចការអ្វីមួយគាត់តែងសួរយោបល់អ្នក ឬប្រគល់ការសម្រេចចិត្តដល់អ្នក អ្នកតែនៅក្នុងជម្រើសទៅមួយជានិច្ចសម្រាប់គាត់។ អ្វីដែលសំខាន់បំផុតមនុស្សប្រុសដែលស្រលាញ់អ្នកពិមិនដែលហាមប្រាមអ្នកមិនឲ្យសម្រេចក្តីសុបិនដែលអ្នកមានទេ មានតែជួយជ្រោមជ្រែងអ្នកដើម្បីឲ្យអ្នកឈានជើងចូលទៅចាប់យកក្តីសុបិនរបស់អ្នកឲ្យបាន ហើយគាត់ជាមនុស្សដែលនៅពីក្រោយចាំលើកទឹកចិត្តអ្នកជានិច្ច។
តើមិត្តនារីរកបានមនុស្សបែបនេះហើយឬនៅ? បើរកបានហើយសូមថែរក្សាគេឲ្យបានល្អ ហើយអ្នកក៏ត្រូវតបចិត្តស្រលាញ់ និងធ្វើដាក់គាត់ដូចអ្វីដែលគាត់បានឲ្យមកអ្នកដូចគ្នា៕
ដោយ៖ យ៉ាយ៉ា
