មិនធម្មតា! បារាំងចង់បើកក្រុមហ៊ុនជួសជុលយន្តហោះនៅកម្ពុជា
ប្រទេសបារាំងមានបំណងចង់បង្កើតក្រុមហ៊ុនថែទាំ និងជួសជុលយន្តហោះនៅកម្ពុជា ព្រមទាំងគ្រោងនឹងបើកសាលាបណ្ដុះបណ្ដាលលើវិស័យអាកាសចរស៊ីវិលផងដែរ។ ការលើកឡើងរបស់ភាគីបារាំងនេះធ្វើឡើងនៅក្នុងជំនួបសម្ដែងការគួរសម និងពិភាក្សាការងាររវាង ឯកឧត្ដមនាយឧត្ដមសេនីយ៍បណ្ឌិត ម៉ៅ ហាវណ្ណាល់ រដ្ឋមន្ត្រី អនុញ្ញាតិឱ្យ លោកទំទាវ Nguyen Binh Eva ឯកអគ្គរដ្ឋទូតវិសាមញ្ញ និងពេញសមត្ថភាព របស់សាធារណរដ្ឋបារាំង ប្រចាំព្រះរាជាណាចក្រកម្ពុជា និង លោក Mr. Philippe BAUDRY ប្រធានកិច្ចការសេដ្ឋកិច្ចប្រចាំប្រទេសកម្ពុជា និងឡាវ កាលពីថ្ងៃទី០៩ ខែកក្កដា ឆ្នាំ២០១៩ កន្លងទៅ។
នៅក្នុងកិច្ចពិភាក្សានេះ ក្រៅអំពីបំណងបើកក្រុមហ៊ុនជួសជុលយន្តហោះនិងសាលាបណ្ដុះបណ្ដាលវិស័យអាកាសចរស៊ីវិល ភាគីបារាំងថានឹងផ្ដល់ការសិក្សាអាកាសចរស៊ីវិលនៅកម្ពុជា ព្រមទាំងបង្ហាញពីបំណងពង្រឹងលើការងារសុវត្ថិភាពនិងសន្តិសុខអាកាសចរ ពង្រឹងកិច្ចសហប្រតិបត្តិការទ្វេភាគី រវាងរដ្ឋលេខាធិការដ្ឋានអាកាសចរស៊ីវិល និងអាជ្ញាធរអាកាសចរស៊ីវិលបារាំង។
លើសពីនេះ លោកជំទាវ Nguyen Binh Eva ក៏បានអបអរសាទរចំពោះរដ្ឋលេខាធិការដ្ឋានអាកាសចរស៊ីវិល ដោយមានការផ្ដល់អាហារូបករណ៍ ពីប្រទេសបារាំង បានបញ្ជូន មន្ត្រី និងបានបញ្ចប់ការសិក្សា លើជំនាញឯកទេស គ្រប់គ្រងដឹកជញ្ជួនផ្លូវអាកាស កម្រិតក្រោយបរិញ្ញាបត្រ័ជាន់ខ្ពស់ ០១រូប នៅសាលាអាកាសចរជាតិ ENAC ប្រទេសបារាំង ក្នុងឆ្នាំ២០១២-២០១៣ និង០២ រូប ទើបបញ្ចប់ការសិក្សាក្នុងខែ កក្កដា ឆ្នាំ២០១៩ នេះ នៅសាលាអាកាសចរក្រុងហុងកុង ដែលមានកិច្ចសហប្រតិបត្តិការជាមួយ ENAC ។
ឯកឧត្ដម ម៉ៅ ហាវណ្ណាល់ បានគួសបញ្ជាក់ពីកិច្ចសហប្រតិបត្តិល្អ រវាងរដ្ឋលេខាធិការដ្ឋានអាកាសចរស៊ីវិល និងអាជ្ញាធរអាកាសចរស៊ីវិលបារាំង និងបានថ្លែងអំណរគុណដល់ប្រទេសបារាំងដែលបានជួយដល់ការបណ្ដុះបណ្ដាលធនធានមនុស្ស លើវិស័យអាកាសចរស៊ីវិល នៅកម្ពុជា និងសំដែងនូវការគាំទ្រទាំងអស់ លើកិច្ចសហប្រតិបត្តិការ សំដៅអភិវឌ្ឍវិស័យអាកាសចរឱ្យកាន់តែរីកចម្រើនថែមទៀត៕
ប្រភព៖ រដ្ឋលេខាធិការដ្ឋានអាកាសចរសុីវិល
