​បើ​និយាយ​ពី​​សេដ្ឋកិច្ច​អន្តរជាតិ​អ្នក​ណា​ក៏​ស្គាល់​ Bloomberg ​ដែរ ចុះ​ម្ចាស់​វា​ជា​នរណា​?​​​



បើ​និយាយ​ពី​​ទីផ្សារ​ ឬ​ព័ត៌មាន​ភាគហ៊ុន​​ និង​ព័ត៌មាន​សេដ្ឋកិច្ច​អន្តរជាតិ​ អ្នក​ណា​ៗ​ក៏​ស្គាល់​ ​គេហទំព័រ​ និង​ទូរទស្សន៍​ Bloomberg ​ដែរ ​ដែល​ជា​ស្ថាប័ន​អាជីព​ និង​លក្ខណៈ​អន្តរជាតិ​​ដ៏​ល្បីល្បាញ​មួយ​ក្នុង​លោក។ ​​ស្ថាបនិក​ក្រុមហ៊ុន​ប្រព័ន្ធ​ផ្សព្វផ្សាយ​មួយ​នេះ​​ គឺ​ លោក ​Michael Bloomberg​ ដែល​លោក​បាន​យក​ឈ្មោះ​របស់​លោក​ដាក់​ឱ្យ​អាជីវកម្ម​នេះ​តែ​ម្ដង។ ​​តើ​លោក​មាន​ប្រវត្តិ​យ៉ាង​ណា?​​​​​​

ប្រវត្តិរូប​សង្ខេប និង​ ការងារ លោក Michael Bloomberg បាន​កើត​នៅ​ថ្ងៃ​ទី១៤ ខែ​កុម្ភៈ​ ឆ្នាំ​១៩៤២ នា​ទីក្រុង Boston រដ្ឋ​ Massachusetts។ លោក​កើត​ក្នុង​ត្រកូល​ក្នុង​គ្រួសារ​ធូរធារ​មួយ​ ដែល​មាន​ឪពុក​ជា​បណ្ណារក្ស​ (អ្នក​​ថែរក្សា ទុកដាក់​សៀវភៅ​នៅ​សាកលវិទ្យាល័យ) ហើយ​គ្រួសារ​របស់​លោក​​មាន​ជាប់​សែ​ស្រឡាញ​​នឹង​​អម្បូរ​ជនជាតិ​​​ជ្វីហ្វ។​ លោក Bloomberg គឺ​ជា​អតីត​និស្សិត​​សាកលវិទ្យាល័យ​ Hopkins និង Harvard ​ជា​កន្លែង​ដែល​លោក​​សិក្សា​​ថ្នាក់​​​បរិញ្ញាប័ត្រ​ជាន់ខ្ពស់​​ផ្នែក​គ្រប់គ្រង​ពាណិជ្ជកម្ម ( Business Administration)​ ក្នុង​ឆ្នាំ១៩៦៦។ ការងារ​ដំបូង​ដែល​លោក​ទទួល​បាន​​​​​នៅ​ Wall Street គឺ​ជា​បុគ្គលិក​ធនាគារ Salomon Brothers ក្នុង​ឆ្នាំ​១៩៧២ ។

នៅ​ទី​នេះ​ហើយ ដែល​លោក​បាន​ហក់​ឡើង​តំណែង​យ៉ាង​រហ័ស​​​រហូត​បាន​ក្លាយ​ជា​ដៃគូ​ជំនួញ​​មាន​មុខតំណែង​ជា​អ្នក​ទទួល​ខុសត្រូវ​​ផ្នែក​លក់​​ក្នុង​ធនាគារ​នេះ​ក្នុង​ឆ្នាំ ១៩៧២។ មក​ដល់​ឆ្នាំ​១៩៧៣​ លោក​បាន​ក្លាយ​ទៅ​ជា​​ដៃគូ​ទូទៅ នៅ​ក្រុមហ៊ុន​ដដែល​នេះ។​ នៅ​​ឆ្នាំ ១៩៧៩ ប្រធាន​​ធនាគារ Salomon Brothers លោក John Gutfreund បាន​ស្នើសុំ​ឲ្យ​លោក Bloomberg ចុះ​ចេញ​ពី​តំណែង​​របស់​លោក​មក​ទទួល​បន្ទុក​ផ្នែក​គ្រប់គ្រង​វិស្វកម្ម​ប្រព័ន្ធ​កុំព្យូទ័រ​របស់​ក្រុមហ៊ុន​​វិញ។ ​ប៉ុន្តែ​គាត់​បាន​បដិសេធន៍។ ទោះបី​ជា​​នេះ​ក្តី​ ២​ឆ្នាំ​ក្រោយ​មក​ ពោល​គឺ​នៅ​ថ្ងៃ​ទី​៣១​ខែ កក្កដា​ឆ្នាំ​១៩៨១ ប្រធាន​​ធនាគារ​ខាងលើ​​​បាន​​ប្រកាស​ទំលាយ​ក្រុមហ៊ុន​​ពី​ក្រុមហ៊ុន​ឯកជន​ទៅ​ជា​ក្រុមហ៊ុន​សាធារណ​​ទិញ​លក់​ទំនិញ​ ដែល​មាន​ឈ្មោះ​ថា Phibro Corporation។​​​​

នេះ​បាន​ធ្វើ​ឲ្យ​Bloomberg មិន​ពេញ​ចិត្ត​ និង​ត្រូវ​បាន​​បណ្តេញ​ចេញ​​ពី​ក្រុមហ៊ុន​​នេះ​ជា​មួយ​ទឹកប្រាក់​១០​លាន​ដុល្លារ​​ជា​ថ្នូរ​នឹង​ការ​ចាកចេញ​របស់​លោក។ បង្កើត​ក្រុមហ៊ុន​ Bloomberg L.P. នៅ​ក្នុង​ឆ្នាំ១៩៨១ លោក Bloomberg ​បាន​សម្រេចចិត្ត​បង្កើត​ក្រុមហ៊ុន​ផ្ទាល់​ខ្លួន​​​​មួយ​​​សម្រាប់​ការ​​​ផ្តល់​ព័ត៌មាន​ហិរញ្ញវត្ថុ​តាម​ប្រព័ន្ធ​កុំព្យូទ័រ (Financial Information Computer) ដោយ​ត្រូវ​បាន​គិតគូរ​ទៅ​លើ​សុវត្ថិភាព​ និង​ភាព​សម្ងាត់​នៃ​ព័ត៌មាន​បំផុត។ លោក​បាន​ដាក់ចិត្ត​ដាក់​កាយ​ជា​មួយ​ក្រុមហ៊ុន​របស់​លោក​ដោយ​ប្រើ​​​ដើម​ទុន ​​​​៤​លាន​ដុល្លារ​ប៉ុណ្ណោះ​​ សម្រាប់​បើក​អាជីវកម្មដំបូង​​នេះ​ ក្នុង​ការ​​អភិវឌ្ឍ​ប្រព័ន្ធ​កុំព្យូទ័រ​ដែល​អាច​​ផ្តល់​ព័ត៌មាន​ដល់​អតិថិជន​ពី​ទីផ្សារ​សញ្ញាប័ណ្ណ(Bond Markets)។

ពី​មួយ​ថ្ងៃ​ទៅ​មួយ​ថ្ងៃ ទីតាំង​ក្រុមហ៊ុន​ស្ថិត​នៅ​ក្នុង​​​បន្ទប់​អាគារ​ជួល​តូច​មួយ​​បាន​​រីក​ធំធាត់​ជា​បន្តបន្ទាប់ ហើយ​មួយ​ឆ្នាំ​ក្រោយ​មក​ ពោល​គឺ​នៅ​ក្នុង​ឆ្នាំ​១៩៨២ ធនាគារ Merrill Lynch របស់​អាមេរិក​បាន​ទិញ​ភាគហ៊ុន​មួយ​ចំនួន​នៅ​ក្រុមហ៊ុន​លោក Bloomberg និង​វិនិយោគ​ទឹកប្រាក់​បន្ថែម​ចំនួន ​៣០​លាន​ដុល្លារ​។ ក្រុមហ៊ុន​​របស់​លោក​បាន​បោះជំហាន​ទៅ​មុខ​​យ៉ាង​ឆាប់​រហ័ស ហើយ​​នៅ​ក្នុង​ឆ្នាំ ១៩៨៦ ក្រុមហ៊ុន​របស់​លោក​បាន​ប្តូរ​ឈ្មោះ​ទៅ​ជា​ក្រុមហ៊ុន Bloomberg L.P.​ ដែល​មាន​ការិយាល័យ​ចំនួន​១០០​ទីតាំង​នៅ​ជុំវិញ​ពិភពលោកដែល​មាន​គេហទំព័រ​សារព័ត៌មាន​ល្បីល្បាញBloomberg.com ស្រាប់ សម្រាប់​ផ្តល់​ព័ត៌មាន​​​ទូទៅ​ដែល​ផ្តោត​សំខាន់​លើ​ផ្នែក​ហិរញ្ញវត្ថុ​ និង សេដ្ឋកិច្ច ទន្ទឹម​នឹង​មាន​បុគ្គលិក​បម្រើ​ការងារ​ចំនួន​ជិត​ ២​ម៉ឺន​នាក់។

ជាប់​ជា​​អភិបាល​ក្រុង​​ញីវយ៉ក (New York) ចំនួន ​៣​ អាណត្តិ ភាព​​ជា​អ្នក​ជំនួញ​​​ មិន​បាន​ធ្វើ​ឲ្យ​លោក Bloomberg ស្កប់ស្កល់​នោះ​ឡើយ ពោល​គឺ​នៅ​ក្នុង​ឆ្នាំ​២០០២ លោក​បាន​ប្រឡូក​ចូល​ក្នុង​ឆាក​នយោបាយ​​​អាមេរិក រហូត​បាន​ជាប់​ឈ្មោះ​ជា​​អភិបាល​​ក្រុង New York មក​ពី​គណបក្ស​សាធារណរដ្ឋ។ ​ គោលនយោបាយ​​យ៉ាង​មាន​ប្រសិទ្ធភាព​​របស់​លោក Bloomberg ​​សម្រាប់​ការ​អភិវឌ្ឍ សុវត្ថិភាព និង សន្តិសុខ​នៅ​ក្នុង​ទីក្រុង​ធំ​បំផុត​របស់​ខ្លួន​មួយ​នេះ ​បាន​​ធ្វើ​ឲ្យ​​មហាសេដ្ឋី​រូប​នេះ​បាន​ជាប់​ឆ្នោត​ជា​ថ្មី​នៅ​ក្នុង​អាណត្តិ​ទី២​​ក្នុង​ឆ្នាំ​២០០៥ ។ ​មក​ដល់​​ឆ្នាំ​២០០៨ ខណៈ​ដែល​អាមេរិក​កំពុង​ជួប​វិបត្តិ​ហិរញ្ញវត្ថុ​ដ៏​ធ្ងន់ធ្ងរ លោក​នៅ​តែ​រក្សា​តំណែង​របស់​លោក​​ដដែល​ រហូត​ដល់​​ជាប់​ឆ្នោត​​​សាជាថ្មី​ក្នុង​អាណត្តិ​ទី៣​​មុន​ពេល​លោក​បញ្ចប់​អាណត្តិ​របស់​លោក​កាល​​ពី​ឆ្នាំ​២០១៣​កន្លង​ទៅ​​ថ្មីៗ​នេះ។ ក្នុង​វ័យ​ ៧៥ឆ្នាំ និង​មាន​​ប្រាក់​ ៥៣,៤​​ ពាន់​លាន​ដុល្លារ​ក្នុង​ដៃ​ (គេ​ប៉ាន់​ស្មាន​នៅ​ត្រឹម​ខែ​កក្កដា​ ឆ្នាំ​២០១៧) នៅ​ពេល​បច្ចុប្បន្ន លោក Bloomberg បាន​​ចូល​រួម​ក្នុង​​កម្មវិធី​​នានា​ដូច​​ជា​បាន​ធ្វើ​បទសម្ភាសន៍​ឲ្យ ​ទស្សនាវដ្ដី Forbes ដ៏​ល្បី​របស់​អាមេរិក​ជុំវិញ​មុខ​ជំនួញ​យ៉ាង​ជោគជ័យ​របស់​លោក​​។ គិត​ត្រឹម​ខែ​​ឆ្នាំ​២០១៧ នេះ​ លោក​បាន​ក្លាយ​ជា​មហាសេដ្ឋី​មាន​ជាង​គេ​បំផុត​លំដាប់​ទី​ ៦ នៅ​សហរដ្ឋ​អាមេរិក និង​ទី៩នៅ​ទូទាំង​ពិភពលោក៕

ប្រភព៖ www.biography.com